ខេត្តព្រះសីហនុ ៖ សម្តេចបវរធិបតីហ៊ុន ម៉ាណែត នាយករដ្ឋមន្ត្រីបានឲ្យដឹងថា ពេលនេះ ក្រុមការងារដោះស្រាយបញ្ហាពន្ធជាមួយអាមេរិកបានកំពុងតែរង់ចាំពេលវេលា ដើម្បីជួបចរចាជាមួយភាគីអាមេរិក ។ ថ្លែងក្នុងពិធីសំណេះសំណាល…
ខេត្តព្រះសីហនុ ៖ សម្តេចបវរធិបតីហ៊ុន ម៉ាណែត នាយករដ្ឋមន្ត្រីបានឲ្យដឹងថា ពេលនេះ ក្រុមការងារដោះស្រាយបញ្ហាពន្ធជាមួយអាមេរិកបានកំពុងតែរង់ចាំពេលវេលា ដើម្បីជួបចរចាជាមួយភាគីអាមេរិក ។
ថ្លែងក្នុងពិធីសំណេះសំណាល ជាមួយមន្ត្រីរាជការ បុគ្គលិក កម្មករនិយោជិត បម្រើ ការនិងធ្វើការនៅកំពង់ផែស្វយ័តក្រុងព្រះសីហនុ នាឱកាសអបអរសាទរខួបអនុស្សាវរីយ៍ លើកទី១៣៩ នៃទិវាពលកម្មអន្តរជាតិ ១ ឧសភា ឆ្នាំ២០២៥ នៅខេត្តព្រះសីហនុ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានគូសបញ្ជាក់ថា ទោះបីអ្នកណាថាអ្វីក៏ដោយ ក៏ក្រុមការងារដោះស្រាយបញ្ហារឿងពាណិជ្ជកម្ម បានជួបជាមួយប្រធានក្រុមប្រធានតំណាងពាណិជ្ជកម្មអាមេរិកម្តងហើយ កាលពីថ្ងៃទី១៦ ខែមេសា ឆ្នាំ២០២៥ ថ្ងៃចូលឆ្នាំខ្មែរកន្លង មកបានសរសេរបាយការណ៍ ដើម្បីចរចាជាមួយអាមេរិក ។
សម្តេចបវរធិបតីបានបញ្ជាក់ថា៖ «ថ្ងៃចូលឆ្នាំយើងមិនបានសម្រាកទៅបាញ់ទឹក ប៉ាតម្សៅ ឯណា អត់ទេ! គឺយើងអង្គុយសរសេរបាយការណ៍ ដើម្បីត្រៀមលក្ខណៈ ដើម្បីចរចាជា មួយគេ ។ សុខចិត្តឲ្យបងប្អូនសប្បាយរីករាយចុះ ហើយស្អែកនេះ ត្រូវជួបជាមួយគេ ដើម្បីជជែកគ្នាបន្តិចម្តងៗ ព្រោះថា អាមេរិកគេប្រើពេលវេលាយូរដោយសារអាមេរិកត្រូវចរចាជិត២០០ប្រទេស» ។
សម្តេចបវរធិបតីបានលើកឡើងទៀតថា យើងរង់ចាំតែពេលវេលា ហើយពេលណាគេធ្វើឡើង យើងនឹងទៅភ្លាម ។ យើងដាក់ថ្នាក់ឧបនាយករដ្ឋមន្ត្រី ដើម្បីធ្វើការងារនេះ ដែលជាកម្រិតខ្ពស់ ហើយក្រៅពីប្រមុខរាជរដ្ឋាភិបាល ។ គ្រប់ប្រទេសទាំងអស់ ដោយប្រទេសខ្លះគេត្រឹមរដ្ឋមន្ត្រី ខ្លះឧបកនាយករដ្ឋមន្ត្រី ហើយយើងថ្នាក់ឧបកនាយករដ្ឋមន្ត្រី ។
សម្តេចបវរធិបតីបានបន្ថែមការត្រៀមថ្នាក់ឧបនាយករដ្ឋមន្ត្រី ដើម្បីធ្វើការចរចាជាមួយអាមេរិករឿងពន្ធទំនិញនេះ គឺជាការបង្ហាញការប្តេជ្ញាចិត្តរបស់រាជរដ្ឋាភិបាល ក្នុងខិតខំនិងឲ្យតម្លៃក្នុងការការពារប្រជាពលរដ្ឋ ។
ជាមួយគ្នានោះដែរ សម្តេចបវរធិបតីបានអំពាវនាវឲ្យបងប្អូនប្រជាពលរដ្ឋសូមជឿទុកចិត្តលើរាជរដ្ឋាភិបាលដែលដឹកនាំដោយគណបក្សប្រជាជនកម្ពុជា ។ សម្តេចក៏បានអះអាងថាការដាក់ទណ្ឌកម្មលើទំនិញរបស់សហរដ្ឋអាមេរិកមានជិត២០០ប្រទេស ។
សម្តេចក៏បានសម្តែងការហួសចិត្តចំពោះ ក្រុមប្រឆាំងបាននាំគ្នាស្រែកឲ្យគេដាក់ទណ្ឌកម្មមកលើកម្ពុជា ខណៈដែលរាជរដ្ឋាភិបាលបានកំពុងតែខិតខំធ្វើការដោះស្រាយ ។ ការធ្វើរបស់ក្រុមប្រឆាំង ដែលមានទណ្ឌិត សម រង្ស៊ី បានកំពុងតែធ្វើឲ្យប៉ះពាល់ដល់ឆ្នាំងបាយរបស់ប្រជាពលរដ្ឋ ៕
ចែករំលែកព័តមាននេះ