រាជធានីភ្នំពេញ ៖ ផ្ទះបោកអ៊ុតខោអាវមួយកន្លែង ត្រូវបានឆ្លងចរន្តទុស្សេខ្សែភ្លើងឆាបឆេះរាលដាលយ៉ាងសន្ធោសន្ធៅ បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចហៅរថយន្តពន្លត់អគ្គិភ័យជួយអន្តរាគមន៍ នៅវេលាម៉ោង៤និង២០នាទីទៀបភ្លឺថ្ងៃទី១ ខែឧសភា ឆ្នាំ២០២៥ ស្ថិតភូមិសាមគ្គី១…
រាជធានីភ្នំពេញ ៖ ផ្ទះបោកអ៊ុតខោអាវមួយកន្លែង ត្រូវបានឆ្លងចរន្តទុស្សេខ្សែភ្លើងឆាបឆេះរាលដាលយ៉ាងសន្ធោសន្ធៅ បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចហៅរថយន្តពន្លត់អគ្គិភ័យជួយអន្តរាគមន៍ នៅវេលាម៉ោង៤និង២០នាទីទៀបភ្លឺថ្ងៃទី១ ខែឧសភា ឆ្នាំ២០២៥ ស្ថិតភូមិសាមគ្គី១ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។
ម្ចាស់ផ្ទះរងគ្រោះឈ្មោះ ស្រីលាភ ភេទស្រី អាយុ៤៣ឆ្នាំ មុខរបរបោកអ៊ុតខោអាវ រស់នៅភូមិកើតហេតុខាងលើ ។ ប្ដីឈ្មោះ អ៊ៀង គឹមហ៊ន អាយុ៥៩ឆ្នាំ មុខរបរលាងម៉ូតូ ។ ប្រភពព័ត៌មានបញ្ជាក់ពីម្ចាស់ផ្ទះរងគ្រោះបានឲ្យដឹងថា មុនពេលកើតហេតុ គាត់កំពុងតែដេកលង់លក់ជាមួយនឹងកូន ចំណែកប្ដីដេកនៅកន្លែងតូបលាងម៉ូតូឯងណោះ ស្រាប់តែឆ្លងចរន្តទុស្សេខ្សែភ្លើងដែលដោតឆ្នាំងអ៊ុតចោលជាមួយនិងព្រីភ្លើងបណ្ដាលឲ្យឆេះរាលដាលយ៉ាងខ្លាំង នៅពេលនោះកូនប្រុសគាត់ដឹងខ្លួនឡើងឃើញភ្លើងកំពុងឆេះបានដាស់ម្ដាយអោយក្រោបឡើងនាំគ្នាស្ទុះស្ទារ រត់ចេញមកខាងក្រៅស្រែកអោយអ្នកជិតខាងជួយ។
ភ្លាមៗនោះដែរ ពលរដ្ឋបាននាំគ្នាយកធុងនិងទុយោទឹក ព្រមទាំងបំពង់ពន្លត់អគ្គិភ័យមកបាញ់ទប់ស្កាត់ដែរ តែភ្លើងឆេះខ្លាំងពេកមិនអាចគ្រប់គ្រងបានក៏ទាក់ទងទៅសមត្ថកិច្ចមូលដ្ឋានសុំជំនួយរថយន្តពន្លត់អគ្គិភ័យមកបាញ់អស់ចំនួនពីររថយន្តទើបភ្លើងរលត់អស់ទាំងស្រុង ។
អគ្គិភ័យនេះ មិនមានបង្កឲ្យមានអ្នកស្លាប់នោះទេ គ្រាន់តែខូចខាតសម្ភារក្នុងផ្ទះប្រក់ស័ង្កសី រួមមាន ដូចជា ម៉ូតូ2គ្រឿង កង់អាគុយ1គ្រឿង ម៉ាស៊ីនភ្លើង2គ្រឿង ទូរទឹកកក3គ្រឿង ទូរបោកគក់5គ្រឿង។ ក្រោយពេលកើតហេតុបន្ទាប់ពីគ្រប់គ្រងបាញ់ពន្លត់ភ្លើងដែលឆេះបានទាំងស្រុងខាងជំនាញបង្ការពន្លត់អគ្គិភ័យក៏បានត្រឡប់វិលចូលទៅគោលដៅវិញអស់ ៕
ចែករំលែកព័តមាននេះ