ខេត្តកណ្តាល ៖ ជនសង្ស័យម្នាក់ ដែលសកម្មខាងលួច និងគាស់ផ្ទះ ហើយពីមុនធ្លាប់ ត្រូវប៉ូលិសចាប់ដាក់គុកចំនួន០២ដងនោះ ពេលនេះចេញមកវិញ នៅតែមិនរាងចាល មកធ្វើសកម្មភាពលួចម៉ូតូ…
ខេត្តកណ្តាល ៖ ជនសង្ស័យម្នាក់ ដែលសកម្មខាងលួច និងគាស់ផ្ទះ ហើយពីមុនធ្លាប់ ត្រូវប៉ូលិសចាប់ដាក់គុកចំនួន០២ដងនោះ ពេលនេះចេញមកវិញ នៅតែមិនរាងចាល មកធ្វើសកម្មភាពលួចម៉ូតូ ប្រជាពលរដ្ឋយកទៅបាត់ សំងំលាក់ខ្លួនបាន៥ថ្ងៃ ត្រូវបានប៉ូលិសក្របួចជាប់ យកទៅដាក់គុកម្ដងទៀត ។
ប៉ូលិសក្របួចបាននៅវេលាម៉ោង០៥ និង៣០នាទីល្ងាច ថ្ងៃទី២៨ ខែមេសា ឆ្នាំ២០២៥ នៅចំណុចភូមិទួលក្រាំង ឃុំក្រាំងយ៉ូវ ស្រុកស្អាង ខេត្តកណ្ដាល ។
ប៉ូលិសបានបង្ហើបឱ្យដឹងថា ជនរងគ្រោះមានឈ្មោះ អុន សារី ភេទប្រុស អាយុ៣៥ឆ្នាំ មុខរបរកសិករ មានទីលំនៅភូមិទួលក្រូច ឃុំក្រាំងយ៉ូវ ស្រុកស្អាង ខេត្តកណ្ដាល ។ សម្ភារបាត់បង់ ម៉ូតូចំនួន០១គ្រឿង ម៉ាកហុងដាឌ្រីមពណ៌ខ្មៅ ពាក់ស្លាកលេខ កណ្ដាល1X-2720 ។ ចំណែកជនសង្ស័យមានឈ្មោះ កែន ស្រឿ ភេទប្រុស អាយុ២៦ឆ្នាំ មុខរបរ មិនពិតប្រាកដ មានទីលំនៅភូមិ រកា ឃុំក្រាំងយ៉ូវ ស្រុកស្អាង ខេត្តកណ្ដាល ។ មានសារធាតុញៀនក្នុងទឹកនោមវិជ្ជមាន និងធ្លាប់ជាប់ពន្ធនាគារចំនួន០២ លើកពាក់ព័ន្ធករណីគាស់ផ្ទះ និងលួចម៉ូតូ ចំនួន០៤ឆ្នាំ ។
បើយោងតាមប្រភពព័ត៌មានបន្តឱ្យដឹងថា ជនសង្ស័យខាងលើជាមនុស្សប្រើប្រាស់គ្រឿងជាប្រចាំ ហើយតែងតែលួចរបស់របរ និង ទ្រព្យសម្បត្តិរបស់ប្រជាពលរដ្ឋ នៅឃុំក្រាំងយ៉ូវជាញឹកញាប់ លុះរហូតនៅថ្ងៃទី២៤ ខែមេសា ឆ្នាំ២០២៥ វេលាម៉ោង១២ថ្ងៃត្រង់ ជនសង្ស័យបានដើរតាមដីស្រែចម្ការ ខាងក្រោយភូមិមកដល់ចំណុចកើតហេតុខាងលើ ក៏បានឃើញម៉ូតូចំនួន០១គ្រឿង របស់ជនរងគ្រោះ ចតទុកចោលគ្មានសោរ ខណៈពេលនោះជនសង្ស័យបានធ្វើសកម្មភាពតភ្ជាប់ខ្សែភ្លើង ដើម្បីបញ្ឆេះម៉ូតូ រួចក៏បានទ្បើងជិះម៉ូតគេចខ្លួនបាត់តែម្ដង ។
ភ្លាមៗ ក៏ជនរងគ្រោះក៏បានមកដាក់ពាក្យបណ្តឹងនៅអធិការនគរបាលស្រុកស្អាង ដើម្បីឱ្យប៉ូលិសស្វែងរក ។ ក្រោយពីទទួលបានពាក្យបណ្តឹងរបស់ជនគ្រោះ កម្លាំងនគរបាលស្រុកស្អាងសហការជាមួយ នឹងកម្លាំងនគរបាលប៉ុស្តិ៍ក្រាំងយ៉ូវ ធ្វើស្រាវជ្រាវរយៈពេល០៥ ថ្ងៃទើបឃាត់ខ្លួនបានជនសង្ស័យខាងលើ យកមកធ្វើការសាកសួរ ។
នៅចំពោះមុខប៉ូលិស ជនសង្ស័យបានសារភាពថា ខ្លួនពិតជាបានធ្វើសកម្មភាពលួច យកម៉ូតូរបស់ជនរងគ្រោះពិតប្រាកដមែន រួចបានយកទៅលក់ឱ្យគេមិនស្គាល់ ឈ្មោះជាអ្នកប៉ះកង់ម៉ូតូនៅផ្លូវជាតិលេខ២ កែងផ្លូវជាតិ៦០ម៉ែត្រ ស្ថិតនៅក្រុងតាខ្មៅ ខេត្តកណ្ដាល បានប្រាក់ចំនួន ២៥០,០០០រៀល (ម្ភៃប្រាំម៉ឺនរៀលគត់) ។
បច្ចុប្បន្នជនសង្ស័យ ត្រូវបាននគរបាលជំនាញស្រុកស្អាងកំពុងកសាងសំណុំរឿង បញ្ជូនទៅកាន់តុលាការដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ