ទីក្រុងតេអេរ៉ង់៖ ថ្មីៗនេះ អ៊ីរ៉ង់ប្រហារជីវិតបុរសឈ្មោះម៉ូសេន ឡាងកាណេស៊ីន (Mohsen Langarneshin) ដែលត្រូវតុលាការរកឃើញថាមានកំហុសពីបទស៊ើបការណ៍សម្ងាត់ឱ្យអ៊ីស្រាអែល និងជាប់ពាក់ព័ន្ធនឹងការធ្វើឃាតសមាជិកឆ្មាំបដិវត្តអ៊ីរ៉ង់។ នេះបើយោងតាមទីភ្នាក់ងារព័ត៌មានមីហ្សាន់ (Mizan)…
ទីក្រុងតេអេរ៉ង់៖ ថ្មីៗនេះ អ៊ីរ៉ង់ប្រហារជីវិតបុរសឈ្មោះម៉ូសេន ឡាងកាណេស៊ីន (Mohsen Langarneshin) ដែលត្រូវតុលាការរកឃើញថាមានកំហុសពីបទស៊ើបការណ៍សម្ងាត់ឱ្យអ៊ីស្រាអែល និងជាប់ពាក់ព័ន្ធនឹងការធ្វើឃាតសមាជិកឆ្មាំបដិវត្តអ៊ីរ៉ង់។ នេះបើយោងតាមទីភ្នាក់ងារព័ត៌មានមីហ្សាន់ (Mizan) របស់អ៊ីរ៉ង់។ ប្រភពខ្លះថាឡាងកាណេស៊ីនត្រូវអ៊ីស្រាអែលទាក់ទងឱ្យធ្វើជាភ្នាក់ងារបង្កប់របស់ខ្លួន និងចាប់ផ្ដើមបណ្ដុះបណ្ដាលដោយភ្នាក់ងារចារកម្មម៉ូសាត (Mossad) កាលពីឆ្នាំ២០២០។
គាត់ត្រូវបានប្រហារជីវិតដោយព្យួរកនឹងខ្សែពួរកាលពីព្រឹកថ្ងៃពុធ។ ការប្រហារជីវិតឡាងកាណេស៊ីនជាការរំលេចឱ្យឃើញស្រមោលអន្ធការនៃជម្លោះដ៏ជូរចត់រវាងអ៊ីរ៉ង់ និងអ៊ីស្រាអែល។ ជាពិសេស ប្រទេសទាំង២ធ្វើសង្គ្រាមផ្នែកចារកម្ម, សន្តិសុខព័ត៌មានវិទ្យា និងការធ្វើឃាត។ អ៊ីរ៉ង់អះអាងថាការដាក់ទោសធ្ងន់ទៅលើពួកចារកម្មជាការចាំបាច់ណាស់ដើម្បីការពារសន្តិសុខជាតិរបស់ខ្លួន។ ប៉ុន្តែក្រុមអ្នករិះគន់បារម្ភថាការកាត់ទោសអាចនឹងគ្មានយុត្តិធម៌ទេ និងផ្ដន្ទាទោសមានកម្រិតធ្ងន់ពេក។
ការប្រហារជីវិតនេះធ្វើឡើងចំពេលមានអស្ថិរភាពនៅក្នុងតំបន់ផង និងការចរចារវាងអ៊ីរ៉ង់ និងអាមេរិកនៅក្នុងបញ្ហានុយក្លេអ៊ែរផង។ មានន័យថាអ៊ីរ៉ង់ចង់ពង្រឹងការគ្រប់គ្រងកិច្ចការផ្ទៃក្នុងរបស់ខ្លួនឱ្យបានរឹងមាំនៅពេលកំពុងនឹងសម្ពាធពីអន្តរជាតិ។ អាជ្ញាធរអ៊ីរ៉ង់ចោទប្រកាន់ថាឡាងកាណេស៊ីនបានបង្កើតទំនាក់ទំនងជាមួយក្រុមសម្ងាត់ម៉ូសាតរបស់អ៊ីស្រាអែលកាលពីឆ្នាំ២០២០ដើម្បីទទួលការបណ្ដុះបណ្ដាល។ ក្រោយមក គាត់ប្រមូលព័ត៌មានសម្ងាត់ជាច្រើនពីអ៊ីរ៉ង់យកទៅឱ្យអ៊ីស្រាអែល។
បុគ្គលរូបនេះបានដើរតួនាទីយ៉ាងសំខាន់នៅក្នុងការធ្វើឃាតមន្ត្រីឆ្មាំបដិវត្តម្នាក់ឈ្មោះសាយ៉ាត់ ខូដាយ (Sayad Khodai)។ អ៊ីរ៉ង់អះអាងថាឡាងកាណេស៊ីនជួបទីភ្នាក់ងារជាន់ខ្ពស់របស់ម៉ូសាត២ដង ម្ដងនៅប្រទេសហ្សកហ្ស៊ី និងម្ដងទៀតនៅណេប៉ាល់។ គាត់បានរៀបចំក្បួនរថយន្តសម្រាប់ក្រុមប្រតិបត្តិការណ៍សម្ងាត់ និងប្រគល់ទៅឱ្យបណ្ដាញទាក់ទងរបស់ម៉ូសាត។
អ៊ីរ៉ង់មានប្រវត្តិកាត់ទោសប្រហារជីវិតច្រើនណាស់ទៅលើអ្នកលួចយកការណ៍សម្ងាត់ពីអ៊ីរ៉ង់ទៅឱ្យរដ្ឋបរទេស។ កាលពីខែធ្នូ ឆ្នាំ២០២២ មនុស្សបួននាក់ត្រូវបានព្យួរកប្រហារជីវិតពីបទឃុបឃិតជាមួយក្រុមសម្ងាត់អ៊ីស្រាអែល។ អង្គការលើកលែងទោសអន្តរជាតិ (Amnesty International) ថ្លែងថាអ៊ីរ៉ង់, អ៊ីរ៉ាក់ និងអារ៉ាប៊ីសាអូឌីតប្រហារជីវិតច្រើនជាងគេ។ ពួកគេមានចំណែក៩១%នៃចំនួនប្រហារជីវិតទូទាំងពិភពលោក។ កាលពីឆ្នាំ២០២៤ អ៊ីរ៉ង់ប្រហារជីវិតអ្នកទោសយ៉ាងតិច៩៧៥នាក់។ នេះបើយោងតាមការផ្សាយរបស់ទស្សនាវដ្ដីញូស្វីក និងប្រភពដទៃទៀត៕
ចែករំលែកព័តមាននេះ