រាជធានីភ្នំពេញ ៖ កម្លាំងរដ្ឋបាលសង្កាត់ចោមចៅទី៣ កាលពីវេលាព្រឹកថ្ងៃទី៣០ ខែមេសា ឆ្នាំ២០២៥ បានចុះទៅវាយកម្ទេចជញ្ជាំងឥដ្ឋទំហំទទឹងជាង១ម៉ែត្រ ដែលត្រូវបានគ្រួសារមួយសង់បិទផ្លូវឌឿងហែម១ខ្សែ ស្ថិតនៅក្នុងភូមិជម្ពូវ័ន២ សង្កាត់ចោមចៅទី៣…
រាជធានីភ្នំពេញ ៖ កម្លាំងរដ្ឋបាលសង្កាត់ចោមចៅទី៣ កាលពីវេលាព្រឹកថ្ងៃទី៣០ ខែមេសា ឆ្នាំ២០២៥ បានចុះទៅវាយកម្ទេចជញ្ជាំងឥដ្ឋទំហំទទឹងជាង១ម៉ែត្រ ដែលត្រូវបានគ្រួសារមួយសង់បិទផ្លូវឌឿងហែម១ខ្សែ ស្ថិតនៅក្នុងភូមិជម្ពូវ័ន២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
កម្លាំងអាជ្ញាធរខាងលើបានប្រាប់ដោយមិនបញ្ចេញឈ្មោះអ្នកសង់ជញ្ជាំងបិទផ្លូវនោះថា គ្រួសារមួយនោះទើបតែសង់ជញ្ជាំងឥដ្ឋបិទផ្លូវឌឿងហែមនោះក្នុងពេលថ្មីៗប៉ុណ្ណោះ ។ ក្រោយពីមានការរំលោភបំពានយកផ្លូវធ្វើជាកម្មសិទ្ធិផ្ទាល់ខ្លួនបែបនេះ បានធ្វើឲ្យប្រជាពលរដ្ឋនៅតំបន់នោះមានការខឹងសម្បារ ហើយក៏បានប្ដឹងសុំការអន្តរាគមន៍ ទើបអាជ្ញាធរចុះទៅវាយចោលបើកផ្លូវនោះឡើងវិញ សម្រាប់ការធ្វើដំណើរ ។
ប្រភពដដែលបានប្រាប់ឲ្យដឹងបន្តទៀតថា តាមទ្រង់ទ្រាយដើមនៃផ្លូវផ្លូវឌឿងហែម១ខ្សែនេះគឺមិនចង្អៀតពេកនោះទេ ផ្លូវនេះមានប្រវែងប្រមាណ១៥០ម៉ែត្រ និងទទឹង២,៥០ម៉ែត្រ ប៉ុន្តែបច្ចុប្បន្នបានរងការរំលោភបំពានពីសំណាក់អ្នករស់នៅតាមបណ្ដោយផ្លូវនោះជាបន្តបន្ទាប់ ។ ពួកគាត់បានសង់សំណង់ផ្សេងៗរំលោភលើផ្លូវទទឹង១ម៉ែត្រស្ទើរគ្រប់គ្នា ដែលពីមុនផ្លូវខាងលើអាចបើករថយន្តធុនតូចចូលបាន លុះឥឡូវនៅសល់ទំហំទទឹងត្រឹមតែជាង១ម៉ែត្រប៉ុណ្ណោះគ្រាន់តែដើរថ្មើរជើងក៏ពិបាកផង ។
ប្រភពខាងលើបានបញ្ជាក់ប្រាប់បន្ថែមទៀតថា ពេលនេះក្រៅពីការវាយជញ្ជាំងឥដ្ឋដើម្បីបើកផ្លូវខាងលើរដ្ឋបាលសង្កាត់ចោមចៅទី៣ ក៏បានជូនដំណឹងដល់អ្នកដែលសង់សំណង់រំលោភលើផ្លូវឌឿងហែមនេះទាំងអស់ ទាំងអ្នកដែលសង់យូរហើយ និងអ្នកដែលទើបនិងសង់ថ្មី ត្រូវតែរុះរើសំណង់របស់ខ្លួនចេញឲ្យអស់ ។ ដោយរដ្ឋបាលសង្កាត់បានទុកពេលឲ្យ១សប្ដាហ៍ បើមិនព្រមរុះរើដោយខ្លួនឯងទេ រដ្ឋបាលសង្កាត់និងដាក់កម្លាំងចុះទៅធ្វើការរុះរើដោយគ្មានការលើកលែង ហើយនិងមិនទទួលខុសត្រូវរាល់ការខូចខាតទ្រព្យសម្បត្តិនោះឡើយ ៕
ចែករំលែកព័តមាននេះ