រាជធានីភ្នំពេញ ៖ សម្ដេចរដ្ឋសភាធិបតី ឃួន សុដារី ប្រធានរដ្ឋសភាបានគូសបញ្ជាក់ឲ្យដឹងថា ក្នុងរយៈពេល២០ខែមកនេះ បន្ទាប់ពីសភាធ្វើកំណែទម្រង់ និងលើកម្ពស់អភិបាលកិច្ចល្អ មានមន្ត្រីជាង១០០នាក់ត្រូវបានលប់ឈ្មោះចេញពីក្របខណ្ឌការងារដាក់ឱ្យចូលនិវត្តន៍…
រាជធានីភ្នំពេញ ៖ សម្ដេចរដ្ឋសភាធិបតី ឃួន សុដារី ប្រធានរដ្ឋសភាបានគូសបញ្ជាក់ឲ្យដឹងថា ក្នុងរយៈពេល២០ខែមកនេះ បន្ទាប់ពីសភាធ្វើកំណែទម្រង់ និងលើកម្ពស់អភិបាលកិច្ចល្អ មានមន្ត្រីជាង១០០នាក់ត្រូវបានលប់ឈ្មោះចេញពីក្របខណ្ឌការងារដាក់ឱ្យចូលនិវត្តន៍ ឬស្នើលាឈប់ដោយខ្លួនឯង ។
ថ្លែងក្នុងពិធីបើកសិក្ខាសាលាផ្សព្វផ្សាយស្ដីពីការត្រួតពិនិត្យឡើងវិញ និងការវិភាគមុខងារ និងរចនាសម្ព័ន្ធក្រសួងស្ថាប័ន នៅថ្ងៃទី២៩ ខែមេសា ឆ្នាំ២០២៥ នៅសាលប្រជុំអគាររដ្ឋបាលសភាថ្មី សម្ដេចសភាធិបតី ឃួន សុដារី ថា ក្នុងចំណោមមនុស្សជាង១០០នាក់នោះមានឈ្មោះខ្មោច២០នាក់ និងក្រៅពីនោះមានមួយចំនួនរកឃើញថា ទៅធ្វើការងារផ្សេងពីការការងារនៅអគ្គលេខាធិការដ្ឋានសភា ។
សម្ដេចប្រធានរដ្ឋសភាបានគូសបញ្ជាក់ថា៖ «អ្នកខ្លះពេលដែលវិភាគមុខងារទៅរកឃើញ។កាលមុនស្រួលត្រង់ថាមានឈ្មោះក្របខណ្ឌទៅតែទៅធ្វើការងារផ្សេងទៅដើម្បីបង្គ្រប់ចំណាយ ឬអីផ្សេងទៅខ្ញុំអត់ដឹងទេតែឥឡូវអត់បាន។ ដល់អត់បានចឹងខ្ចិលគាត់សុំឈប់តែម្ដង អ្នកខ្លះគាត់សុំព្យួរការងារ»។
ការធ្វើបែបនេះ ត្រូវបានសម្ដេចប្រធានរដ្សភាបានបន្ថែមថា វិធាននេះបានចូលរួមចំណែកដ៏សំខាន់ក្នុងការសន្សំថវិការជាតិ ពង្រឹងប្រសិទ្ធភាពការងារ ការលើកកម្ពស់គោលការណ៍ជ្រើសរើសមន្ត្រីដោយផ្អែកលើស្នាដៃនិងសមត្ថភាព ភាពយុត្តិធម៌ គណនេយ្យភាព តម្លាភាព ឱកាសស្មើគ្នាក្នុងការទទួលបានការលើកទឹកចិត្ត និងជំរុញកំណែទម្រង់ឱ្យកាន់តែមានប្រសិទ្ធភាពដោយមិនមានការរើសអើង។
នៅក្នុងឱកាសនេះដែរ សម្តេចប្រធានរដ្ឋសភាបានផ្តល់គន្លឹះចំនួន៦ (ប្រាំមួយ) ចំណុច សម្រាប់ពិភាក្សាក្នុងវេទិកានាថ្ងៃនេះ មានដូចខាងក្រោម៖
ទី១.ដំណើរការកំណែទម្រង់របស់យើង គឺដើម្បីបង្រួបបង្រួម និង លើកកម្ពស់សាមគ្គីភាព មិនមែនជាលេសសម្រាប់ការបំបែកបំបាក់ ឬ ការបែងចែកបក្សពួកនោះទេ។ ដូច្នេះ ការប្រកាន់យកគោលការណ៍ច្បាប់ គុណាធិបតេយ្យ ភាពត្រឹមត្រូវ យុត្តិធម៌ សមធម៌ និងតម្លាភាព គឺជា មូលដ្ឋានគ្រឹះ នៃការធ្វើកំណែទម្រង់ដ៏ជោគជ័យ និងការកសាងបរិយាកាស ការងារពោរពេញដោយសាមគ្គីភាព និងភាពសុខដុមរមនា។ ក្នុងន័យនេះ អ្នកដឹកនាំគ្រប់ជាន់ថ្នាក់ មានកាតព្វកិច្ចដ៏សំខាន់ ក្នុងការប្រតិបត្តិការងារ ដោយផ្អែកលើគោលការណ៍ជាមូលដ្ឋានជានិច្ច។
ទី២.ការពង្រឹងកំណែទម្រង់សេវាសាធារណៈ ត្រូវជំរុញការលើកកម្ពស់ គុណាធិបតេយ្យ យុត្តិធម៌ និងមានប្រព័ន្ធលើកទឹកចិត្ត ផ្អែកលើសមត្ថភាព និងសមិទ្ធកម្ម។ គោលដៅសំខាន់ គឺធានាថា គោលនយោបាយលើកទឹកចិត្ត ត្រូវបានផ្តល់ជូនដល់បុគ្គលិក មន្ត្រីរាជការដែលខិតខំប្រឹងប្រែង និងមានស្នាដៃល្អ តាមរយៈការជំរុញការតាមដាន ត្រួតពិនិត្យ និងវាយតម្លៃ ពីប្រសិទ្ធភាពការងារ ក្នុងរដ្ឋបាលសាធារណៈជាប្រព័ន្ធ។ ក្នុងន័យនេះ មន្ត្រី រាជការត្រូវបានការពារដោយយុត្តិធម៌ ហើយអ្នកដែលមានសមត្ថភាព ទទួលបានការទទួលស្គាល់ និងមានការលើកទឹកចិត្តសមស្រប។
ទី៣.ដើម្បីសម្របខ្លួនទៅនឹងបរិយាកាសការងារ ដែលកាន់តែមានភាព ស្មុគស្មាញ និងប្រឈមខ្លាំងនាពេលខាងមុខ យើងត្រូវតែជំរុញពិពិធភាព និងបរិយាបន្ន ក្នុងក្រសួង-ស្ថាប័ន ទាំងសមត្ថភាពជំនាញ បទពិសោធន៍ និង ទស្សនៈ និងធានានូវបរិយាកាសការងារមួយ មានថ្នាក់ដឹកនាំ និងមន្ត្រី មានឆន្ទៈពិតប្រាកដ ចិត្តមោះមុត និងការប្តេជ្ញាចិត្តខ្ពស់ ក្នុងការបំពេញ តួនាទីភារកិច្ចរបស់ខ្លួនដោយស្មារតីទទួលខុសត្រូវខ្ពស់។ ការស្វែងរក និង រក្សាមន្ត្រី ដែលមានជំនាញ និងសមត្ថភាពខ្ពស់ឱ្យចូលរួមបម្រើសេវា សាធារណៈ គឺជាអាទិភាពចំបង ដោយការធ្វើបែបនេះ ជាកត្តាចាំបាច់ ដើម្បីធានាថា វិស័យសាធារណៈសម្បូរទៅដោយជំនាញចម្រុះ ដែល ដើរតួនាទីជាកម្លាំងចលករដ៏សំខាន់ សម្រាប់ការអភិវឌ្ឍជាតិឱ្យកាន់តែប្រសើរឡើង។
ទី៤.ការពង្រឹងការអភិវឌ្ឍភាពជាអ្នកដឹកនាំក្នុងវិស័យសាធារណៈ ត្រូវធ្វើ ឡើង តាមរយៈការបង្កើតកម្មវិធីបណ្តុះបណ្តាល ដែលមានរចនាសម្ព័ន្ធច្បាស់លាស់ ដោយផ្តោតសំខាន់លើការលើកកម្ពស់ ភាពជាអ្នកដឹកនាំប្រកប ដោយភាពផ្លាស់ប្តូរ (Transformative Leadership) និងនវានុវត្តន៍ (Innovation)។ ការវិនិយោគធនធានបន្ថែមទៀត លើការបណ្តុះបណ្តាល ភាពជាអ្នកដឹកនាំសម្រាប់មន្ត្រីរាជការ គឺជាកិច្ចការចាំបាច់ ដើម្បីបណ្តុះនូវ ផ្នត់គំនិតពង្រឹងសមត្ថភាពខ្លួនឯង (ឆន្ទៈ និងសមត្ថភាពក្នុងការរៀនសូត្រ) និងវប្បធម៌នៃការរៀនសូត្រពេញមួយជីវិត ដែលជាមូលដ្ឋានគ្រឹះសម្រាប់ ការសម្របខ្លួនទៅនឹងការផ្លាស់ប្តូរ និងបញ្ហាប្រឈមនានា ព្រមទាំង ការពង្រឹងសមត្ថភាពស្ថាប័នឱ្យកាន់តែរឹងមាំ និងប្រកបដោយភាពធន់។
ទី៥.យើងត្រូវបន្តលើកកម្ពស់កិច្ចសហប្រតិបត្តិការអន្តរវិស័យ និងអភិក្រម «ជវភាពនៃប្រព័ន្ធតួអង្គតែមួយ» ឱ្យបានកាន់តែសកម្ម និងខ្លាំងក្លា ដើម្បី ជំរុញទំនើបកម្មស្ថាប័នសាធារណៈឱ្យកាន់តែមានប្រសិទ្ធភាព និងសន្ទុះ ខ្លាំងថែមទៀត។ តាមរយៈការរួបរួមគ្នាទាំងចក្ខុវិស័យ ទស្សនៈ គោលដៅ និងគុណតម្លៃរួម ដោយឈរលើគោលការណ៍ជាមូលដ្ឋានច្បាស់លាស់ យើងទាំងអស់គ្នាអាចចូលរួមចំណែក ធ្វើឱ្យស្ថាប័នសាធារណៈមាន ភាពធន់ រឹងមាំ ហើយការផ្តល់សេវាសាធារណៈកាន់តែមានប្រសិទ្ធភាពថែមទៀត។
និងទី៦.ស្ថាប័ននីតិបញ្ញត្តិនិងនីតិប្រតិបត្តិ ត្រូវបន្តកិច្ចសហប្រតិបត្តិការយ៉ាងជិតស្និទ្ធ ដើម្បីធានានូវការអនុវត្តច្បាប់យុទ្ធសាស្ត្រ និងគោលនយោបាយ ដោយប្រសិទ្ធភាព ក្នុងការធ្វើកំណែទម្រង់ និងជំរុញនវានុវត្តន៍ ក្នុងវិស័យ សាធារណៈ សំដៅឆ្លើយតបទៅនឹងតម្រូវការ និងការរំពឹងទុករបស់ប្រជាពលរដ្ឋ ដែលមានការកើនឡើងកាន់តែច្រើនពីមួយថ្ងៃទៅមួយថ្ងៃ៕
ចែករំលែកព័តមាននេះ