ខេត្តឧត្តរមានជ័យ ៖ អ្នកទោសខ្មែរ២នាក់ ត្រូវបានក្រុមអាជ្ញាធរថៃធ្វើការដោះលេងឱ្យមានសេរីភាពវិញជាបន្តបន្ទាប់ តែរយៈពេល២ថ្ងៃដាច់ដោយឡែកពីគ្នា នាំខ្លួនប្រគល់ឱ្យក្រុមអាជ្ញាធរកម្ពុជាតាមមាត់ច្រកទ្វារអន្តរជាតិជាំ ស្ថិតនៅក្នុងភូមិជាំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ ។
អ្នកទោសខ្មែរដែលក្រុមអាជ្ញាធរថៃដោះលេងឈ្មោះ ជា ច្រឹង ភេទប្រុស អាយុ៣០ឆ្នាំ រស់នៅភូមិផ្អាវ ឃុំផ្អាវ ស្រុកត្រពាំងប្រាសាទ ខេត្តឧត្តរមានជ័យ ថៃចាប់ខ្លួនកាលពីថ្ងៃទី៤ ឧសភា២០១៥ ជាប់ពន្ធធានាគាខេត្តស៊ីសាកេត ដោះលេងនៅថ្ងៃទី១ កុម្ភៈ ២០១៩ នឹងម្នាក់ទៀតឈ្មោះ ឃឹម លុន ភេទប្រុស អាយុ២៧ឆ្នាំ រស់នៅភូមិព្រៃពោល ឃុំអណ្ដើក ស្រុករតៈនមណ្ឌល ខេត្តបាត់ដំបង ជាប់គុកនៅខេត្តណាតស្រើន ប្រទេសថៃ ចាប់ខ្លួននៅថ្ងៃទី១៩ កុម្ភៈ២០១៦ ដោះលេងថ្ងៃទី៣១ មករា ២០១៩ ទាំង២នាក់ក្រុមអាជ្ញាធរចោទពីបទឆ្លងដែនខុសច្បាប់ កាប់ឈើក្រញ៉ូងក្នុងទឹកដីថៃ ។
មន្ត្រីដែលបម្រើការងារនៅមាត់ច្រកទ្វារអន្តរជាតិជាំបានឱ្យដឹងថា អ្នកទោសខ្មែរទាំង២នាក់ត្រូវបានក្រុមអាជ្ញាធរថៃបញ្ជូនខ្លួនជាបន្តបន្ទាប់ ក្នុងរយៈពេល២ថ្ងៃ ក្រោយពីបានទទួលទោសពីក្រុមអាជ្ញាធរថៃសមត្ថកិច្ចបានធ្វើការណែនាំ និងធ្វើកិច្ចសន្យាឱ្យឈប់ឆ្លងដែនខុសច្បាប់រួចឱ្យវិលត្រឡប់ទៅស្រុកកំណើតជួបជុំក្រុមគ្រួសារនៅក្នុងថ្ងៃដដែល ៕
ចែករំលែកព័តមាននេះ