រាជធានីភ្នំពេញ ៖ ក្រោយស្ថាប័នប្រដាល់ WKN (World Kickboxing Network) ចេញផ្យាយកាលពីពេលថ្មីៗនេះថា ពួកគេបាននិងកំពុងចរចាលើកិច្ចព្រមព្រៀងកម្រិតខ្ពស់ជាមួយភាគីកម្ពុជាជាផ្លូវការ លើការប្រកួតជើងឯកគុនខ្មែរ…
រាជធានីភ្នំពេញ ៖ ក្រោយស្ថាប័នប្រដាល់ WKN (World Kickboxing Network) ចេញផ្យាយកាលពីពេលថ្មីៗនេះថា ពួកគេបាននិងកំពុងចរចាលើកិច្ចព្រមព្រៀងកម្រិតខ្ពស់ជាមួយភាគីកម្ពុជាជាផ្លូវការ លើការប្រកួតជើងឯកគុនខ្មែរ ឬ WKN Kun Khmer ជាលើកដំបូងដែលមិនធ្លាប់មានរួចមក ឯកឧត្តមខូវ ឆាយ ប្រធានសហព័ន្ធកីឡាប្រដាល់គុនខ្មែរ បានចេញមុខបដិសេធនៅលើគណនីហ្វេសប៊ុកផ្លូវការរបស់ខ្លួនថា ក្នុងនាមសហព័ន្ធកីឡាប្រដាល់គុនខ្មែរ ពុំធ្លាប់បានជួបពិភាក្សាពីការសហការណាមួយជាមួយស្ថាប័នWKNនេះឡើយ ។ ហើយសហព័ន្ធកីឡាប្រដាល់គុនខ្មែរពុំទទួលស្គាល់ និងពុំអនុញ្ញាតឱ្យមានការប្រកួតដណ្តើមខ្សែក្រវាត់WKN KunKhmerណាមួយក្នុងទឹកដីព្រះរាជាណាចក្រកម្ពុជា ដោយពុំមានការព្រមព្រៀងជាមួយគ្នាឡើយ។
ដំណឹងស្ដីពីការរៀបចំព្រឹត្តិការណ៍ជើងឯកគុនខ្មែរ ឬ WKN Kun Khmer ជាលើកដំបូងដែលមិនធ្លាប់មាននេះត្រូវបានគេហទំព័រព័ត៌មានកីឡាក្នុងស្រុកមួយចំនួនផ្សព្វផ្សាយបន្តដោយមានដាក់រូបកីឡាករល្បីៗជាមួយសំណេរគាំទ្រខ្លាំងផងដែរ។ ខ្លះសរសេរថា នេះជាការបោះជំហានទៅមុខយ៉ាងសំខាន់សម្រាប់ការអភិវឌ្ឍអន្តរជាតិ និងការទទួលស្គាល់គុនខ្មែរលើឆាកពិភពលោក ។
ខ្លះទៀតបញ្ចេញមតិថា នេះគឺជាទំព័រប្រវត្តិសាស្ត្រថ្មីមួយដើម្បីរុញល្បឿន និងវិសាលភាពគុនខ្មែរកាន់តែទូលំទូលាយទៅកាន់ឆាកអន្តរជាតិ និងបង្ហាញគុនខ្មែរក្នុងទម្រង់ជាលក្ខណៈប្រដាល់ក្បាច់គុនបុរាណខ្មែរ មានប្រវត្តិដ៏សម្បូរបែប និងដើរតួយ៉ាងសំខាន់ក្នុងវប្បធម៌ក្បាច់គុនរបស់ប្រទេសដ៏ចំណាស់មួយនេះ ជាមួយនឹងស្នៀតប្រយុទ្ធរួមមានការប្រើកណ្តាប់ដៃ កែង ជង្គង់ និងទាត់ ព្រមទាំងបច្ចេកទេសនៃស្នៀតប្រយុទ្ធផ្សេងៗទៀតតាមបែបបុរាណខ្មែរ។
គុនខ្មែរ គឺជាពាក្យ២ម៉ាត់ដ៏មានអត្ថន័យ សំដៅទៅលើក្បាច់គុនរបស់ដូនតាខ្មែរ ឬគុនប្រយុទ្ធរបស់ខ្មែរដែលមានតាំងពីសម័យបុរាណមកម្លេ៉ះ និងបានចាក់ឫសកប់យ៉ាងជ្រៅនៅពាសពេញទឹកដីអាស៊ីអាគ្នេយ៍ ខណៈចម្លាក់មានឆ្លាក់ជាប់ផុសលើប្រាង្គប្រាសាទបុរាណខ្មែរ និងមានក្បួនគម្ពីរ សាស្ត្រាជាតឹកតាងស្រាប់ ។
គុនខ្មែរ គឺជាក្បាច់គុនប្រយុទ្ធបុរាណរបស់ខ្មែរ ដែលមានលាយបញ្ចូលយុទ្ធក្រមខម ល្បុក្កតោ ទ្វារប្រាំបី ក្រពើហា និងចំបាប់ជាដើម និងជាក្បួនពិជ័យសង្គ្រាមខ្មែរដែលមានតាំងពីសម័យអង្គរដ៏រុងរឿងមកម្ល៉េះ។
បច្ចុប្បន្ន គុនខ្មែរ កំពុងរីកសាយភាយកេរ្តិ៍ឈ្មោះយ៉ាងសន្សឹមៗទៅកាន់ឆាកអន្តរជាតិ ៕
ចែករំលែកព័តមាននេះ