អត្តពលិកជនពិការកម្ពុជាដណ្ដើមបានមេដាយមាស២គ្រឿងពីការប្រកួតអន្តរជាតិនៅម៉ាឡេស៊ី
- ភ្នំពេញ
រាជធានីភ្នំពេញ ៖ ក្រុមប្រតិភូកីឡាជម្រើសជាតិជនពិការកម្ពុជា បានវិលត្រឡប់មកដល់មាតុប្រទេសវិញហើយកាលពីយប់ថ្ងៃទី៦ ខែមិថុនា ដោយនាំមកជាមួយនូវជ័យជម្នះយ៉ាងធំធេងជូនជាតិមាតុភូមិ ដោយដណ្ដើម
បានមេដាយមាសចំនួន២គ្រឿងពីការប្រកួតក្នុងព្រឹត្តិការណ៍កីឡាthe 2nd Asian Para Throwball Championship2026 ដែលបានប្រព្រឹត្តទៅចាប់ពីថ្ងៃទី៣និងទី៤ ខែមិថុនា នៅទីក្រុងកូឡាឡាំពួរ ប្រទេសម៉ាឡេស៊ី។
គួររំលឹកថា ប្រតិភូកីឡាកម្ពុជាដែលបានទៅចូលរួមនៅក្នុងព្រឹត្តិការណ៍កីឡាជនពិការកម្រិតអាស៊ីលើកទី២ នៅប្រទេសម៉ាឡេស៊ីលើកនេះមាន២ក្រុមគឺបុរស១ក្រុម និងនារី១ក្រុម។ ក្រុមកីឡាការិនីជនពិការកម្ពុជា ត្រូវប៉ះជាមួយក្រុមកីឡាការរិនីជនពិការមកពី៣ប្រទេសមានប្រទេសឥណ្ឌា ម៉ាឡេស៊ី និងប៊ូតាន់ ។ ក្នុងនោះក្រុមកីឡាការិនីកម្ពុជាយកឈ្នះលើក្រុមកីឡាការិនីប្រទេស៣នោះដោយជោគជ័យថែមទាំងនាំយកមេដាយមាសត្រឡប់មកវិញទៀតផង ។ ចំណែកក្រុមកីឡាករជនពិការកម្ពុជា បានជួបគូប្រកួតមកពីប្រទេសខ្លាំងចំនួន៥រួមមាន៖ ម៉ាឡេស៊ី ឥណ្ឌូណេស៊ី ស្រីលង្កា បង់ក្លាដេស និងឥណ្ឌា។
ថ្លែងនៅក្នុងអាកាសយានអន្តរជាតិមរតកតេជោកាលពីយប់ថ្ងៃទី៦ ខែមិថុនា កន្លងមកនេះលោកយាន គីស៊ីវត្ថា នាយកមជ្ឈមណ្ឌលជាតិហ្វឹកហ្វឺនកីឡា តំណាងឯកឧត្តមប៉ុន សុខ បានឱ្យដឹងថា ក្រុមកីឡាករ កីឡាការិនីបាល់បោះជម្រើសជាតិជនពិការកម្ពុជា ពិតជាធ្វើបានល្អខ្លាំងណាស់ ដោយយកឈ្នះលើក្រុមខ្លាំងៗមកពីបណ្ដាប្រទេសធំៗដោយជោគជ័យ និងបាននាំមកជាមួយនូវមេដាយមាសចំនួន២គ្រឿងជូនជាតិទៀតផង។
តាមការឱ្យដឹងពីគណៈប្រតិភូដឹកនាំការប្រកួត ជ័យជម្នះដ៏ធេងដែលកីឡាករ កីឡាការិនី ជម្រើសជាតិជនពិការកម្ពុជាដណ្ដើមបានមកនេះមិនមែនជារឿងចៃដន្យនោះទេ ពោលគឺការប្រកួតពួកគេមានការសហការគ្នាបានយ៉ាងល្អ ក្នុងការប្រកួតទាំង២ថ្ងៃមកនេះ ទាំងក្រុមបុរសនិងក្រុមនារី ហើយសង្ឃឹមថា ការប្រកួតលើកក្រោយនឹងធ្វើបានកាន់តែល្អ ៕
ចែករំលែកព័តមាននេះ