រាជធានីភ្នំពេញ ៖ កីឡាករប្រដាល់ម្ចាស់មេដាយមាសកីឡាស៊ីហ្គេមលើកទី១៩ប្រទេសម៉ាឡេស៊ី មកពីក្លិបកងរាជអាវុធហត្ថរាជធានីភ្នំពេញ ត្រូវបានគេរៀបចំឱ្យជួបប្រកួតជាមួយកីឡាករថៃឈ្មោះ Fon Luong ក្នុងប្រភេទទម្ងន់៦៣,៥គីឡូក្រាម ខណៈកីឡាករ ប៊ុន…
រាជធានីភ្នំពេញ ៖ កីឡាករប្រដាល់ម្ចាស់មេដាយមាសកីឡាស៊ីហ្គេមលើកទី១៩ប្រទេសម៉ាឡេស៊ី មកពីក្លិបកងរាជអាវុធហត្ថរាជធានីភ្នំពេញ ត្រូវបានគេរៀបចំឱ្យជួបប្រកួតជាមួយកីឡាករថៃឈ្មោះ Fon Luong ក្នុងប្រភេទទម្ងន់៦៣,៥គីឡូក្រាម ខណៈកីឡាករ ប៊ុន សុធា មកពីសមាគមកីឡាប្រដាល់ក្រសួងការពារជាតិជួបប្រកួតជាមួយកីឡាករថៃឈ្មោះ Phit Pet Sean ក្នុងប្រភេទទម្ងន់៥៤គីឡូក្រាម។ ការប្រកួតនេះនឹងប្រព្រឹត្តិនៅថ្ងៃទី០២ ខែកុម្ភៈ ឆ្នាំ២០១៩ ទីតាំងនៅស្ថានីយទូរទស្សន៍ CNC។
សម្រាប់ការប្រកួតលើកនេះ ក្នុងចំណោមអ្នកគាំទ្រភាគច្រើន គេចង់ឃើញការប្រកួតរវាងកីឡាករ ឃុន ឌីម៉ា ជាមួយ Fon Luong ខ្លាំងណាស់ ដោយសារតែគេទាំង២សុទ្ធតែជាកំពូលជើងខ្លាំងមានបទពិសោធន៍ប្រកួតនៅលើសង្វៀនយ៉ាងជោកជាំដូចគ្នា។ ជាពិសេសកីឡាករប្រដាល់គុនខ្មែរ ឃុន ឌីម៉ា តែម្ដង ដែលគេធ្លាប់ដណ្ដើមបានមេដាយមាសពីការប្រកួតកីឡាស៊ីហ្គេមមកជូនជាតិកាលពីប៉ុន្មានឆ្នាំមុន។
ម្យ៉ាងវិញទៀត កីឡាករថៃម្នាក់នេះ ក៏ជាម្ចាស់ខ្សែក្រវាត់ប្រចាំប្រទេសថៃមួយរូបដែរ ហើយអ្វីដែលធ្វើឱ្យមហាជនមិនអាចបំភ្លេចបានទៀតនោះ ឃុន ឌីម៉ា ធ្លាប់ប្រកួតចាញ់ពិន្ទុកីឡាករថៃម្នាក់នេះម្ដងកាលពីប៉ុន្មានសប្ដាហ៍មុន ក្នុងព្រឹត្តិការណ៍ប្រកួតម៉ារ៉ាតុង ប៉ុន្តែកាលណោះទៀតគេប្រកួតចាញ់ពិន្ទុទាំងប្រភិតប្រផើយបំផុត។ ដោយហេតុនេះហើយទើបគណៈកម្មការរៀបចំការប្រកួតប្រចាំសង្វៀនស៊ីអិុនស៊ី បានធ្វើការផ្គូផ្គងឱ្យគេទាំង២បានជួបប្រកួតសងសឹកជាមួយគ្នាម្ដងទៀត ដើម្បីឱ្យ ឃឹម ឌីម៉ា អស់ចិត្ត ចំពោះអ្នកគាំទ្រវិញក៏គេចង់ដឹងថា ឃុន ឌីម៉ាមានឱកាសសងសឹកបានសម្រេចឬអត់?
ចំណែកកីឡាករ ប៊ុន សុធា ដែលមិនសូវលេចមុខនៅលើសង្វៀនជាញឹកញាប់នោះ ពេលនេះត្រូវជួបប្រកួតជាមួយកីឡាករថៃឈ្មោះ Phit Pet Sean។ រវាងគូនេះ មិនធ្លាប់ជួបប្រកួតជាមួយគ្នាពីមុនមកឡើយ ប៉ុន្តែតាមការអះអាងរបស់គណៈកម្មការរៀបចំការប្រកួត កីឡាករថៃម្នាក់នេះ ជាជើងខ្លាំងមួយរូបប្រចាំស្រុកថៃ។ មិនតែប៉ុណ្ណោះក្នុងចំណោមអ្នកប្រដាល់ប្រភេទទម្ងន់ស្រាលដូចគ្នា មិនងាយមានអ្នកណាម្នាក់យកឈ្នះបានស្រួលៗនោះទេ។ តែលើកនេះគេនៅរង់ចាំមើល ប៊ុន សុធា វិញម្ដង ដែលជាអ្នកប្រដាល់ធ្លាប់មានឈ្មោះល្បីពីមុនមកម្នាក់ដែរនោះ ចាំមើលគេអាចយកឈ្នះកីឡាករថៃម្នាក់នេះ ដើម្បីបំពេញបំណងអ្នកគាំទ្របានឬអត់?
ចំណែកកីឡាករ ប៊ុន សុធា គេបានប្រាប់ថា «ខ្ញុំមិនហ៊ាននិយាយទុកមុនបានឡើយ ព្រោះគេក៏ហាត់ យើងក៏ហាត់ តែទោះជាយ៉ាងណា ខ្ញុំត្រូវតែប្រឹងឱ្យអស់ពីលទ្ធភាពមិនបណ្ដោយឱ្យចាញ់ដោយងាយៗនោះទេ»។
រីឯកីឡាករ ថា សារុន មកពីក្លិបពុទ្ធសេរីវង្សពោធិ៍សែនជ័យ ជួបប្រកួតជាមួយកីឡាករចិន ឈ្មោះ Ly Shin ក្នុងប្រភេទទម្ងន់៦០កីឡូក្រាម ខណៈ លីន ស៊ីគួង មកពីក្លិបបូរីរាជសីហ៍មានរិទ្ធិជួបប្រកួតជាមួយកីឡាករ នូវ ស៊ីណាត មកពីក្លិបកងពលតូចពិសេសឆ័ត្រយោង៩១១៕
ចែករំលែកព័តមាននេះ