អន្តរជាតិ ៖ ពូល I ព្រឹត្តិការណ៍ FIFA World Cup ឆ្នាំ២០២៦ ត្រូវបានប្រសិទ្ធនាមថាជាពូលមរណៈ ដោយសារតែវត្តមានពីក្រុមខ្លាំងៗដូចជា បារាំង, សេណេហ្គាល់, ន័រវែស និងអ៊ីរ៉ាក់ ដើម្បីអង្រួននៅក្នុងវគ្គចែកពូលនេះ។
បារាំង ឈរក្នុងនាមជាក្រុមមួយក្នុងចំណោមក្រុមដែលមានឱកាសឈ្នះជើងឯក FIFA World Cup ឆ្នាំ ២០២៦ ខ្ពស់បំផុត ជាមួយកម្លាំងប្រយុទ្ធដ៏មុតស្រួចគួរឱ្យខ្លាច។ ស្ថិតក្រោមការដឹកនាំរបស់លោក Didier Deschamps តែងតែនិយមប្រើប្រាស់ប្រព័ន្ធការពារដ៏រឹងមាំ។ ទោះជាយ៉ាងណាក៏ដោយ លោកបានកែប្រែមកប្រើប្រាស់ទម្រង់ ៤-២-៣-១ ត្រៀមសម្រាប់ព្រឹត្តិការណ៍ឆ្នាំ ២០២៦ ហើយបើទោះជាខ្វះខាតខ្សែប្រយុទ្ធកណ្តាលពិតប្រាកដ ជាបង្គោលក្នុងការរកគ្រាប់បាល់ក៏ដោយ ក៏ក្រុមរបស់លោកបានរបូតគ្រាប់បាល់ត្រឹមតែ ៤ គ្រាប់ប៉ុណ្ណោះ អំឡុងពេលប្រកួតវគ្គជម្រុះ ហើយថែមទាំងមានតំបន់ប្រយុទ្ធពោរពេញដោយកីឡាករឆ្នើមៗ និងមានតម្លៃខ្លួនខ្ពស់ថែមទៀតផង។
-ចំណាត់ថ្នាក់ FIFA ៖ លេខ ២
-ឱកាសលេខ ១ ក្នុងពូលពីការព្យាករណ៍របស់ Opta ៖ ៦០,៥%
-កីឡាករឆ្នើម ៖ Kylian Mbappé និង Ousmane Dembélé
សេណេហ្កាល់ ត្រូវបានគេចាត់ទុកថាជាក្រុមដ៏រឹងមាំបំផុតមួយរបស់ទ្វីបអាហ្វ្រិកសម្រាប់ការប្រកួត World Cup ឆ្នាំ ២០២៦ បន្ទាប់ពីពួកគេបានឆ្លងផុតវគ្គជម្រុះទ្វីប ដោយមិនស្គាល់ពាក្យថាចាញ់សោះ។ ក្រោមការដឹកនាំរបស់លោក Pape Thiaw ក្រុមរហស្សនាម តោតេរ៉ាងហ្គាមួយនេះ កំពុងសម្លឹងរកការបង្កើតប្រវត្តិសាស្ត្រឡើងវិញ ក៏ដូចជាការឈានទៅវគ្គបន្តឱ្យបានជ្រៅបំផុតក្នុងការបង្ហាញខ្លួនលើកទី ៤ របស់ពួកគេក្នុងព្រឹត្តិការណ៍ World Cup។
-ចំណាត់ថ្នាក់ FIFA ៖ លេខ ២០
-ឱកាសលេខ ១ ក្នុងពូលពីការព្យាករណ៍របស់ Opta ៖ ១១,៣%
-កីឡាករឆ្នើម ៖ Sadio Mané និង Kalidou Koulibaly
អ៊ីរ៉ាក់ គឺជាក្រុមទី ៤៨ ឬក្រុមចុងក្រោយគេបង្អស់ដណ្តើមបានកៅអីមកកាន់ព្រឹត្តិការណ៍ World Cup ឆ្នាំ ២០២៦ បន្ទាប់ពីខកខានអស់រយៈពេល៤០ឆ្នាំ។ ក្រុមរហស្សនាមថា តោមេសូប៉ូតាមីមួយនេះ បានឆ្លងកាត់ការប្រកួតជម្រុះយ៉ាងស្វិតស្វាញរហូតដល់ទៅ ២១ ប្រកួត។ ក្រោមការដឹកនាំរបស់គ្រូជនជាតិអូស្ត្រាលី លោក Graham Arnold (ដែលធ្លាប់បានដឹកនាំអូស្ត្រាលីឡើងដល់វគ្គ ១៦ ក្រុមចុងក្រោយកាលពីឆ្នាំ ២០២២) អ៊ីរ៉ាក់បានរៀបចំទម្រង់លេងយ៉ាងមានរបៀបរៀបរយ ដោយផ្តោតខ្លាំងលើការការពាររឹងមាំ និងការវាយបកលឿនៗ។
-ចំណាត់ថ្នាក់ FIFA ៖ លេខ ៦៨
-ឱកាសលេខ ១ ក្នុងពូលពីការព្យាករណ៍របស់ Opta ៖ ៣%
-កីឡាករឆ្នើម ៖ Aymen Hussein, Ali Al-Hamadi និង Zidane Iqbal
ន័រវែស បានឡើងមកដល់ព្រឹត្តិការណ៍ World Cup ឆ្នាំ ២០២៦ ដែលនេះជាការត្រឡប់មកវិញជាលើកដំបូងក្នុងរយៈពេល ២៨ ឆ្នាំ។ ស្ថិតក្រោមការដឹកនាំរបស់លោក Ståle Solbakken ពួកគេត្រូវបានមើលឃើញថាជាក្រុមបង្កភាពភ័យខ្លាចដល់គូប្រកួតរបស់ខ្លួន ដោយសារតែមានកីឡាករយុគមាស ពោរពេញដោយសមត្ថភាពខ្ពស់ និងលេងក្នុងលីគកំពូលៗនៅអឺរ៉ុប ជាពិសេសខ្សែប្រយុទ្ធដ៏មុតស្រួច Erling Haaland ជាដើម។
-ចំណាត់ថ្នាក់ FIFA ៖ លេខ ៦៨
-ឱកាសលេខ ១ ក្នុងពូលពីការព្យាករណ៍របស់ Opta ៖២៥,២%
-កីឡាករឆ្នើម ៖ Erling Haaland និងប្រធានក្រុម Martin Ødegaard នៅតែតួអង្គដ៏សំខាន់របស់ក្រុម
កាលវិភាគប្រកួតទី ១ (ម៉ោងនៅកម្ពុជា)
-បារាំង ប៉ះ សេណេហ្កាល់ ម៉ោង ២ រំលងអាធ្រាត្រចូលថ្ងៃទី១៧ ខែមិថុនា
-អ៊ីរ៉ាក់ ប៉ះ ន័រវែស ម៉ោង ៥ ព្រឹកថ្ងៃទី១៧ ខែមិថុនា
កាលវិភាគប្រកួតទី ២
-បារាំង ប៉ះ អ៊ីរ៉ាក់ ម៉ោង ៤ ព្រឹកថ្ងៃទី២៣ ខែមិថុនា
-ន័រវែស ប៉ះ សេណេហ្កាល់ ម៉ោង ៧ ព្រឹកថ្ងៃទី២៣ ខែមិថុនា
កាលវិភាគប្រកួតទី ៣
-ន័រវែស ប៉ះ បារាំង ម៉ោង ២ រំលងអាធ្រាត្រចូលថ្ងៃទី២៧ ខែមិថុនា
-សេណេហ្កាល់ ប៉ះ អ៊ីរ៉ាក់ ម៉ោង ២ រំលងអាធ្រាត្រចូលថ្ងៃទី២៧ ខែមិថុនា៕ ប្រភព ៖ FIFA, Yahoo Sports, Opta Analyst, MLS Soccer និងប្រភពផ្សេងទៀត
ចែករំលែកព័តមាននេះ