នាយករដ្ឋមន្ត្រីវៀតណាមជំរុញឱ្យទិញផលិតផលអាមេរិកបន្ថែម ដើម្បីតុល្យភាពពាណិជ្ជកម្ម
ប្រទេសវៀតណាម ៖ នាយករដ្ឋមន្ត្រីវៀតណាម លោក ផាំ មិញជិញ (Pham Minh Chinh) កាលពីថ្ងៃទី២៩…
ប្រទេសវៀតណាម ៖ នាយករដ្ឋមន្ត្រីវៀតណាម លោក ផាំ មិញជិញ (Pham Minh Chinh) កាលពីថ្ងៃទី២៩ ខែមេសា ឆ្នាំ២០២៥ បានជំរុញថា វៀតណាមត្រូវការទិញផលិតផលសំខាន់ៗរបស់អាមេរិកបន្ថែមទៀត រួមទាំងឧស្ម័នធម្មជាតិរាវ (LNG) យន្តហោះ និងឱសថជាដើម ដើម្បីជាប្រយោជន៍ដល់តុល្យភាពពាណិជ្ជកម្ម។ នេះបើតាមប្រភពពីសារព័ត៌មាន VnExpress និង VOV បានចេញផ្សាយ ។
នៅក្នុងកិច្ចប្រជុំរដ្ឋាភិបាលដែលបានធ្វើឡើងកាលពីថ្ងៃទី២៩ ខែមេសា ឆ្នាំ២០២៥ កន្លងទៅ ដើម្បីពិភាក្សាអំពីពន្ធគយទៅវិញទៅមករបស់អាមេរិក នាយករដ្ឋមន្ត្រីវៀតណាមបានថ្លែងថា ការចរចាពាណិជ្ជកម្មរបស់វៀតណាមកំពុងដំណើរការល្អ ប៉ុន្តែកិច្ចសន្យានាំចូលផលិតផលអាមេរិកគឺចាំបាច់ដើម្បីធានាថា ការចរចាបន្តទៅមុខដោយរលូន។
រដ្ឋបាលប្រធានាធិបតីអាមេរិក លោក ដូណាល់ ត្រាំ (Donald Trump) បានសម្រេចផ្អាករយៈពេល៩០ថ្ងៃ ចំពោះអត្រាពន្ធគយខ្ពស់ដែលបានប្រកាសលើដៃគូពាណិជ្ជកម្មរបស់អាមេរិក រួមទាំងប្រទេសវៀតណាមផងដែរ ដោយអត្រាបណ្តោះអាសន្នបច្ចុប្បន្នគឺនៅត្រឹម ១០%។ ប្រតិភូវៀតណាមត្រូវបានរំពឹងថានឹងធ្វើដំណើរទៅសហរដ្ឋអាមេរិក នៅថ្ងៃទី១ ខែឧសភា ខាងមុខនេះ សម្រាប់ការចរចាលើពាណិជ្ជកម្មទ្វេភាគី ខណៈដែលនាយករដ្ឋមន្ត្រីវៀតណាមបានស្វែងរកការចរចា ដើម្បីធ្វើឱ្យពន្ធនាំចូលរបស់ប្រទេសទាំងពីរមានតុល្យភាព និងអត្រាទាប។
នាយករដ្ឋមន្ត្រីវៀតណាមជំរុញឱ្យមានការបញ្ចប់ឱ្យបានឆាប់នូវកិច្ចព្រមព្រៀងបញ្ជាទិញនៅត្រឹមខែឧសភា ឆ្នាំ២០២៥ សម្រាប់ផលិតផលនាំចេញសំខាន់ៗរបស់អាមេរិក ដូចជា ឧស្ម័នធម្មជាតិរាវ យន្តហោះ ឱសថ ឧបករណ៍ផ្គត់ផ្គង់វេជ្ជសាស្ត្រ និងផលិតផលកសិកម្ម សំដៅសម្រេចបានតុល្យភាពពាណិជ្ជកម្មប្រកបដោយនិរន្តរភាព។ លោកបានសង្កត់ធ្ងន់ថា ត្រូវតែផ្តល់អាទិភាពដល់អធិបតេយ្យភាពជាតិ សន្តិសុខ និងផលប្រយោជន៍ជាតិ និងរក្សាការប្តេជ្ញាចិត្តជាអន្តរជាតិរបស់វៀតណាម។
លើសពីនេះទៀត នាយករដ្ឋមន្ត្រីវៀតណាមក៏បានអះអាងជាថ្មីនូវការប្តេជ្ញាចិត្តរបស់ប្រទេសវៀតណាមក្នុងការសម្របសម្រួលយ៉ាងជិតស្និទ្ធជាមួយអាស៊ាន និងដៃគូក្នុងតំបន់ ដើម្បីធានាផលប្រយោជន៍ទៅវិញទៅមកក្នុងការចរចាពាណិជ្ជកម្មជាមួយអាមេរិក ស្របតាមភាពជាដៃគូយុទ្ធសាស្ត្រគ្រប់ជ្រុងជ្រោយអាស៊ាន-អាមេរិក៕
ចែករំលែកព័តមាននេះ