មានលុយ មានទ្រព្យ មានអ្វីៗ ហើយអ្នកខ្លះ រហូតដល់មានអំណាចបុណ្យស័ក្តិធំថែមទៀត ប៉ុន្តែបែរជាមិនមានសុភមង្គល មានគ្រួសារហើយចេះតែបែកបាក់គ្នា តើមកពីហេតុអ្វី? សម្រាប់បុគ្គលខ្លះ ការជ្រើសរើសជីវិតនៅលីវ…
មានលុយ មានទ្រព្យ មានអ្វីៗ ហើយអ្នកខ្លះ រហូតដល់មានអំណាចបុណ្យស័ក្តិធំថែមទៀត ប៉ុន្តែបែរជាមិនមានសុភមង្គល មានគ្រួសារហើយចេះតែបែកបាក់គ្នា តើមកពីហេតុអ្វី?
សម្រាប់បុគ្គលខ្លះ ការជ្រើសរើសជីវិតនៅលីវ វាគឺជាសិទ្ធិ និងជាការសម្រេចចិត្តរបស់បុគ្គលដោយសារតែ ពួកគេចាត់ទុកថា ជីវិតជាគូ វាអាចជាប្រភពនៃសម្ពាធនៃបញ្ហា ការទទួលខុសត្រូវ ការរំខាន ជាពិសេស គឺភាពស៊ាំញ៉ាំ និងរយីងរយោងនៃញាតិសម្ព័ន្ធ ជាពិសេស នៅក្នុងបរិបទនៃសង្គមគ្រួសារខ្មែរ ។
នៅកម្ពុជាដំណើរការនៃការលែងលះគ្នា គឺតែងតែកើតមានជាហូរហែនៅក្នុងសង្គម ខណៈដែលខ្លះនៅបន្តបញ្ហារសេមរសាមជាច្រើន រាប់តាំងពីបញ្ហាពាក់ព័ន្ធនឹងកូន បញ្ហានៃការបែងចែកទ្រព្យសម្បត្តិ ហើយខ្លះនៅតែបន្តបោះសម្តីផ្លែផ្កាគ្នានៅលើបណ្តាញសង្គម ជាហូរហែ ។
ខ្លះទៀត ទោះបីជាមានការលះលែងគ្នាទៅហើយមែន ប៉ុន្តែចំណងនិងភាពនឹករលឹកនៃភេទសម្ព័ន្ធនៅតែមានរហូតកើតមានករណីប្រចណ្ឌ ហើយកើតជាអំពើហិង្សា ។ ករណីខ្លះ គឺមានរហូតដល់ករណីឃាតកម្មទៅទៀត។ ប៉ុន្តែទោះបីជាយ៉ាងណាក៏ដោយ កម្ពុជាហាក់ខ្វះការចងក្រងទិន្នន័យបញ្ហាប្រជាសាស្ត្រមួយនេះនៅឡើយ ។
ពាក់ព័ន្ធនឹងបញ្ហាកង្វះខាតទិន្នន័យប្រជាសាស្ត្រនេះ យើងគិតថា ស្ថាប័នឬក៏មន្ត្រីអត្រានុកូលដ្ឋានគួរតែមានការកត់ត្រា និងចងក្រងជាទិន្នន័យទុក នៅក្នុងករណីដែលមិនបានធ្វើ ប៉ុន្តែបើសិនជាបានធ្វើដែរគួរតែចែករំលែកជាសាធារណៈ ពីព្រោះវាក៏ជាបញ្ហាសង្គមដែលសមាជិកសង្គមគួរតែដឹងដែរ ។
បែរមកបញ្ហារឿងចំណងនៃការកសាងសុភមង្គមក្នុងគ្រួសារយើងនេះវិញ ប្រសិនបើយើងចង់បានគ្រួសារមួយដែលមានសុភមង្គលរឿងចាំបាច់មួយដែល បុរសនិងនារី ត្រូវរិះគិតនិងពិចារណាមុននឹងចាប់ដៃគ្នាកសាងបង្កើតគ្រួសារមួយ ដោយមិនប្រឈមមុខនឹងការបែកបាក់គ្នានោះ គឺបុរសនិងស្ត្រី ឬអាចនិយាយថា កម្លោះនិងក្រមុំគួរតែរកដៃគូណា ដែលពួកគេហ៊ានទទួលគ្រួសារទាំងសងខាង មុនគេបង្អស់ ។
ជាទូទៅនៅពេលដែលនៅលីវ ឪពុកម្តាយគឺមានតែ១ទេ ប៉ុន្តែនៅពេលដែលយើងរៀបការរួចឪពុកម្តាយត្រូវឡើង២ ដូច្នេះ វាចាំបាច់បំផុតដែលបុរស និងស្ត្រីក្រៅពីសម្លឹងមើលទឹកចិត្តដៃគូ មើលភាពសក្តិសម មើលអត្តចរិត មើលការងារ មើលទ្រព្យមើលសម្បត្តិ ហើយរូបសម្បត្តិហើយនោះគឺត្រូវតែមើលគ្រួសារ ទាំងសងខាង ។ ត្រង់ចំណុចនេះ សុភាសិតខ្មែរបុរាណពោលគឺមិនខុសទេ «ធ្វើស្រែឲ្យមើលស្មៅ ទុកដាក់កូនចៅអោយមើលផៅសន្តាន » ។
សម្រាប់សង្គមនៅបស្ចឹមប្រទេសគឺជាបរិបទមួយផ្សេង ប៉ុន្តែសម្រាប់កម្ពុជាភាពរសេមរសាមនិងការជំពាក់វាក់វិននៃចំណងគ្រួសារនោះគឺនៅតែស្អិតរមួត។ ដូច្នេះហើយ ទាមទារឲ្យបុរសនិងស្ត្រីរិះគិតនិងថ្លឹងថ្លែង ហើយមើលឲ្យជ្រៅ មុនសម្រេចចិត្តជាក្រោយទើបអាចឈានដល់ការបង្កើតគ្រួសារមួយហើយអាចរស់នៅជាមួយគ្នាប្រកបដោយសុភមង្គលរហូតដល់ចាស់កោងខ្នង មានកូនមានចៅតត្រកូល រហូតដល់ថ្ងៃអវសាន្តរៀងៗខ្លួន ។
សរុបទៅ ដើម្បីឲ្យគ្រួសារមួយមានសុភមង្គល ក្រោយពេលដែលសម្រេចចិត្តរៀបការនឹងគ្នាហើយ គឺដាច់ខាតត្រូវតែរកដៃគូណាដែលហ៊ានទទួលយកការពិតនៃគ្រួសារទាំងសងខាង។ ដូច្នេះ វាចាំបាច់ណាស់ នៅពេលមុនពេលសម្រេចចិត្តបុរស និងស្ត្រី គួរតែស្វែងយល់ពីសមាជិកគ្រួសារទៅវិញទៅមក ឲ្យបានស៊ីជម្រៅមិនមែនសម្លឹងត្រឹមតែរូបសម្បត្តិ ការងារ ទ្រព្យសម្បត្តិ ក៏ដូចជាចរិយាសម្បត្តិរបស់ដៃគូ ប៉ុណ្ណោះទេ ។
គ្រួសារមួយក្រោយពេលរៀបការហើយអាចឈ្លោះគ្នាមិនចេះចប់ និងឈានដល់ បែកកបាក់ ប្រសិនបើមានការលូកលាន់ពីញាតិសណ្តានច្រើនពេក ។ ដូច្នេះ វាក៏ចាំបាច់ដែរ ដែលឪពុកម្តាយ បងប្អូន និងសាច់ញាតិ គួរតែប្រយ័ត្នក្នុងការជ្រៀតជ្រែកច្រើនពេក ដល់ជីវិតប្តីប្រពន្ធរបស់កូនឬសាច់ញាតិ ដោយផ្តល់ការទុកចិត្តដល់ពួកគេក្នុងការដឹកនាំជីវិតអាពាហ៍ពិពាហ៍របស់ពួកគេ ។
ពួកគេរៀបការហើយ វាមានន័យថា ពួកគេបានត្រៀមខ្លួនហើយសម្រាប់រស់នៅជាមួយដៃគូនៃជីវិតមិនថា មានភ្យុះភ្លៀងបោកបក់យ៉ាងណា ចំពោះជីវិតអាពាហ៍ពិពាហ៍របស់ពួកគេឡើយ ។
ចែករំលែកព័តមាននេះ