ខេត្តស្ទឹងត្រែង ៖ មន្ត្រីសហគមន៍ការពារធនធានធម្មជាតិឃុំសំអាង ស្រុកថាឡាបរិវ៉ាត់ខេត្តស្ទឹងត្រែង បានស្វែងរកផ្នែកច្បាប់ដើម្បីការពារសត្វប្រចៀវព្រោះមានជនខិលខូចចាប់យកទៅធ្វើចំណីអាហារបង្កឱ្យបរិមាណប្រចៀវស្ទើរបាត់បង់ទាំងស្រុងក្នុងរយៈពេលតែ៤ខែកន្លងមកនេះ ។ លោកកែវ សុភាព អនុប្រធានសហគមន៍ការពារធនធានធម្មជាតិឲ្យដឹងកាលពីពេល ថ្មីៗកន្លងមកថា…
ខេត្តស្ទឹងត្រែង ៖ មន្ត្រីសហគមន៍ការពារធនធានធម្មជាតិឃុំសំអាង ស្រុកថាឡាបរិវ៉ាត់ខេត្តស្ទឹងត្រែង បានស្វែងរកផ្នែកច្បាប់ដើម្បីការពារសត្វប្រចៀវព្រោះមានជនខិលខូចចាប់យកទៅធ្វើចំណីអាហារបង្កឱ្យបរិមាណប្រចៀវស្ទើរបាត់បង់ទាំងស្រុងក្នុងរយៈពេលតែ៤ខែកន្លងមកនេះ ។
លោកកែវ សុភាព អនុប្រធានសហគមន៍ការពារធនធានធម្មជាតិឲ្យដឹងកាលពីពេល ថ្មីៗកន្លងមកថា សត្វប្រចៀវនៅតំបន់ភ្នំឈ្ងោកមានបរិមាណរាប់រយពាន់លានក្បាល តែក្នុងប៉ុន្មានខែចុងក្រោយនេះជនខិលខូចមួយចំនួនប្រើប្រាស់ឧបករណ៍កែច្នៃ ផ្សេងៗដូចជាមង បន្លាយួន និងដុតផ្សែងបំពុល យកប្រចៀវទៅធ្វើចំណីអាហារហើយខ្លះទៀតយកទៅលក់ដូរក៏មានដែរ ។
ការបាត់បង់សត្វប្រចៀវ វាជាការបាត់បង់សម្បត្តិធម្មជាតិរួមទាំងអស់គ្នា ព្រោះអ្នកស្រុកទទួលបានផល(ជាលាមក) យកធ្វើជី ដាក់ដាំបនែ្ល ហើយមានភ្ញៀវទេសចរទៅទស្សនាជារៀងរាល់ថ្ងែ តែបុគ្គលមួយចំនួនបានទៅចាប់សម្លាប់ផ្តាច់ពូជបង្កឱ្យខាតបង់ផលប្រយោជន៍រួម ។
កញ្ញាជា វណ្ណា អ្នកទេសចរពីអង្គការសេប៉ានៅក្រុងស្ទឹងត្រែងបានទទួលស្គាល់ថា សត្វប្រចៀវបាត់បង់មែន នេះជាសញ្ញាមួយបង្ហាញផលប៉ះពាល់ដល់សក្តានុពលទេសចរណ៍ ព្រោះភ្ញៀវជាតិ និងអន្តរជាតិទៅលេងតែងចង់ឃើញសត្វប្រចៀវដ៏ច្រើនសន្ធឹកសន្ធាប់ ។
កញ្ញាជា វណ្ណា និយាយថា៖ «ភាពបាត់បង់នេះ នៅពេលភ្ញៀវមកមើលមិនឃើញអាចធ្វើឱ្យ ពួកកាត់អាក់អន់ចិត្តលែងមកទៀត ប្រសិនបើជនខិលខូចនៅតែធ្វើសកម្មភាពចាប់សត្វប្រចៀវនេះ ។ បទល្មើសដែលមានប្រជាពលរដ្ឋមួយចំនួនមិនដឹងថាគាត់មកពីភូមិណាទេគាត់អាចធ្វើបទល្មើសចាប់សត្វប្រចៀវមិនដឹងថាយកទៅធ្វើអីទ េតែគ្រាន់តែថាខ្ញុំចូលទៅមើលក្នុងរូងភ្នំនេះមានដូចជាតង់ ដូចជាមង ស្បៃមុងអីចាប់សត្វប្រចៀវ» ។
លោកឈន ឆន អនុប្រធានការិយាល័យផ្នែកអភិរក្សធនធានធម្មជាតិនៃមន្ទីរបរិស្ថានបានអះអាងថាក្រុមការងារបានសហការជាមួយមន្ត្រីសហគមន៍ដកហូតបានសម្ភារមួយចំនួនយកទៅដុតបំផ្លាញចោលរួចមកហើយ ។ មន្ត្រីបរិស្ថាននិងសហគមន៍នឹងរៀបចំបន្តយន្តការបង្ក្រាបបន្ថែមទៀតដើម្បីរក្សារបរិមាណសត្វប្រចៀវដែលនៅសេសសល់នេះឱ្យវាបន្តពូជ កកើតឡើងវិញ ។ «អញ្ចឹងខ្ញុំនឹងរាយការណ៍ជូនប្រធានមន្ទីរបរិស្ថានដើម្បីគាត់រកវិធានការសហការជាមួយស្ថាប័នជំនាញក៏ដូចជាអាជ្ញាធរដើម្បីទប់ស្កាត់ បង្ក្រាបឱ្យគាត់បញ្ឈប់សកម្មភាពបន្តទៀតក្នុងការសម្លាប់ក៏ដូចជាយកសត្វទៅធ្វើជាចំណីអាហាររបស់ខ្លួន »។
សត្វប្រចៀវដែលរស់នៅក្នុងល្អាងភ្នំឈ្ងោកបច្ចុប្បន្នបានបាត់បង់ប្រមាណជាង៨០%។ ចំណែកសហគមន៍មិនមានលទ្ធភាពក្នុងការអភិរក្សទេ បើគ្មានសមត្ថកិច្ចក្នុងមូលដ្ឋានចូលរួមសហការ ហើយករណីនេះអាចធ្វើឱ្យបាត់បង់បរិមាណទាំងស្រុងនៅដើមឆ្នាំ២០១៩នេះ ៕
ចែករំលែកព័តមាននេះ