រាជធានីភ្នំពេញ ៖ កម្លាំងនគរបាលខណ្ឌទួលគោក ស្រាវជ្រាវឃាត់ខ្លួនជនសង្ស័យ ចំនួន០៥នាក់ ដែលបានធ្វើសកម្មភាពឆក់ទូរសព្ទដៃ ០២ករណីផ្សេងគ្នា សង្កាត់បឹងកក់ទី១ និងសង្កាត់បឹងកក់ទី២ ក្នុងខណ្ឌទួលគោក…
រាជធានីភ្នំពេញ ៖ កម្លាំងនគរបាលខណ្ឌទួលគោក ស្រាវជ្រាវឃាត់ខ្លួនជនសង្ស័យ ចំនួន០៥នាក់ ដែលបានធ្វើសកម្មភាពឆក់ទូរសព្ទដៃ ០២ករណីផ្សេងគ្នា សង្កាត់បឹងកក់ទី១ និងសង្កាត់បឹងកក់ទី២ ក្នុងខណ្ឌទួលគោក រាជធានីភ្នំពេញ ។
ករណីទី១ ៖ នៅថ្ងៃទី២៨ ខែមេសា ឆ្នាំ២០២៥ វេលាម៉ោងប្រហែល១១:១៥នាទី កម្លាំងផ្នែកជំនាញ នៃអធិការដ្ឋាននគរបាលខណ្ឌទួលគោក បានធ្វើការស្រាវជ្រាវឃាត់ខ្លួនជនសង្ស័យ០៤នាក់ជាបន្តបន្ទាប់ក្នុងករណី លួចមានស្ថានទម្ងន់ទោស (ឆក់ទូរសព្ទដៃ០១គ្រឿងម៉ាក iPhone13Promax) ដែលបានប្រព្រឹត្តបទល្មើសនៅចំណុចមុខផ្ទះលេខ០៥ ផ្លូវលេខ៥៩០ ក្រុមទី៦៤ ភូមិ១៣ សង្កាត់បឹងកក់ទី២ ខណ្ឌទួលគោក រាជធានីភ្នំពេញ កាលពីថ្ងៃទី២៤ ខែមេសា ឆ្នាំ២០២៥ វេលាម៉ោងប្រហែល០៦:៤៨នាទីព្រឹក ។
ជនសង្ស័យចំនួន០៤នាក់ ៖
១-ឈ្មោះ អ៊ុំ ប៊ុនហ៊ាង ហៅ អាហ៊ាងតូច ភេទប្រុស អាយុ១៨ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅបន្ទប់ជួលគ្មានលេខ ផ្លូវបេតុង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
២-ឈ្មោះ ដា រ៉ា ភេទប្រុស អាយុ១៨ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅបន្ទប់ជួលផ្លូវរថភ្លើង សង្កាត់ទួលសង្កែរទី១ ខណ្ឌឬស្សីកែវ រាជធានីភ្នំពេញ ។
៣-ឈ្មោះ កែវ រ៉ាហ៊ាង ហៅ អាហ៊ាងធំ ភេទប្រុស អាយុ១៨ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់ផ្ទះមិនចាំលេខ ផ្លូវរថភ្លើង សង្កាត់បឹងកក់ទី២ ខណ្ឌទួលគោក ។
៤-ឈ្មោះ បូរ ស័ក្កករុណា ហៅ ម៉ាប់ ភេទប្រុស អាយុ១៥ឆ្នាំ ជនជាតិខ្មែរ មុខរបរ ពុំពិតប្រាកដ ស្នាក់នៅផ្ទះលេខ១០៣ បុរីឈូកវ៉ា២ ផ្លូវលេខ១៨ សង្កាត់សំរោងក្រោម ខណ្ឌពោធិ៍សែនជ័យ ។
ជនរងគ្រោះឈ្មោះ ឆេង ភេទប្រុស អាយុ២៣ឆ្នាំ ជនជាតិខ្មែរ មុខរបរ និស្សិត ស្នាក់នៅផ្ទះលេខ៣៣០A ផ្លូវលំ ភូមិឬស្សី សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ។ បាត់បង់ទូរសព្ទដៃ០១គ្រឿងម៉ាក I phone13Promax ពណ៍ទឹកសមុទ្រ (ជារបស់ជនរងគ្រោះ ដែលក្រុមជនសង្ស័យខាងលើឆក់យកនៅពេលកើតហេតុ) ។
វត្ថុតាងចាប់យករួមមាន ៖
១-ម៉ូតូ០១គ្រឿងម៉ាក Honda C125 ស៊េរី2014 ឡើងតែម2022 ពណ៍ខ្មៅ ពាក់ផ្លាកលេខ ភ្នំពេញ 1CS-4379 និងទូរស័ព្ទដៃម៉ាក I phone 12ពណ៍ស្វាយ(ចាប់យកពីឈ្មោះ អ៊ុំ ប៊ុនហ៊ាង ហៅ អាហ៊ាងតូច ) ។
២-ម៉ូតូម៉ាក Honda Scoopy ពណ៍ក្រហម ពាក់ផ្លាកលេខ ភ្នំពេញ 1HX-2074 (ចាប់យកពីឈ្មោះ បូរ ស័ក្កករុណា ហៅ ម៉ាប់) ។
៣-ទូរសព្ទដៃ០១គ្រឿងម៉ាក I phone13Promax ពណ៍ទឹកសមុទ្រ (ចាប់យកពីឈ្មោះ ដា រ៉ា ) ។
ករណីទី២ ៖ នៅថ្ងៃទី២៨ ខែមេសា ឆ្នាំ២០២៥ វេលាម៉ោងប្រហែល១៥:១០នាទី កម្លាំងផ្នែកជំនាញ នៃអធិការដ្ឋាននគរបាលខណ្ឌទួលគោក បានធ្វើការស្រាវជ្រាវឃាត់ខ្លួនជនសង្ស័យ០១នាក់ពីបទលួចមានស្ថានទម្ងន់ទោសដោយសារការប្រព្រឹត្តអំពើហិង្សា (ឆក់ទូរសព្ទដៃកូនស្រីរបស់ជនរងបណ្ដាលឲ្យក្រឡាប់ PassApp រងរបួសក្មេងស្រីរងគ្រោះ០២នាក់របួសដៃស្ដាំធ្ងន់) ស្រាវជ្រាវឃាត់ខ្លួននៅចំណុចផ្លូវលេខ១០៧ ភូមិទួលសង្កែរ សង្កាត់ទួលសង្កែរទី១ ខណ្ឌឬស្សីកែវ រាជធានីភ្នំពេញ ដែលបានប្រព្រឹត្តបទល្មើសនៅចំណុចមុខផ្ទះលេខ២១ ផ្លូវលេខ៣១៥ ក្រុមទី៣៦ ភូមិ៩ សង្កាត់បឹងកក់ទី១ ខណ្ឌទួលគោក កាលពីថ្ងៃទី១៨ ខែមេសា ឆ្នាំ២០២៥ វេលាម៉ោងប្រហែល០៨:១០នាទី ។
ជនសង្ស័យម្នាក់ដែលត្រូវឃាត់ខ្លួនមានឈ្មោះ សារុន វីរៈ ភេទប្រុស អាយុ១៨ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅបន្ទប់ជួល ផ្លូវរថភ្លើង សង្កាត់បឹងកក់ទី១ ខណ្ឌទួលគោក រាជធានីភ្នំពេញ ។
វត្ថុតាងចាប់យកមាន៖
-ម៉ូតូ០១គ្រឿងម៉ាក Honda C125ស៊េរី2022 ពណ៍ខ្មៅ ពាក់ផ្លាកលេខ ភ្នំពេញ 1DP-0320 (ជាម៉ូតូរបស់ជនសង្ស័យជិះធ្វើសកម្មភាពឆក់) ចាប់យកនៅបន្ទប់ជួលផ្លូវរថភ្លើង សង្កាត់បឹងកក់ទី១ ។
បច្ចុប្បន្ន ជនសង្ស័យទាំង០៥នាក់ខាងលើ កំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីសាកសួរ និងចាត់ការបន្តតាមនីតិវិធី ៕
ចែករំលែកព័តមាននេះ