នគរបាលរាជធានីភ្នំពេញបំភ្លឺជុំវិញផេកលោកស្រីទ្រី ដាណា បង្ហោះសាររឿងឆែកជាតិអាល់កុល
- ភ្នំពេញ
រាជធានីភ្នំពេញ ៖ បន្ទាប់ពីផេកលោកស្រី ទ្រីដាណា បង្ហោះថា «ការរស់នៅរាល់ថ្ងៃរាងពិបាកណាស់
រាជធានីភ្នំពេញ ៖ បន្ទាប់ពីផេកលោកស្រី ទ្រីដាណា បង្ហោះថា «ការរស់នៅរាល់ថ្ងៃរាងពិបាកណាស់
រាជធានីភ្នំពេញ ៖ បន្ទាប់ពីផេកលោកស្រី ទ្រីដាណា បង្ហោះថា «ការរស់នៅរាល់ថ្ងៃរាងពិបាកណាស់ តាំងពីមកនៅផ្ទះម្តុំសែនសុខនេះ» ពេលយប់ចេញចូលផ្ទះត្រូវបានសមត្ថកិច្ចឆែកជាតិអាល់កុលឡានរបស់គាត់រាល់ពេល ។
ក្រុមការងារព័ត៌មាននិងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ បានធ្វើការបំភ្លឺបកស្រាយជូនសាធារណជនថា អធិការដ្ឋាននគរបាលខណ្ឌសែនសុខ នាវេលាម៉ោង១១យប់ ថ្ងៃទី២៧ ខែមេសា ឆ្នាំ២០២៤ កម្លាំងសមត្ថកិច្ចបានចុះអនុវត្តត្រួតពិនិត្យជាតិស្រវឹង នៅលើកំណាត់ផ្លូវភ្នំពេញ-ហាណូយ ខាងមុខសាលាបឋមសិក្សាភ្នំពេញថ្មី ក្នុងសង្កាត់ភ្នំពេញថ្មី ខណ្ឌសែនសុខ ។ លុះដល់ម៉ោងប្រហែល១២និង៥៣នាទីយប់ ឈានចូលថ្ងៃទី២៨ ខែមេសា ឆ្នាំ២០២៤ កម្លាំងសមត្ថកិច្ចបានឃើញរថយន្ត ១គ្រឿង ពណ៌ស ពាក់ផ្លាកលេខភ្នំពេញ ២BS-២២២២ មានម៉ូតូ ២គ្រឿង តាមពីក្រោយ ធ្វើដំណើរពីខាងត្បូងទៅខាងជើង ។
លុះរថយន្តនោះ ធ្វើដំណើរមកដល់ជិតគោលដៅសមត្ថកិច្ចអនុវត្តការត្រួតពិនិត្យជាតិស្រវឹង កម្លាំងសមត្ថកិច្ចបានធ្វើសញ្ញាឲ្យអ្នកបើកបររថយន្តចូលកន្លែងត្រួតពិនិត្យជាតិស្រវឹង ប៉ុន្តែបែរ
ជារថយន្តនោះមិនបានសហការចូលមកកន្លែងត្រួតពិនិត្យ និងបានបត់ឆ្វេងមិនចូលគោលដៅត្រួតពិនិត្យ ។
ភ្លាមនោះ កម្លាំងសមត្ថកិច្ចសង្ស័យថា រថយន្តនោះបើកគេចវេះក៏បានដេញតាម ហើយកាក់
រថយន្តនោះឲ្យឈប់ និងអញ្ជើញអ្នកបើករថយន្តចូលសហការត្រួតពិនិត្យជាតិស្រវឹង ទើបម្ចាស់រថយន្តព្រមសហការនិងចូលមកកន្លែងត្រួតពិនិត្យ ។ ពេលអ្នកបើករថយន្តដោះម៉ាសចេញ ទើបសមត្ថកិច្ចស្គាល់ថាជាស្វាមីរបស់លោកស្រី ទ្រី ដាណា ហើយគាត់ក៏បានសហការជាមួយសមត្ថកិច្ចដោយរលូនគ្មានការតវ៉ាអ្វីនោះទេ ។
នៅក្នុងការបំភ្លឺបានបញ្ជាក់ថា បន្ទាប់មកក៏បានផ្លុំជាតិអាល់កុល ជាលទ្ធផលគាត់គ្មានផ្ទុកជាតិអាល់កុលក្នុងខ្លួននោះទេ ។ កម្លាំងសមត្ថកិច្ច ក៏បានថ្លែងអំណរគុណម្ចាស់រថយន្តដែលព្រមសហការ និងអនុញ្ញាតឲ្យគាត់បន្តធ្វើដំណើរ ។
តាមរបាយការណ៍របស់អធិការដ្ឋាននគរបាលខណ្ឌសែនសុខ បានឲ្យដឹងទៀតថា ការចុះអនុវត្តពិនិត្យជាតិស្រវឹងតាមផែនការរបស់ស្នងការដ្ឋាននគរបាលរាជធានីភ្នំពេញ គឺសមត្ថកិច្ចខណ្ឌសែនសុខ មិនបានចុះអនុវត្តជារៀងរាល់ថ្ងៃនោះទេ ក្នុង១សប្តាហ៍អនុវត្ត ៤ដង គិតចាប់ពីម៉ោង១១យប់ រហូតដល់ម៉ោង២រំលងអធ្រាត្រ ហើយការចុះអនុវត្តគឺចល័តគោលដៅ ។
នៅគោលដៅខាងមុខសាលាបឋមសិក្សាភ្នំពេញថ្មី កំណាត់ផ្លូវភ្នំពេញ-ហាណូយ គឺមួយអាទិត្យសមត្ថកិច្ចចុះត្រួតពិនិត្យ ២ដងប៉ុណ្ណោះ មិនដូចការលើកឡើងថា ចុះចាប់រាល់ថ្ងៃនោះទេ ។
ដោយឡែក ចាប់តាំងពីសមត្ថកិច្ចខណ្ឌសែនសុខ ចុះអនុវត្តរឹតបន្តឹងត្រួតពិនិត្យជាតិស្រវឹងរហូតមកដល់ពេលនេះ គឺសមត្ថកិច្ចយើងមិនដែលហៅត្រួតពិនិត្យរថយន្តលោកស្រី ទ្រី ដាណា នោះទេ ទើបតែហៅ១លើកនេះតែប៉ុណ្ណោះ កាលពីយប់មិញ នៅគោលដៅខាងលើ គឺស្វាមីគាត់ជាអ្នកបើកបរ ។
ការចុះអនុវត្តរឹតបន្តឹងត្រួតពិនិត្យជាតិស្រវឹងគឺកម្លាំងសមត្ថកិច្ច អនុវត្តតាមបទបញ្ជាដ៏ខ្ពង់ខ្ពស់របស់ប្រមុខរាជរដ្ឋាភិបាលកម្ពុជា គឺសំដៅឲ្យប្រជាពលរដ្ឋចូលរួមគោរពច្បាប់ចរាចរណ៍ផ្លូវគោក ដើម្បីកាត់បន្ថយអត្រាគ្រោះថ្នាក់ចរាចរណ៍និងការពារអាយុជីវិត ទ្រព្យសម្បត្តិរបស់ប្រជាពលរដ្ឋ ។ ម្យ៉ាងវិញទៀត ការចុះអនុវត្តត្រួតពិនិត្យជាតិស្រវឹងនៅពេលយប់ បើយោងតាមរបាយការណ៍របស់ស្នងការដ្ឋាននគរបាលរាជធានីភ្នំពេញបង្ហាញថា មានប្រជាពលរដ្ឋភាគច្រើនចូលរួមគោរពច្បាប់ចរាចរណ៍ ជាពិសេសសង្កេតឃើញបទល្មើសចរាចរណ៍បានថយចុះផងដែរ ។
តាមផេកលោកស្រី ទ្រី ដាណា «ទ្រីដាណា Dana Try» បានបង្ហោះថា ការរស់នៅរាល់ថ្ងៃរាងពិបាកណាស់ តាំងពីមកនៅផ្ទះម្តុំសែនសុខនេះ ផលលំបាករបស់ខ្ញុំគឺនៅពេលយប់តែម្ដង ចំពេលដែលគេឆែកជាតិអាល់កុលគឺជារៀងរាល់ពេលគឺឡានខ្ញុំត្រូវតែចូលឆែកគ្រប់ពេល មិនថាឈឺថ្កាត់យប់ព្រលប់មកពីមន្ទីរពេទ្យឬក៏មកពីផ្ទះខ្ញុំនៅហាងពេជ្រ ឬក៏មកពីធ្វើការអី គឺត្រូវតែចូលពិនិត្យជាតិអាល់ល់កុលគ្រប់ពេល ។ ខ្ញុំរស់នៅផ្លូវច្រកចូលផ្ទះខ្ញុំជារៀងរាល់ពេល មនុស្សខ្ញុំ គោរពច្បាប់ណាស់ ខ្ញុំមិនដែលបំពានម្តងណាទេ ហៅខ្ញុំចូលពេលណាក៏ខ្ញុំចូលដែរ ខ្ញុំសហការជានិច្ច ។ តែម្តងនេះមិនដឹងជាយ៉ាងម៉េច មានចេតនាឬយ៉ាងណា ? ម្តងនេះ ដំបូងហៅចូល ប្តីខ្ញុំក៏បើករថយន្តចូល ស្រាប់តែឱ្យចេញវិញ រួចក៏នាំគ្នារត់មកព័ទ្ធឡានរបស់ខ្ញុំហើយថតព្រោងព្រាត ដូចខ្ញុំជាជនល្មើស គ្រប់ពេលខ្ញុំសហការគ្រប់ពេលតែម្តងហ្នឹងម៉េចអុីចឹង ?
ខ្ញុំភ័យណាស់ ឱ្យតែយ៉ាងៗនេះ ខ្ញុំប្រាកដជាអាយុខ្លីមិនខាន ទើបចេញពីពេទ្យមកផង ។ ខ្ញុំចង់តែលក់ផ្ទះចោល លែងចង់រស់នៅទីនោះទៀតហើយ ព្រោះការងាររបស់ខ្ញុំស្ទើរររៀងរាល់ថ្ងៃត្រូវធ្វើដំណើរឆ្លងកាត់ ការធ្វើដំណើរពីផ្ទះនៅព្រែកព្នៅមកសែនសុខ ។ ពេលខ្លះត្រូវចុះផ្លុំជាតិអាល់កុលគ្រប់ពេល ហើយចំពេលដូចករណីនេះខ្ញុំប្រាកដជាអាយុខ្លីហើយខ្ញុំភ័យណាស់ ខ្ញុំលែងចង់រស់នៅទីហ្នឹងទៀតហើយនិយាយមែន ព្រោះគេដាក់ចំផ្លូវចូលផ្ទះខ្ញុំតែម្តង ព្រោះគួរឱ្យខ្លាចខ្លាំងណាស់ ៕
ចែករំលែកព័តមាននេះ