រាជធានីភ្នំពេញ ៖ បន្ទាប់ពីសាលាឧទ្ធរណ៍ភ្នំពេញ កាលពីល្ងាចថ្ងៃ២៥ ខែមេសាឆ្នាំ២០២៥ បានបើកសវនាការជំនុំជម្រះលើបណ្ដឹងប្ដឹងសារទុក្ខរបស់ជនជាប់ចោទឈ្មោះ ស្រី ស៊ីណា (អតីតឧកញ៉ា) ដែលមិនសុខចិត្តនឹងសេចក្តីសម្រេចរបស់សាលាដំបូងរាជធានីភ្នំពេញ…
រាជធានីភ្នំពេញ ៖ បន្ទាប់ពីសាលាឧទ្ធរណ៍ភ្នំពេញ កាលពីល្ងាចថ្ងៃ២៥ ខែមេសាឆ្នាំ២០២៥ បានបើកសវនាការជំនុំជម្រះលើបណ្ដឹងប្ដឹងសារទុក្ខរបស់ជនជាប់ចោទឈ្មោះ ស្រី ស៊ីណា (អតីតឧកញ៉ា) ដែលមិនសុខចិត្តនឹងសេចក្តីសម្រេចរបស់សាលាដំបូងរាជធានីភ្នំពេញ រួចមក នៅព្រឹកថ្ងៃ៣០ ខែមេសា ឆ្នាំ២០២៥នេះ សាលាឧទ្ធរណ៍ភ្នំពេញ បានប្រកាសសម្រេចតម្កល់សាលក្រមរបស់សាលាដំបូងរាជធានីភ្នំពេញ ទុកជាបានការដដែល និងបដិសេធចោលនូវបណ្តឹងប្តឹងបញ្ចូលសំណុំរឿងតែមួយ ។
ក្នុងពេលប្រកាសសាលដីកានេះ មានការចូលរួមពីមេធាវី គា អ៊ាវ និងមេធាវី សុខ អួង សមាជិកក្រុមអន្តរាគមន៍ បានអមកូនក្តីរងគ្រោះ ចូលស្តាប់ការប្រកាសសាលដីកា របស់សាលាឧទ្ធរណ៍ភ្នំពេញ ពាក់ព័ន្ធនឹងករណីបាញ់ប្រហារបង្កឡើងដោយជនជាប់ចោទ ស្រី ស៊ីណា ផងដែរ ។
សូមជម្រាបថា សាលាដំបូងរាជធានីភ្នំពេញ កាលពីថ្ងៃទី២៣ ខែធ្នូ ឆ្នាំ២០២៤ បានសម្រេចផ្តន្ទាទោស ជនជាប់ចោទឈ្មោះ ស្រី ស៊ីណា ចំនួន ៣ បទល្មើស ៖
១. បទឃាតកម្ម និងប្រើប្រាស់អាវុធដោយគ្មានការអនុញ្ញាត តាមមាត្រា១៩៩ នៃក្រមព្រហ្មទណ្ឌ និងមាត្រា២០ នៃច្បាប់ស្ដីពីការគ្រប់គ្រងអាវុធជាតិផ្ទុះ និងគ្រាប់រំសេវ ដោយដាក់ពន្ធនាគារ ១៥ (ដប់ប្រាំ)ឆ្នាំ និងពិន័យជាប្រាក់ ២លានរៀល។
២. បទប៉ុនប៉ងឃាតកម្ម និងប្រើប្រាស់អាវុធដោយគ្មានការអនុញ្ញាត តាមមាត្រា២៧ មាត្រា១៩៩ នៃក្រមព្រហ្មទណ្ឌ និងមាត្រា២០ នៃច្បាប់ស្ដីពីការគ្រប់គ្រងអាវុធជាតិផ្ទុះ និងគ្រាប់រំសេវ ដោយដាក់ពន្ធនាគារ ១៥ (ដប់ប្រាំ)ឆ្នាំ និងពិន័យជាប្រាក់ ២លានរៀល។
៣. បទរំលោភលើលំនៅឋាន តាមមាត្រា២៩៩ នៃក្រមព្រហ្មទណ្ឌ ដោយដាក់ពន្ធនាគារ ១ (មួយ) ឆ្នាំ និងពិន័យជាប្រាក់ចំនួន ២លានរៀល។
សរុបទាំង ៣ សំណុំរឿងនេះ ជនល្មើស ស្រី ស៊ីណា ត្រូវផ្តន្ទាទោសដាក់ពន្ធនាគារសរុប ៣១ឆ្នាំ និងពិន័យជាប្រាក់ ៦លានរៀល។ ក្រៅពីនេះ ជនជាប់ចោទ ស្រី ស៊ីណា ត្រូវសងសំណងជំងឺចិត្តទៅគ្រួសារជនរងគ្រោះដែលបាត់បង់ជីវិត ក្នុងម្នាក់ៗ ១លានដុល្លារអាមេរិក, ជនរងគ្រោះដែលរងរបួស ២នាក់ ម្នាក់ ២០ ម៉ឺនដុល្លារអាមេរិក និងម្នាក់ទៀត ៣០ម៉ឺនដុល្លារអាមេរិក និងម្ចាស់ផ្ទះដែលត្រូវបានស្រី ស៊ីណា រំលោភលើលំនៅឋាន ចំនួន ៥ម៉ឺនដុល្លារអាមេរិក ៕
ចែករំលែកព័តមាននេះ