រាជធានីភ្នំពេញ ៖ សិក្ខាសាលាស្តីពីរបួសក្បាលជង្គង់-កជើងក្នុងពេលលេងកីឡា និងវិធីការពារដែលបានរៀបចំឡើងកាលពីថ្ងៃទី៧ សីហា នៅគណៈកម្មាធិការជាតិអូឡាំពិកកម្ពុជាដោយមានសិក្ខាកាមដែលសុទ្ធសឹងជាគ្រូពេទ្យកីឡា គ្រូបង្វឹក និងគ្រូជំនួយមកពីសហព័ន្ធចំនួន៥២រូបចូលរួមនោះ មកដល់ល្ងាចថ្ងៃទី៨ សីហា បានបញ្ចប់ដោយជោគជ័យ ។ លោក Joreg Teichmann ជាវេជ្ជបណ្ឌិតជនជាតិអាល្លឺម៉ង់ធ្វើការនៅវិទ្យាស្ថានជាតិកីឡានៃប្រទេសម៉ាឡេស៊ីបានថ្លែងអំណរគុណដល់សិក្ខាកាមទាំងអស់ដែលបានចូលរួមក្នុងវគ្គសិក្សានេះ ។
លោកបន្តថា សម្រាប់វគ្គនេះយ៉ាងហោចក៏ត្រូវការរយៈពេលសិក្សាពីមួយសប្តាហ៍ទៅ១០ថ្ងៃដែរទើបគ្រប់គ្រាន់ តែដោយសារពេលវេលាតិចលោកជឿថា សិក្ខាកាមទាំងអស់ទទួលបានច្រើនបំផុតតឹ្រឹមតែ២០ភាគរយនូវអ្វីដែលលោកផ្តល់ឱ្យប៉ុណ្ណោះ ។ លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC)បានថ្លែងឱ្យដឹងថា មណ្ឌលវេជ្ជសាស្ត្រនិងវិទ្យាសាស្ត្រកីឡាដើរតួនាទីសំខាន់ណាស់ ក្នុងការស្រាវជ្រាវស្វែងរកលក្ខណៈវិទ្យាសាស្ត្រក្នុងការថែរក្សាសុខភាពកីឡាករ-កីឡាការិនី ពិសេសកីឡាកម្រិតខ្ពស់ក្រោយពីការហ្វឹកហាត់នោះ ។ លោកបន្តថា ជាគ្រូបង្វឹកម្នាក់បើមិនយល់ ឬមិនចេះខ្លះៗពីវិធីសង្គ្រោះបឋមទេ នោះវាប៉ះទង្គិចខ្លាំងណាស់ដល់ចិត្តសាស្ត្រអត្តពលិក ហើយក្រុមគ្រួសាររបស់ពួកគេក៏មិនហា៊នឱ្យកូនរបស់គេមកហាត់ជាមួយយើងដែរ ។ អត្តពលិកគេសប្បាយចិត្តគេហ៊ានបញ្ចេញកម្លាំងប្រកួតដោយមិនខ្លាចគ្រោះថ្នាក់ឡើយ បើគេដឹងថាគ្រូបង្វឹករបស់គេចេះពីវិធីសង្គ្រោះបឋមនោះ ។ ជាចិត្តសាស្ត្រប្រសិនបើកីឡាករ-កីឡាការិនីរងរបួសសូមកុំទុកពួកគេចោលឱ្យនៅក្រៅក្រុមវាមិនជាការល្អទេ គឺត្រូវឱ្យគេនៅក្នុងក្រុមដដែលហើយហាត់ទៅតាមលទ្ធភាពដែលគេអាចធ្វើបាន នោះគេនឹងមានភាពកក់ក្តៅជាមួយយើង ហើយមានអារម្មណ៍ចង់ហាត់ជាមួយយើងបន្តទៀត ។ លោកបញ្ជាក់ថានេះគ្រាន់តែជាវគ្គខ្លីនិងជាផ្នែកមួយប៉ុណ្ណោះ នៅសល់មុខវិជ្ជាច្រើនទៀតដែលយើងត្រូវសិក្សា តែដោយសារពេលវេលាខ្លីដូច្នេះទើបយើងសម្រេចយកត្រឹមនេះ ហើយយើងនឹងបង្កើតឱ្យមានវគ្គនេះបន្តនៅឆ្នាំក្រោយទៀត ដោយរៀបចំឱ្យបានរយៈពេល១សប្តាហ៍ទៅ១០ថ្ងៃ ។
សូមបញ្ជាក់ថា សិក្ខាសាលានេះបានសិក្សាទៅលើវិធីធ្វើលំហាត់ប្រាណ វិធីកម្តៅសាច់ដុំមុនពេលប្រកួតដើម្បីកុំឱ្យអត្តពលិកមានរបួស រហែកសាច់ដុំ ឬរលាកសាច់ដុំ នៅពេលកំពុងប្រកួត ។ ជាមួយគ្នានេះលោកJoerg Teichmann ក៏បង្ហាញពីបទពិសោធន៍របស់លោកក្នុងការសង្គ្រោះដល់អត្តពលិកដែលមានបញ្ហាសាច់ដុំនៅមុនពេល-កំពុង និងក្រោយពេលប្រកួតផងដែរ ៕
ចែករំលែកព័តមាននេះ