រាជធានីភ្នំពេញ ៖ កាលពី៣ឆ្នាំមុនកីឡាករ កៀន ធារ៉ា ធ្លាប់បានអង្រួនវិស័យប្រដាល់ឱ្យរញ្ជួយគួរឱ្យកត់សម្គាល់ម្ដងហើយ ប៉ុន្តែដោយសារតែមានបញ្ហាជីវភាពរូបលោកក៏សម្រេចចិត្តបាត់មុខ ដោយគេនឹកស្មានថា លោកបានបោះបង់ការប្រដាល់ទៅហើយ។ អីិុចឹងហើយទើបការបង្ហាញខ្លួនកាលពីថ្ងៃទី២…
រាជធានីភ្នំពេញ ៖ កាលពី៣ឆ្នាំមុនកីឡាករ កៀន ធារ៉ា ធ្លាប់បានអង្រួនវិស័យប្រដាល់ឱ្យរញ្ជួយគួរឱ្យកត់សម្គាល់ម្ដងហើយ ប៉ុន្តែដោយសារតែមានបញ្ហាជីវភាពរូបលោកក៏សម្រេចចិត្តបាត់មុខ ដោយគេនឹកស្មានថា លោកបានបោះបង់ការប្រដាល់ទៅហើយ។
អីិុចឹងហើយទើបការបង្ហាញខ្លួនកាលពីថ្ងៃទី២ ខែកុម្ភៈ ឆ្នាំ២០១៩ នៅលើសង្វៀនទូរទស្សន៍ប៉ុស្តិ៍លេខ៥ បានធ្វើឱ្យម្នាក់ៗចាប់អារម្មណ៍ចំពោះកីឡាកររូបនេះ បើទោះជាឡើងប្រកួតបានត្រឹមតែ២ទឹក ព្រោះតែការបរាជ័យរបស់លោកត្រូវបានលាតត្រដាងថា ដោយសារតែលោកសម្ងំធ្វើជាព្រូឡានយ៉ាងកម្សត់អស់៣ឆ្នាំ ទើបធ្វើឱ្យដៃជើង និងក្បាច់គុនចុះខ្សោយ។
ការប្រកួតដែលបានធ្វើឡើងនោះ មិនមែនជាការប្រកួតជម្រុះជើងឯកដូចសព្វដងនោះទេ ដោយសារតែទើបតែជ្រើសបានកីឡាករ៤រូបឱ្យឡើងប្រកួតយកលេខ១ លេខ២ លេខ៣ និងលេខ៤ ហើយតម្រូវឱ្យបេក្ខភាពទាំង៤រូបសម្រាកមួយសប្ដាហ៍ ដើម្បីសន្សំកម្លាំងឱ្យបានល្អសម្រាប់ការប្រកួត១ភាគ៤នៅសប្ដាហ៍ក្រោយ។
បង្គោលក្រហម កៀន ធារ៉ា ដែលគេបានស្គាល់កាលពី៣ឆ្នាំមុន ត្រូវបានគេផ្គូរផ្គងឱ្យប្រកួតមិត្តភាពជាមួយកីឡាករបង្គោលខៀវ ឆោម ប៊ុនឡុង គឺជាគូមិត្តភាពដែលមានអ្នកចាប់អារម្មណ៍ជាងគេ ជាពិសេសក្នុងពេលដែលលោកបានសារភាពថា ហេតុផលដែលលោកបាត់មុខពីការប្រដាល់អស់៣ឆ្នាំ ដោយសារតែលោកជាប់ធ្វើជាព្រូឡានដើម្បីជីវិត។
លោកនៅតែអះអាងថា នៅតែធ្វើជាព្រូឡាន ដោយគ្រាន់តែក្នុងពេលនេះលោកបានការងារថ្មីគឺជាអ្នកធ្វើការក្នុងឃ្លាំងឥវ៉ាន់មួយនៅម្ដុំបឹងទំពុន ទើបលោកមានពេលហ្វឹកហាត់ហើយសម្រេចចិត្តចូលប្រកួតជាថ្មី។ ការត្រឡប់លើកនេះលោកថា នឹងប្រកួតឱ្យបានជាប់លាប់ និងត្រូវតែកសាងកេរ្តិ៍ឈ្មោះឱ្យបានល្អជាងមុន បើទោះជាដៃជើងរបស់លោកនៅមិនទាន់បានរស់ឡើងវិញក៏ដោយ។ លោកទើបតែឡើងរេញបាន២ដង សរុបទាំងការបង្ហាញខ្លួននៅប៉ុស្ដិ៍លេខ៥ កាលពីថ្ងៃទី២ កុម្ភៈនោះប៉ុណ្ណោះ បន្ទាប់ពីត្រូវបានសង្វៀនទូរទស្សន៍អាស៊ីអាគ្នេយ៍ផ្គូរផ្គងឱ្យប្រកួតបើកឆាក។
អីិុចឹងហើយទើបលទ្ធផលបរាជ័យរបស់លោកក្នុងទឹកទី២ ក្រោមដៃកីឡាករបង្គោល ខៀវ ឆោម ប៊ុនឡុង ដែលមានប្រវត្តិប្រកួតជាង៣០លើក មិនត្រូវបានគេបន្ទោសនោះទេ នៅក្នុងកាលៈទេសៈដែលគេដឹងគ្រប់គ្នាថា កីឡាករគឺទោះជាខ្លាំងប៉ុណ្ណោះ ឱ្យតែខកខានប្រកួតយូរគឺមិនខុសពីកីឡាករថ្មីច្រើង។ ការប្រកួតនៅក្នុងថ្ងៃនោះ គេឃើញលោកប្រឹងប្រែងបញ្ចេញសមត្ថភាពយ៉ាងអស់ពីសមត្ថភាព ប៉ុន្តែលទ្ធផលបានត្រឹមតែទៅមិនរួចជាមួយកីឡាករ ឆោម ប៊ុនឡុង។
លោក សេង កដិកា និយាយថា ៣ឆ្នាំមុន កៀន ធារ៉ា មិនមែនបែបហ្នឹងនោះទេ ដោយលោកថ្លែងថា គេត្រូវការការប្រកួតយ៉ាងហោចបួនដប់ដងទៀត ទើបកម្លាំង និងបច្ចេកទេសដែលធ្លាប់ប្រកួតល្អត្រលប់មកវិញ។ លោកប្រកាសបន្តផ្ដល់ឱកាសឱ្យកីឡាករ កៀន ធារ៉ា ឡើងរេញឱ្យបានញឹកញាប់ ដើម្បីជួយឱ្យកីឡាកររូបនេះមានកេរ្តិ៍ឈ្មោះបោះសំឡេងជាថ្មី ក្នុងពេលដែលគេប្រកាសតាំងចិត្តចង់ចាប់អាជីពប្រដាល់ជាថ្មីនោះ។
កីឡាករ កៀន ធារ៉ា និយាយថា លោកសម្រេចចិត្តត្រលប់ចូលប្រដាល់ បន្ទាប់ពីទើបតែរកការងារបានធ្វើជាអ្នកបម្រើការក្នុងឃ្លាំងមួយនៅម្ដុំបឹងទំពុន ដែលលោកយល់ថា មានពេលហ្វឹកហាត់បានល្អជាងកាលដែលលោកនៅធ្វើជាព្រូឡានយ៉ាងលំបាក។ យ៉ាងណាមិញ លោកថាមុនពេលសម្រេចចិត្តបោះបង់ការប្រកួតនៅក្នុងព្រឹត្តិការណ៍ TV5 Boxing Out Series By K-Cement នេះ រូបលោកក៍ប្រឹងប្រកួតអស់ពីសមត្ថភាពនោះដែរ៕
ចែករំលែកព័តមាននេះ