រាជធានីភ្នំពេញ ៖ មនុស្សប្រើល្បិចខិលខូចមួយក្រុមមានចំនួន៧នាក់ បានត្រូវនគរបាលនាយកដ្ឋានប្រឆាំងបទល្មើសបច្ចេកវិទ្យា ក្រសួងមហាផ្ទៃ ឃាត់ខ្លួនកសាងសំណុំរឿងត្រៀមបញ្ជូនទៅកាន់សាលាដំបូងរាជធានីភ្នំពេញ ពាក់ព័ន្ធនឹងករណីឆបោកប្រាក់តាមសារអេឡិចត្រូនិក(អីុមែល) ទាក់ទងទៅជនរងគ្រោះ ។ មនុស្ស៧នាក់នោះ មានស្ត្រីខ្មែរ២នាក់ បុរសជនជាតិនីហ្សេរីយ៉ា៣នាក់ និងប៉ាគីស្ថាន២នាក់ ដែលពួកគេត្រូវបានសមត្ថកិច្ចស្រាវជ្រាវ និងចាប់ខ្លួនជាបន្តបន្ទាប់តាំងពីថ្ងៃទី២ ខែកុម្ភៈ មក ។
តាមខ្លឹមសារ ដែលសមត្ថកិច្ចបង្ហោះជាសាធារណៈលើសង្គមហ្វេសប៊ុកបានបញ្ជាក់ពីសកម្មភាពរបស់ជនសង្ស័យមួយក្រុមនេះឲ្យដឹងថា ជនសង្ស័យបានលេងល្បិចប្រើប្រាស់អីុមែលផ្ញើសារទៅរកជនរងគ្រោះនៅក្នុងស្រុកខ្មែរដោយប្រាប់ថា ពួកគេកំពុងមានជំងឺជាទម្ងន់ ហើយមានមរតកយ៉ាងច្រើន និងត្រូវការប្រគល់ឲ្យអ្នកណាដែលគួរទុកចិត្ត ។ ប៉ុន្តែតម្រូវឲ្យជនដែលចង់បាន ត្រូវផ្ញើប្រាក់មួយចំនួនឲ្យគេជាមុនសិន ដើម្បីរៀបចំឯកសារផ្ទេរមរតកនោះប្រគល់ឱ្យ ។
ក្រោមការស្រាវជ្រាវយ៉ាងយកចិត្តដាក់លើបទល្មើសតាមបច្ចេកវិទ្យា ជាល្បិចដ៏ចាស់គំរិលនេះ ជនសង្ស័យបានធ្លាក់ចូលអន្ទាក់របស់សមត្ថកិច្ច និងត្រូវបានឃាត់ខ្លួនជាក្រុម យោងតាមពាក្យបណ្តឹងរបស់ជនរងគ្រោះដែលបានចាញ់បោក ។ ជាមួយនេះ នាយកដ្ឋានប្រឆាំងបទល្មើសបច្ចេកវិទ្យា ក៏ធ្លាប់បានធ្វើការផ្សព្វផ្សាយជាច្រើនដងហើយ ពាក់ព័ន្ធទៅនឹងល្បិចកលដ៏គម្រក់របស់ជនទុច្ចរិតនេះ ដែលសូមឲ្យបងប្អូនប្រជាពលរដ្ឋមានការប្រុងប្រយ័ត្ននូវករណីឆបោកដែលជនល្មើសប្រើប្រាស់វិធីផ្សេងៗដូចជា ឈ្នះរង្វាន់ពីក្រុមហ៊ុន សាច់ញាតិជួបគ្រោះថ្នាក់ចរាចរណ៍ ដើម្បីឲ្យជនរងគ្រោះផ្ញើប្រាក់ឲ្យពួកគេ ។
មកដល់ថ្ងៃទី៥ ខែកុម្ភៈ ជនសង្ស័យទាំង៧នាក់នោះ សមត្តកិច្ចនៅមិនទាន់បញ្ជូនទៅសាលាដំបូងទេ ដែលទំនងនៅបន្តនីតិវិធី ។ បើគេនៅចាំមិនទាន់ភ្លេចទេនោះ ស្ត្រីម្នាក់ដែលប៉ងលោតទឹកសម្លាប់ខ្លួនពីលើស្ពានជ្រោយចង្វាប៉ុន្មានថ្ងៃមុននេះ ព្រោះតែចាញ់បោកគេជិត២០មុឺនដុល្លារ ក៏មិនខុសគ្នានោះទេគឺជារឿងផ្ទេរប្រាក់ឱ្យទៅគេដើម្បីរត់ការទទួលយកមរតកខ្មោចស្អីគេនោះ ។
អ្វីដែលទប់ទល់ការបោកប្រាស់គឺត្រូវយល់ថា គ្មានលុយមហាសាលឯណាធ្លាក់ពីលើមេឃមកឡើយ មានន័យថា គ្មានប្រាក់ឯណារាប់លានត្រូវគេយកមកឲ្យអ្នកដទៃងាយៗនោះទេ មានតែរឿងបោក ។
ចែករំលែកព័តមាននេះ