រាជធានីភ្នំពេញ ៖ ក្លិបបាល់ទាត់ Paris FCបានត្រឡប់មកកាន់លីគកំពូល(Ligue1) បារាំងជាផ្លូវការក្នុងនាមជាក្រុមចំណាត់ថ្នាក់ទី២នៃLigue2បារាំងបន្ទាប់ពីបាត់មុខអស់រយៈពេល៤៦ឆ្នាំ ។ Lorient ជាក្រុមជើងឯកដែលបានរួមដំណើរមកលីគកំពូលបារាំងរដូវកាលក្រោយជាមួយគ្នា ។…
រាជធានីភ្នំពេញ ៖ ក្លិបបាល់ទាត់ Paris FCបានត្រឡប់មកកាន់លីគកំពូល(Ligue1) បារាំងជាផ្លូវការក្នុងនាមជាក្រុមចំណាត់ថ្នាក់ទី២នៃLigue2បារាំងបន្ទាប់ពីបាត់មុខអស់រយៈពេល៤៦ឆ្នាំ ។ Lorient ជាក្រុមជើងឯកដែលបានរួមដំណើរមកលីគកំពូលបារាំងរដូវកាលក្រោយជាមួយគ្នា ។ អ្វីដែលគេចាប់អារម្មណ៍នោះគឺ វីរៈបុរសបាល់ទាត់ខ្មែរ ប៉ែន ផាត ក៏ធ្លាប់ប្រកបអាជីពនៅក្លិបនេះដែរកាលពីទសវត្សឆ្នាំ១៩៧០(១៩៧៨-១៩៧៩)ក្រោយផ្លាស់ចេញពីក្លិប Montpelier។
លោក ប៉ែន ផាត ជាវីរបុរសបាល់ទាត់ជាតិកម្ពុជាមួយរូប ក្នុងចំណោមកីឡាករបាល់ទាត់ខ្មែរទាំងឡាយកាលពីជំនាន់ទសវត្សរ៍៦០និង៧០ ។ លោកជាអតីតខ្សែប្រយុទ្ធ និងជាអ្នកបម្រើស្លាបខាងស្ដាំ នៃក្រុមជម្រើសជាតិកម្ពុជា ដែលបានជួយឲ្យក្រុមបាល់ទាត់កម្ពុជាជាប់ចំណាត់ថ្នាក់លេខ៤ នៅក្នុងការប្រកួតពានរង្វាន់ Asian Cup ១៩៧២ ។ លោក ប៉ែន ផាត ពាក់អាវលេខ៧ ទាំងនៅក្នុងការប្រកួតក្នុងប្រទេសកម្ពុជា និងក្នុងប្រទេសថៃ បច្ចុប្បន្នលោកនិងគ្រួសាររស់នៅក្នុងប្រទេសបារាំង ។
តើលោក ប៉ែន ផាត មានប្រវត្តិយ៉ាងណា0x017d7តស់មកស្វែងយល់ និងតាមដានទាំងអស់គ្នា ។
លោក ប៉ែន ផាត កើតថ្ងៃទី៥ ខែមេសា ឆ្នាំ១៩៤៨ នៅស្រុកទួលថ្ម ខេត្តកំពង់ចាម លោកមានឪពុកឈ្មោះ ប៉ែន ស៊ាង និងម្តាយឈ្មោះ យឹម សាន ជាកសិកររស់នៅលើទឹកដីខេត្តកំពង់ចាម លោកជាប្អូនពៅដែលមានបងប្រុសបង្កើត៤នាក់ ។ ទោះបីជាឪពុកម្តាយជាកសិករក៏ពិតមែនប៉ុន្តែលោកទាំង២
បានបញ្ជូនកុមារា ប៉ែន ផាត ចូលរៀនថ្នាក់បឋមសិក្សានៅសាលាបឋមសិក្សាទួលថ្ម និងបានផ្លាស់មករៀននៅសាលាគន្ធបុប្ផា ក្នុងកម្រិតថ្នាក់ទី៦ ក្នុងរាជធានីភ្នំពេញ ។ ក្រោយមកទៀតកុមារានេះ បានផ្លាស់ទៅរៀននៅអនុវិទ្យាល័យព្រះយុគន្ធរ ដោយបញ្ចប់ការសិក្សាត្រឹមថ្នាក់ទី៥ប៉ុណ្ណោះ។
ក្នុងវ័យប្រហែល៧ឆ្នាំ ប៉ែន ផាត ស្គាល់បាល់ទាត់តាមរយៈបងប្រុសរបស់ខ្លួន និងចាប់ផ្តើមលេងបាល់កម្សាន្ត ាមួយមិត្តភក្តិនៅសាលាទួលថ្ម នៅឯខេត្តកំពង់ចាម ។ ការលេងរបស់កុមារា ប៉ែត ផាត ជារៀងរាល់ថ្ងៃបានធ្វើឲ្យទស្សនិកជនក៏ដូចជាគ្រូបង្វឹកកីឡាបាល់ទាត់នៅសាលាទួលថ្ម មានការចាប់អារម្មណ៍ហើយរូបគេត្រូវបានជ្រើសរើសឲ្យចូលលេងក្នុងក្រុមបាល់ទាត់ប្រចាំសាលាទួលថ្ម ក្នុងអាយុ១៤ឆ្នាំ។ ក្នុងនាមជាខ្សែប្រយុទ្ធជួរមុខ កីឡាករ ប៉ែន ផាត តែងតែមានវត្តមាននៅក្នុងការប្រកួតបាល់ទាត់ជាលក្ខណៈមិត្តភាពជាមួយក្រុមដទៃទៀតនៅក្នុងខេត្តកំពង់ចាម។ នៅឆ្នាំ១៩៦១ កីឡាករ ប៉ែន ផាត បានចូលលេងឲ្យក្រុមទួលថ្មទល់និងក្រុមជម្រើសជាតិកម្ពុជាដែលដឹកនាំដោយគ្រូបង្វឹកជនជាតិឆែកក្នុងជំនួបមិត្តភាពមួយនេះលើទឹកដីខេត្តកំពង់ចាម។
ពេលលេងជាមួយក្រុមជម្រើសជាតិនោះក្នុងវ័យត្រឹមតែ១៥ឆ្នាំប៉ុណ្ណោះ កីឡាករ ប៉ែន ផាត បានធ្វើឲ្យគ្រូបង្វឹកក្រុមជម្រើសជាតិពេញចិត្តនិងថ្លែងថាជាសមាជិកក្នុងក្រុមជម្រើសជាតិតែម្ដង ដោយសារតែការស៊ុតបាល់ដ៏អស្ចារ្យចូលសំណាញ់ទីក្រុមជម្រើសជាតិនាពេលនោះ ។ ដោយទទួលការពេញចិត្តពីសំណាក់គ្រូបង្វឹកក្រុមជម្រើសជាតិ ប៉ែន ផាត ត្រូវឃ្លាតឆ្ងាយពីគ្រួសារជាទីស្រឡាញ់មករស់នៅក្នុង
ទីក្រុងភ្នំពេញនៅចុងឆ្នាំ១៩៦៣ ដើម្បីបំពេញភារកិច្ចជាកីឡាករបាល់ទាត់វ័យក្មេងដែលលេង
ឲ្យក្រុមបាល់ទាត់ជម្រើសជាតិកម្ពុជា។ នៅពេលបានចូលលេងក្នុងក្រុមជម្រើសជាតិនិងមិនបាន
លេងពេញម៉ោងដោយសារតែអាយុនៅក្មេងនិងមានបទពិសោធលេងនៅតិច ទេពកោសល្យលេងរបស់ ប៉ែន ផាត បានធ្វើឲ្យមានការចាប់អារម្មណ៍យ៉ាងខ្លាំងពីសំណាក់មហាជន និងគ្រូបង្វឹក ។
អ្នកស្នេហាកីឡាបាល់ទាត់កាលពីជំនាន់សង្គមរាស្ត្រនិយម និងដែលបានរស់រានមានជីវិតពីរបបខ្មែរក្រហមសុទ្ធតែបាននិយាយថា វិស័យកីឡាបាល់ទាត់ខ្មែរក្នុងទសវត្សរ៍៦០ពិតជារីកចម្រើនខ្លាំង ហើយក្រុមកីឡាករបាល់ទាត់ខ្មែរពិតជាមានថ្វីជើងពូកែៗដែលធ្លាប់លេងឈ្នះជប៉ុន ប៉ុន្តែប្រកួតចាញ់កូរ៉េខាងជើងនិងចិនត្រឹមមួយទល់និងសូន្យតែប៉ុណ្ណោះ។ ពួកគេរំឭកទៀតថា នៅពេលនោះប្រទេសជប៉ុនមិនមានភាពល្បីល្បាញខាងបាល់ទាត់ដូចខ្មែរឡើយ។
ឆ្នាំ១៩៧២គឺជាឆ្នាំប្រវត្តិសាស្ត្រនៃក្រុមបាល់ទាត់ជម្រើសជាតិកម្ពុជាដែលឆ្លងផុតវគ្គជម្រុះនិងទទួលបានចំណាត់ថ្នាក់លេខ៤ប្រចាំទ្វីបអាស៊ី បន្ទាប់ពីប្រកួតចាញ់ក្រុមកីឡាករថៃដោយគ្រាប់បាល់ប៉េណាំងទី ៣ទល់នឹង៥ ក្រោយពីប្រកួតដោយលទ្ធផលស្មើគ្នាពី២ទល់និង២ត្រឹមរយៈពេល៩០នាទី ។
លោក ប៉ែន ផាត ជាកីឡាករមួយរូបដែលបានស៊ុតប៉េណាំងទីបានសម្រេចខណៈដែលមិត្តរួមក្រុម២នាក់ផ្សេងទៀតស៊ុតបាល់មិនចូលសំណាញ់ទីក្រុមថៃឡើយ ។ ក្រៅពីជួយបាល់ទាត់ជម្រើសជាតិខ្មែរជាប់ចំណាត់ថ្នាក់លេខ៤ក្នុងឆ្នាំ១៩៧២ លោកក៏បានជួយឲ្យក្រុមឈ្នះពាន FA Cup នៅប្រទេសថៃចំនួន២ដងផងដែរ។ ក្រៅពីនេះក្រុមកីឡាករខ្មែរធ្លាប់ឈ្នះក្រុមកីឡាករសិង្ហបុរី៣ទល់នឹង១នៅឆ្នាំ១៩៦៨ និងឈ្នះឥណ្ឌូនេស៊ី២ទល់នឹង០នៅឆ្នាំ១៩៦៩។
នៅចុងឆ្នាំ១៩៧២ ក្រុមកីឡាករបាល់ទាត់ជម្រើសជាតិកម្ពុជាធ្លាប់បានបំបាក់ក្រុមកីឡាករជម្រើសជាតិថៃ៣ទល់នឹង០ក្នុងវគ្គ១/៤ផ្តាច់ព្រ័ត្រនៃការប្រកួតពានរង្វាន់ប្រេស៊ីលដិនខាប់នៅប្រទេសឥណ្ឌូនេស៊ី ។ ជ័យជម្នះនេះនាំឲ្យក្រុមកីឡាករថៃវាយក្រុមកីឡាករខ្មែររហូតដល់របួសធ្ងន់ និងប្រកួតលែងកើត ។ ក្រុមកីឡាករកម្ពុជាបានប្រកួតចាញ់ក្រុមកីឡាករមីយ៉ានម៉ា២ទល់នឹង១ ដោយសារកីឡាករកម្ពុជាសុទ្ធតែរងរបួសមុនការប្រកួតនេះមកដល់ ។
បើតាមលោក ប៉ែន ផាត មុននឹងបរាជ័យក្នុងការប្រកួតខាងលើនោះមីយ៉ានម៉ាត្រូវកីឡាករកម្ពុជាយកឈ្នះមិនតិចដងនោះទេ។
ក្រោយពីទទួលបានជោគជ័យពីលើទីលានលោក ប៉ែន ផាត បានក្លាយជាកីឡាករគោលដៅរបស់ក្លិបបាល់ទាត់នានានៅក្នុងតំបន់និងក្នុងទ្វីបអឺរ៉ុបផងដែរដូចជា ហុងកុង វៀតណាមអុីរ៉ង់ និងអាល្លឺម៉ង់ជាដើម ។ ក្នុងឆ្នាំ១៩៧២ លោកសម្រេចចិត្តចុះកុងត្រាលេងឲ្យក្លិប Raj Pracha FCរបស់ថៃក្រោមហេតុផលថាលោកចង់រស់នៅជិតប្រទេសកម្ពុជានិងគ្រួសាររបស់លោក។
កាលពីជំនាន់នោះ លោក ប៉ែន ផាត បានខិតខំលេងជួយឲ្យក្លិបនេះឈ្នះពានរង្វាន់លីគក្នុងស្រុករបស់ថៃចំនួន២សម័យកាលពីឆ្នាំ១៩៧២និងឆ្នាំ១៩៧៣។ នៅឆ្នាំ១៩៧៤-១៩៧៥ និងឈ្នះពានរង្វាន់ឃ្វីនខាប់ឆ្នាំ១៩៧៣-១៩៧៤ និងឆ្នាំ១៩៧៤-១៩៧៥។ ជាសរុបលោកបានជួយឲ្យក្រុមRaj Pracha FC ឈ្នះពានរង្វាន់ក្នុងស្រុកចំនួន៦ដងក្នុងរយៈពេល៥ឆ្នាំប៉ុណ្ណោះ ។ លោកត្រូវបាននាយកកាសែតដ៏ធំមួយរបស់ថៃប្រសិទ្ធនាមថាជាកីឡាករពស់កេងកងពីព្រោះបច្ចេកទេសរបស់លោកក្នុងការបណ្ដើរបាល់គេចពីកីឡាករជាច្រើននាក់ប្រៀបដូចជាសត្វពស់កំពុងវារយ៉ាងលឿនដូច្នេះដែរ ។
នៅចុងឆ្នាំ១៩៧៧ លោកប៉ែន ផាត បានចាកចេញទៅកាន់ប្រទេសបារាំងតាមបំណងប្រាថ្នាបន្ទាប់ពីបានឈប់បម្រើការនៅក្នុងក្លិបRaj Pracha FC បន្ទាប់ពីបានជួបសន្ទនាគ្នាមួយក្នុងពេលលោកបម្រើការងារជាអ្នកលក់សំបុត្រយន្តហោះជាមួយប្រធានក្លិបបាល់ទាត់មួយនៅគ្រ័រណូក្នុងប្រទេសបារាំង។ បន្ទាប់ពីបានរៀបរាប់អតីតកាលនៃអាជីពក្នុងវ័យ២៩ឆ្នាំលោកត្រូវបានធានាឲ្យមកកាន់ប្រទេសបារាំងនិងបានចូលរួមលេងឲ្យក្លឹបគ្រ័រណូអេសស៊ីអស់រយៈពេល១ឆ្នាំ។ Grenoble FC ជាក្លិបកំពូលនាសម័យនោះរបស់ប្រទេសបារាំងក្រោយមកទៀតលោកបានផ្លាស់ទៅលេងឱ្យក្លិប Montpellier ។
ប៉ុន្តែដោយគ្មានអ្នកគាំទ្រ លោកសម្រេចចិត្តចាកចេញពីក្លិបនេះទៅនៅក្លិប Paris FC ក្នុងកម្រិតឌីវីស្យុង៣រយៈពេល១ឆ្នាំ ។ ដោយសារអាយុរបស់លោកជ្រេបន្តិចទៅហើយ លោកក៏បានសម្រេចចិត្តបញ្ចប់អាជីពនៅត្រឹមក្លិបParis FCតែម្ដង។
លោកប៉ែន ផាត បានរៀបការភរិយានៅឆ្នាំ១៩៧៩ ក្នុងប្រទេសបារាំង ។ ពិធីមង្គលការនេះបានកើតឡើងក្រោយពេលអ្នកទាំងពីរធ្វើការនៅហាងលក់ថ្នាំជាមួយគ្នា ។ អ្នកទាំងពីរមានកូនប្រុសម្នាក់ឈ្មោះ ប៉ែន ស្ទេហ្វិន ។ ស្ទេហ្វិន ធ្លាប់បានបង្ហាញខ្លួននៅក្នុងជម្រើសជាតិកម្ពុជាផងដែរ បច្ចុប្បន្នគេជាវិស្វករដែលកំពុងបម្រើការនៅក្នុងក្រុមហ៊ុនមួយនៅប្រទេសបារាំង។ លោក ប៉ែន ផាត នៅតែជាគ្រូបង្វឹកបាល់ទាត់ និងមិនត្រឹមតែហ្វឹកហាត់កីឡាករបារាំងនោះទេ ប៉ុន្តែលោកក៏បង្ហាត់កីឡាករខ្មែរនៅទីនោះផងដែររហូតដល់បច្ចុប្បន្ននេះ ៕
ចែករំលែកព័តមាននេះ