ប្រទេសសូម៉ាលី ៖ លោក Omar Abdulkadir Artan អាជ្ញាកណ្តាលបាល់ទាត់អន្តរជាតិឆ្នើមរបស់ប្រទេសសូម៉ាលី ត្រូវបានទទួលស្វាគមន៍យ៉ាងកក់ក្តៅ និងអធិកអធមប្រៀបដូចជាវីរបុរសជាតិ នៅពេលធ្វើដំណើរវិលត្រឡប់មកដល់ទីក្រុងម៉ូហ្កាឌីស្យូ (Mogadishu) ប្រទេសកំណើតវិញ កាលពីថ្ងៃទី១០ ខែមិថុនា ឆ្នាំ២០២៦ បន្ទាប់ពីក្តីសម្រៃកាត់សេចក្តីការប្រកួតព្រឹត្តិការណ៍ FIFA World Cup ឆ្នាំ២០២៦ បានរលាយ។ នេះបើតាមប្រភពពី Reuters, Al Jazeera, ESPN និងប្រភពផ្សេងទៀតបានចេញផ្សាយ។
ការវិលត្រឡប់នេះកើតឡើង បន្ទាប់ពីលោកត្រូវបានអាជ្ញាធរសហរដ្ឋអាមេរិក បដិសេធមិនឱ្យចូលប្រទេស ដើម្បីបំពេញភារកិច្ចកាត់សេចក្តីការប្រកួតព្រឹត្តិការណ៍ World Cup ឆ្នាំ ២០២៦ បើទោះបីជារដ្ឋាភិបាលសូម៉ាលីបានចេញលិខិតឆ្លងដែនការទូតជូនលោក ដើម្បីជៀសវាងឧបសគ្គនានាយ៉ាងណាក៏ដោយ ក៏អាជ្ញាធរអាមេរិកនៅតែបដិសេធដោយលើកឡើងអំពីបញ្ហាការត្រួតពិនិត្យសន្តិសុខជាតិជាហេតុផល។ ពាក់ព័ន្ធនឹងបញ្ហានេះ សហព័ន្ធបាល់ទាត់ពិភពលោក (FIFA) បានសម្តែងការសោកស្តាយ ប៉ុន្តែបានបញ្ជាក់ថា ខ្លួនមិនអាចលូកដៃក្នុងកិច្ចការអន្តោប្រវេសន៍ និងច្បាប់ទិដ្ឋាការរបស់សហរដ្ឋអាមេរិក ដែលជាប្រទេសម្ចាស់ផ្ទះបានឡើយ។
លោក Artan ត្រូវបានសហព័ន្ធបាល់ទាត់អាហ្វ្រិក (CAF) ជ្រើសរើសជាអាជ្ញាកណ្តាលឆ្នើមប្រចាំឆ្នាំ ២០២៥។ អាជ្ញាកណ្តាលវ័យ៣៤ឆ្នាំរូបនេះ គឺជាអាជ្ញាកណ្តាលម្នាក់នៅក្នុងចំណោមអាជ្ញាកណ្តាលទាំង៥២រូប ដែលត្រូវបានជ្រើសរើសដោយ FIFA ឱ្យកាត់សេចក្តីប្រកួត World Cup ឆ្នាំ ២០២៦ ហើយលោកក៏ត្រៀមនឹងក្លាយជាជនជាតិសូម៉ាលីដំបូងបង្អស់ក្នុងប្រវត្តិសាស្ត្រ ដែលបានដឹកនាំការប្រកួតព្រឹត្តិការណ៍ពិភពលោកមួយនេះ និងជាក្តីសម្រៃរបស់លោកផងដែរ។
យ៉ាងណាមិញ ទោះជាក្តីស្រមៃនោះត្រូវបានរលាយក៏ពិតមែន ប៉ុន្តែការត្រឡប់មកកាន់ប្រទេសកំណើតវិញ លោក Artan ត្រូវបានគ្រប់គ្នាចាត់ទុកដូចជាវីរបុរសជាតិអ៊ីចឹង។ ជាក់ស្តែង ប្រជាជនសូម៉ាលីរាប់រយនាក់ មន្ត្រីរដ្ឋាភិបាល រួមទាំងរដ្ឋមន្ត្រីក្រសួងកីឡា បានទៅរង់ចាំទទួលលោកនៅឯព្រលានយន្តហោះអន្តរជាតិ Aden Adde ដោយនាំយកទាំងទង់ជាតិសូម៉ាលីមកគដណ្តប់លើលោកថែមទៀតផង ដើម្បីបង្ហាញពីការគាំទ្រ និងក្តីស្រឡាញ់។
នៅល្ងាចថ្ងៃដដែលនោះ លោកត្រូវបានអញ្ជើញជាភ្ញៀវកិត្តិយសដ៏ខ្ពង់ខ្ពស់ក្នុងការប្រកួតបាល់ទាត់មួយ នៅឯពហុកីឡដ្ឋានជាតិសូម៉ាលី ដែលមានអ្នកគាំទ្ររាប់ពាន់នាក់ចូលរួមអបអរសាទរ។ មិនតែប៉ុណ្ណោះ នាយករដ្ឋមន្ត្រីសូម៉ាលី លោក Hamza Abdi Barre បានជួបពិភាក្សាដោយផ្ទាល់ជាមួយលោក Artan និងបានប្រកាសថា លោកបានឈ្នះបេះដូងប្រជាជនសូម៉ាលីរាប់លាននាក់ និងបានកត់ត្រាឈ្មោះនៅក្នុងប្រវត្តិសាស្ត្ររួចស្រេចទៅហើយ។
បើទោះជាខកចិត្តខ្លាំងនៅព្រឹត្តិការណ៍ World Cup ឆ្នាំ ២០២៦ ប៉ុន្តែលោក Artan បានថ្លែងទៅកាន់អ្នកគ្រប់គ្នាដូច្នេះថា «ខ្ញុំសន្យាជាមួយអ្នកទាំងអស់គ្នាថា ព្រះនឹងជួយឱ្យខ្ញុំបានចូលរួមនៅក្នុងព្រឹត្តិការណ៍ World Cup លើកក្រោយជាក់ជាមិនខាន»៕
ចែករំលែកព័តមាននេះ