ពេលនេះ «ចំប៉ីខ្មៅ» នៅក្នុងគុកព្រៃស
- ភ្នំពេញ
រាជធានីភ្នំពេញ ៖ កាលពីសៀលថ្ងៃទី៦ កុម្ភៈ ចំប៉ីខ្មៅ ត្រូវបាននគរបាលខណ្ឌដូនពេញបញ្ជូនខ្លួនទៅកាន់សាលាដំបូងរាជធានីភ្នំពេញ ។ លោក លី សុផាណា…
រាជធានីភ្នំពេញ ៖ កាលពីសៀលថ្ងៃទី៦ កុម្ភៈ ចំប៉ីខ្មៅ ត្រូវបាននគរបាលខណ្ឌដូនពេញបញ្ជូនខ្លួនទៅកាន់
សាលាដំបូងរាជធានីភ្នំពេញ ។ លោក លី សុផាណា ព្រះរាជអាជ្ញារង ក្រោយបានធ្វើការសាកសួរអស់ជាច្រើនម៉ោង ក៏បានធ្វើការចោទប្រកាន់ជនខ្ទើយជាផ្លូវការហើយ ពីបទញុះញង់ឱ្យមានការរើសអើង តាមមាត្រា៤៩៦ នៃក្រមព្រហ្មទណ្ឌ ។ មាត្រា៤៩៦ តម្រូវដាក់ពន្ធនាគារ ចំពោះជនជាប់ចោទពី១ឆ្នាំទៅ៣ឆ្នាំ ។ ក្រោយតំណាងអយ្យការចោទប្រកាន់ ហើយសំណុំរឿងនេះ បានចាត់បញ្ជូនទៅចៅក្រមស៊ើបសួរ គឺលោក ពេជ្រ វេជ្ជធរ ។
នៅល្ងាចថ្ងៃដដែល លោកចៅក្រមបានសម្រេចឃុំខ្លួននាយ«ចំប៉ីខ្មៅ» នៅពន្ធនាគារព្រៃសជាបណ្តោះអាសន្នហើយ ពីបទចោទញុះញង់ឱ្យមានការរើសអើង ។ ស្របពេលគ្នាដែរ លោកព្រះរាជអាជ្ញារងនិងលោកចៅក្រមសាកសួរនាយ «ចំប៉ីខ្មៅ» តាមនីតិវិធីនោះ យុវជនម្នាក់ក្នុងចំណោម៣នាក់ ដែលអះអាងថា ខ្លួនគឺជាអ្នកខោកក្បាលជនខ្ទើយចំប៉ីខ្មៅ បានចេញមុខផ្តល់ការសម្ភាសន៍ឱ្យ TVFB ដោយមានការ Live ផ្ទាល់តែម្តងនៅស្នាក់ការរបស់ខ្លួន ។
គួររំលឹកថា កាលពីវេលាម៉ោង០៨ និង១៥នាទីយប់ថ្ងៃទី៥ កុម្ភៈ សមត្ថកិច្ចនគរបាលខណ្ឌដូនពេញ បានចាប់ឃាត់ខ្លួនវ៉ៃខ្នោះដៃបុរសភេទទី៣ម្នាក់ ជាម្ចាស់អាក់ខោន Facebook ឈ្មោះចំប៉ីខ្មៅ ដោយមានកិច្ចសហការជាមួយនាយកដ្ឋានប្រឆាំងបទល្មើសបច្ចេកវិទ្យា នៃក្រសួងមហាផ្ទៃ ។
លោក ទៀង ច័ន្ទសារ អធិការនគរបាលខណ្ឌដូនពេញ បានបញ្ជាក់ប្រាប់ថា ក្រោយពីមានការចង្អុលបង្ហាញអំពីសំណាក់លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ និងលោកឧត្តមសេនីយ៍ឯក ស ថេត ស្នងការនគរបាលរាជធានីភ្នំពេញនោះ កម្លាំងរបស់លោកបានធ្វើការស្រាវជ្រាវរកចាប់ខ្លួនយុវជនខ្ទើយមុខសេះម្នាក់មានឈ្មោះ យិន ហេង អាយុ២៣ឆ្នាំ ។
បន្ទាប់ពីបុគ្គលរូបនេះបានជេរប្រមាថដល់ពូជសាសន៍ខ្មែរកប់ៗមាត់ នៅមុខព្រះបរមរាជវាំង ហើយបានបង្ហោះតាមអាក់ខោនហ្វេសប៊ុករហស្សនាមចំប៉ីខ្មៅរបស់ខ្លួន ។ ការចាប់ឃាត់បុរសភេទទី៣ម្នាក់នេះដែរ បានធ្វើឡើងនៅក្នុងហាងកាហ្វេ Amazon មានទីតាំងនៅវិថីព្រះស៊ីសុវត្ថិ កែងផ្លូវលេខ១៨៤ ក្នុងសង្កាត់ជ័យជំនះ ខណ្ឌដូនពេញ ។
បុរសជាភេទទី៣ខុសគេឈ្មោះ យិន ហេង ជាម្ចាស់អាក់ខោន facebook ចំប៉ីខ្មៅ ខាងលើនេះ បានបង្កឱ្យមានរលកកំហឹងដ៏រំជួលមួយនៅថ្ងៃទី៥ កុម្ភៈ បន្ទាប់ពីគាត់បង្ហោះវីដេអូឃ្លីបក្នុង page Facebook របស់ខ្លួនដែលមានអាការៈ ខឹងយ៉ាងខ្លាំងទៅដល់ជនមិនស្គាល់មុខ ៣នាក់បានខោកក្បាលគាត់បណ្តាលឱ្យពក ។ ក្នុងពេលនោះ គាត់បានជេរប្រមាថយ៉ាងខ្លាំងទៅលើជនទាំង៣នាក់នោះ និងបានដៀលប្រមាថធ្ងន់ៗមកលើពូជសាសន៍ខ្មែរ ។
ការប្រមាថនោះមានលក្ខណៈធ្ងន់ធ្ងរបំផុត ដែលខ្មែរគ្រប់រូបមិនដែលជួបប្រទះនិងទទួលយកមិនបាន ដោយចាត់ទុកថា បានធ្វើឱ្យប៉ះពាល់ដល់ជាតិសាសន៍ខ្មែរយ៉ាងខ្លាំង ហើយក៏ធ្វើឱ្យមនុស្សជាច្រើនខឹងសម្បា ទៅដល់រូបគាត់ក្នុងការជេរប្រមាថដៀលពូជសាសន៍ខ្មែរច្រំដែលៗនេះដោយគ្រប់គ្នាប្រកាសអំពាវនាវឱ្យមានការចាប់ខ្លួនជនអគតិរូបនេះ ។
លោកឧត្តមសេនីយ៍ឯក ជា ពៅ ប្រធាននាយកដ្ឋាននគរបាលប្រឆាំងបទល្មើសបច្ចេកវិទ្យានៃក្រសួងមហាផ្ទៃបានប្រាប់ឲ្យដឹងនាយប់ថ្ងៃទី៥ កុម្ភៈថា ការចាប់ខ្លួនយុវជនភេទទី៣រូបនេះ ក្រោមការបញ្ជាផ្ទាល់ពីសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងនាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ និងលោកឧត្តមសេនីយ៍ឯក ស ថេត ស្នងការនគរបាលរាជធានីភ្នំពេញ ។
លោកឧត្តមសេនីយ៍ប្រធាននាយកដ្ឋាន បានបញ្ជាក់ទៀតថា ក្រោយទទួលបានបទបញ្ជា កម្លាំងនគរបាលជំនាញបានសហការគ្នាស្រាវជ្រាវ និងឈានដល់ការឃាត់ខ្លួនជាក់ស្ដែង យុវជនឈ្មោះ យិន ហេង ដែលមានរហស្សនាម «ចំប៉ីខ្មៅ» ទាំងយប់អត់រត់រួចទេ ។
ក្រោយឃាត់ខ្លួនជនរូបនេះត្រូវបានកម្លាំងនាយកដ្ឋាន ប្រគល់ជូនកម្លាំងជំនាញនៃស្នងការដ្ឋាននគរបាលរាជធានីភ្នំពេញ ដែលជាម្ចាស់ករណី ដើម្បីបន្ដសួរនាំ និងចាត់ការនីតិវិធីច្បាប់ជាធរមាន នូវអ្វីដែលបានប្រព្រឹត្តិ ។ ជាការកត់សម្គាល់ ក្រោយពេលឃាត់ខ្លួនជនរូបនេះ គេក៏បានសង្កេតឃើញវត្តមានលោក ហ៊ុន ជា ដែលជាក្មួយប្រុសសម្តេចតេជោ ដែលលោកថា ក្នុងនាមជាពលរដ្ឋខ្មែរម្នាក់ លោកចង់សួរដល់យុវជនរូបនេះ២-៣សំណួរទៅនឹងអ្វីដែលគាត់បានជេរប្រមាថដល់ពូជសាសន៍ខ្មែរធ្វើឱ្យប៉ះពាល់ធ្ងន់ធ្ងរបំផុតនេះ ។ លោក ហ៊ុន ជា បានមានប្រតិកម្មភ្លាមៗ ជាមួយពលរដ្ឋខ្មែរឯទៀត ដោយលោកបានអំពាវនាវឱ្យចាប់ខ្លួនជនរូបនេះនិងផ្តន្ទាទោសឱ្យខាងតែបាន ។
ដើមបណ្តឹងម្នាក់បានដាក់ពាក្យប្តឹងឈ្មោះ ចំប៉ីខ្មៅ ដែលបាន ជេរប្រមាថពូជសាសន៍ខ្មែរគឺលោក ហ៊ាន គឹមស្រឿន អ្នកវិភាគនយោបាយនិងឃ្លាំមើលសង្គម ដែលពាក្យបណ្តឹងនោះបានដាក់ចូលសាលាដំបូងរាជធានីភ្នំពេញកាលពីថ្ងៃទី៥ កុម្ភៈ បន្ទាប់ពីឈ្មោះចំប៉ីខ្មៅនេះបានជេរដៀលពូជសាសន៍ខ្មែរទូទៅ ខណៈពេលដែលជនមិនស្គាល់មុខ បានខោកក្បាលខ្លួនពកកាលពីយប់ថ្ងៃទី៤ កុម្ភៈ ។
យោងតាមពាក្យបណ្តឹងដាក់ចូលព្រះរាជអាជ្ញាអមសាលាដំបូងរាជធានីភ្នំពេញបានចាត់ទុកថា ទង្វើរបស់ឈ្មោះ យិន ហេង ហៅចំប៉ីខ្មៅ បានធ្វើការបង្ហោះជាសាធារណៈ ជេរប្រមាថដៀលពូជខ្មែរទូទាំងប្រទេស ក្នុងន័យមើលងាយមើលថោកសម្រាប់ប្រជាជាតិកម្ពុជាទាំងមូល ។
លោក ហ៊ាន គឹមស្រឿន បានទាមទារឱ្យមានការផ្តន្ទាទោសទៅតាមផ្លូវច្បាប់ ។ ជាការកត់សម្គាល់ផងដែរ សម្រាប់ជនភេទទី៣ម្នាក់នេះបានបង្ហោះសារសុំអភ័យទោសជាសាធារណៈផងដែរ នៅព្រឹកថ្ងៃទី៥ កុម្ភៈ បន្ទាប់ពីបានដឹងថា ការជេរប្រមាថរបស់ខ្លួននោះ កំពុងបង្កជារលកបោកបក់យ៉ាងខ្លាំងពីគ្រប់មជ្ឈដ្ឋាន ។
មតិខ្លះនិយាយថា បានសមត្ថកិច្ចចាប់ខ្លួនទុកម្តុំបែបនេះ ចាត់ទុកថាជាឱកាសមួយសម្រាប់ជននេះកែខ្លួននៅកន្លែងកែប្រែ ឬបានជួយសង្គ្រោះជីវិតគាត់ ជាជាងឱ្យជននេះមានសេរីភាពអាចនឹងរងគ្រោះជាយថាហេតុ ដោយសារកំហឹងពលរដ្ឋខ្មែរ ជុំវិញការប្រមាថដាក់ទំនាយ ឱ្យរលាយទឹកដី និងពូជសាសន៍ខ្មែរដែល គ្រាន់តែខឹងអ្នកខោកក្បាលខ្លួន ដែលជារឿងកំប៉ិកកំប៉ុកមួយនោះ មិនគួរណាជេរប្រមាថយ៉ាងថោកទាបបែបនេះឡើយ ។
សម្រាប់ជនភេទទី៣ មានអាក់ខោនចំប៉ីខ្មៅលើបណ្តាញសង្គមនេះ ក៏ធ្លាប់ធ្វើឱ្យមានរលកប្រតិកម្មជាច្រើនកន្លងមកដែរ ហើយអ្វីដែលនៅចាំបាននោះ គឺការប្រមាថដល់ការខិតខំគាំទ្រល្ខោនខោលខ្មែរ ចុះបញ្ជីបេតិកភណ្ឌពិភពលោក បែរជាជននេះថា ល្ខោនខោលនេះជារបស់សៀមទៅវិញ ដែលមជ្ឈដ្ឋានជាច្រើននិយាយថា បើទុកឱ្យគាត់មានសេរីភាព គឺអាចរងគ្រោះដល់ជីវិតថ្ងៃណាមួយមិនខាន ។
ខណៈពេលកំពុងផ្តល់សម្ភាសន៍ជុំវិញការខោកក្បាលដែលធ្វើឱ្យនាយចំប៉ីខ្មៅឆេះដុំជេរប្រមាថដល់ពូជសាសន៍ខ្មែរនោះ ក៏ត្រូវបាននគរបាលខណ្ឌចំការមនមកនាំខ្លួនទៅសាកសួរតែម្តង ។ យុវជនរូបនេះឈ្មោះ ផាន់ សំរុង បាននិយាយថា ការខោកក្បាលនាយចំប៉ីខ្មៅនោះដោយសារតែខ្លួនស្អប់បុគ្គលរូបនេះដូចពលរដ្ឋខ្មែរដ៏ទៃទៀតដែលកំពុងស្អប់ដែរ ។
នៅមិនទាន់ដឹងថា យុវជនរូបនេះប្រឈមនឹងនីតិវិធីបែបណានៅឡើយទេ គិតត្រឹមវេលាម៉ោង៦ល្ងាចថ្ងៃដដែល ។ តាមការស្រាវជ្រាវមួយឈុតនៃប្រវត្តិគ្រួសាររបស់ឈ្មោះ ហេង យិន ហៅចំប៉ីខ្មៅនេះបានឱ្យដឹងថា ជនខ្ទើយរូបនេះមានទីលំនៅសង្កាត់កំពង់ប្រណាក ក្រុងព្រះវិហារ ។ ជននេះ មានឪពុកជាជនជាតិវៀតណាមនិងម្តាយខ្មែរ មានបងប្អូនទាំងអស់៤នាក់ ។ មុខរបររកស៊ីរបស់ក្រុមគ្រួសារនេះគឺលក់បាយ គុយទាវ នៅក្រោយមន្ទីរទេសចរណ៍ខេត្ត ។ ចំពោះប្រវត្តិនាយខ្ទើយចំប៉ីខ្មៅនេះ កោះសន្តិភាពនឹងផ្សាយជូននៅលេខបន្ទាប់ទៀត ៕
ចែករំលែកព័តមាននេះ