រាជធានីភ្នំពេញ ៖ គិតត្រឹមឆ្នាំ២០២៥ ការអនុវត្តការងារគណនេយ្យភាពសង្គម បាននិងកំពុងអនុវត្តនៅក្នុងក្រុង ស្រុក ខណ្ឌគោលដៅចំនួន១៩០ នៃរាជធានី ខេត្តចំនួន២៥ ។…
រាជធានីភ្នំពេញ ៖ គិតត្រឹមឆ្នាំ២០២៥ ការអនុវត្តការងារគណនេយ្យភាពសង្គម បាននិងកំពុងអនុវត្តនៅក្នុងក្រុង ស្រុក ខណ្ឌគោលដៅចំនួន១៩០ នៃរាជធានី ខេត្តចំនួន២៥ ។
លេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.) សហការជាមួយនឹងរដ្ឋបាលខេត្តកណ្តាល និងអង្គការទស្សនៈពិភពលោកអន្តរជាតិ បានរៀបចំកម្មវិធីដំណើរទស្សនកិច្ចសិក្សាស្វែងយល់អំពីការអនុវត្តការងារគណនេយ្យភាពសង្គម និងការវិភាជន៍ថវិកា គាំទ្រអនុវត្តការងារគណនេយ្យភាពសង្គម នាថ្ងៃទី២០ ខែវិច្ឆិកា ឆ្នាំ២០២៥ ក្នុងខេត្តកណ្តាល ។
កម្មវិធីនេះរៀបចំឡើងក្នុងគោលបំណងផ្តល់ឱកាសឱ្យក្រសួង ស្ថាប័ន សមាជិក សមាជិកា នៃក្រុមការងារគណនេយ្យភាពសង្គមថ្នាក់ខេត្ត រាជធានី និងអ្នកពាក់ព័ន្ធ បានសិក្សាស្វែងយល់អំពីការអនុវត្តល្អៗ និងចែករំលែកបទពិសោធន៍គ្នាទៅវិញទៅមក ជុំវិញការងារគណនេយ្យភាពសង្គម និងដំណើរការ នៃការវិភាជន៍ថវិការបស់រដ្ឋបាលថ្នាក់ក្រោមជាតិ ។
កម្មវិធីដំណើរទស្សនកិច្ចនេះ គឺជាគំនិតផ្តួចផ្តើមថ្មីមួយ ក្នុងការគិតគូរអំពីការធានា នូវនិរន្តរភាព នៃការអនុវត្តការងារគណនេយ្យភាពសង្គមនៅថ្នាក់ឃុំ សង្កាត់ ក្រោយពេលការដកថយរបស់ដៃគូអភិវឌ្ឍន៍ និងអង្គការសង្គមស៊ីវិល តាមរយៈការបញ្ជ្រាបការងារគណនេយ្យភាពសង្គមទៅក្នុងប្រព័ន្ធរដ្ឋបាលថ្នាក់ជាតិ និងថ្នាក់ក្រោមជាតិ ។
ជាមួយគ្នានេះ រដ្ឋបាលថ្នាក់ក្រោមជាតិ ពិតជាបានបែងចែកថវិកាសម្រាប់គាំទ្រដំណើរការអនុវត្តការងារគណនេយ្យភាពសង្គម សំដៅធានានូវនិរន្តរភាពការអនុវត្តការងារគណនេយ្យភាពសង្គមក្នុងដែនសមត្ថកិច្ចរបស់ខ្លួន ។
គិតត្រឹមឆ្នាំ២០២៥ ការអនុវត្តការងារគណនេយ្យភាពសង្គម បាននិងកំពុងអនុវត្តនៅក្នុងក្រុង ស្រុក ខណ្ឌ គោលដៅចំនួន១៩០ នៃរាជធានី ខេត្តចំនួន២៥ ដោយគ្របដណ្តប់លើការផ្តល់សេវារបស់រដ្ឋបាលឃុំសង្កាត់ចំនួន១.៥៥០ស្មើនឹង៩៤% នៃឃុំ សង្កាត់ ទូទាំងប្រទេសសាលាបឋមសិក្សាចំនួន៦.៩២២ ស្មើនឹង៩៤%នៃសាលាបឋមសិក្សាទូទាំងប្រទេស មណ្ឌលសុខភាពចំនួន១.២៥៦ ស្មើនឹង៩៦% នៃមណ្ឌលសុខភាពទូទាំងប្រទេស និងការផ្តល់សេវារបស់រដ្ឋបាលក្រុង ស្រុក ខណ្ឌចំនួន៥៤ ស្មើនឹង២៦% នៃក្រុង ស្រុក ខណ្ឌទូទាំងប្រទេស ។
នៅក្នុងការចូលរួមចំណែកគាំទ្រការអនុវត្តផែនការអនុវត្តការងារគណនេយ្យភាពសង្គម ដំណាក់កាលទី២ (ISAF II) លេខាធិការដ្ឋាន គ.ជ.អ.ប. បានទទួលការគាំទ្រថវិកាពីរដ្ឋាភិបាលស្វីស រដ្ឋាភិបាលអាល្លឺម៉ង់ និងរដ្ឋាភិបាលអូស្ត្រាលីតាមរយៈមូលនិធិបរធនបាលកិច្ច (Trust Fund) ដែលសម្របសម្រួលដោយធនាគារពិភពលោក ដោយបាននឹងកំពុងអនុវត្តនៅក្នុងនៅក្នុងក្រុង ស្រុក ខណ្ឌគោលដៅចំនួន១០២ នៃរាជធានី ខេត្តចំនួន២០ ដោយគ្របដណ្តប់លើការផ្តល់សេវារបស់រដ្ឋបាលឃុំ សង្កាត់ចំនួន៨៦៥ ស្មើនឹង៥២% នៃឃុំ សង្កាត់ទូទាំងប្រទេស សាលាបឋមសិក្សា ចំនួន៣.៩០៣ ស្មើនឹង៥១% នៃសាលាបឋមសិក្សាទូទាំងប្រទេស មណ្ឌលសុខភាពចំនួន៦៩៤ ស្មើនឹង៥៣% និង ការផ្តល់សេវារបស់រដ្ឋបាលក្រុង ស្រុក ខណ្ឌចំនួន២០ ស្មើនឹង១០% នៃក្រុង ស្រុក ខណ្ឌទូទាំងប្រទេស។
ឯកឧត្តម ម៉ាអុន ម៉ាអូណាត អនុប្រធានលេខាធិការដ្ឋាន គ.ជ.អ.ប. និងជានាយកគម្រោងសមាហរណកម្មគណនេយ្យភាពសង្គមទៅក្នុងប្រព័ន្ធរដ្ឋបាលថ្នាក់ជាតិ និងថ្នាក់ក្រោមជាតិ ដំណាក់កាលទី២ (ISAF II) បានមានប្រសាសន៍ថា៖ «គំនិតផ្តួចផ្តើមនៃកម្មវិធីទស្សនកិច្ចសិក្សានេះ ឆ្លុះបញ្ចាំងពីការប្តេជ្ញាចិត្តជាបន្តបន្ទាប់របស់រដ្ឋាភិបាលក្នុងការពង្រឹងការចូលរួមរបស់ប្រជាពលរដ្ឋ និងធ្វើឱ្យប្រសើរឡើងនូវគុណភាពនៃការផ្តល់សេវាសាធារណៈនៅមូលដ្ឋាន ឱ្យកាន់តែប្រសើរឡើង»។
លោកស្រី Manuela Fariaប្រធានដឹកនាំក្រុមការងារបច្ចេកទេសនៃធនាគារពិភពលោកប្រចាំនៅកម្ពុជា បានមានប្រសាសន៍ថា៖ «ធនាគារពិភពលោក មានសេចក្តីសោមនស្សរីករាយក្នុងការគាំទ្រគំនិតផ្តួចផ្តើមនេះ ដែលបង្កើតឡើងដោយផ្អែកលើវឌ្ឍនភាពរបស់ប្រទេសកម្ពុជាក្នុងការលើកកម្ពស់ការទទួលខុសត្រូវសង្គម និងពង្រឹងភាពជាម្ចាស់របស់រដ្ឋាភិបាល។ តាមរយៈការគាំទ្រចំពោះកិច្ចខិតខំប្រឹងប្រែងទាំងនេះ យើងកំពុងចូលរួមបង្កើននូវតម្លាភាព ការទទួលខុសត្រូវ និងសេវាធារណៈប្រកបដោយបរិយាបន្ន ដែលជាអាទិភាពគន្លឹះសម្រាប់កិច្ចការងារអភិវឌ្ឍប្រទេសកម្ពុជាសម្រាប់បង្កើនឱកាស និងការងារសមរម្យដល់ប្រជាពលរដ្ឋរបស់ខ្លួន» ។
ឯកឧត្តម ប្រាក់ សារ៉ាត់ អភិបាលរងខេត្តកណ្តាល និងជាប្រធានក្រុមការងារគណនេយ្យភាពសង្គមថ្នាក់ខេត្ត បានលើកឡើងថា៖ «តាមរយៈការផ្លាស់ប្ដូរនេះ យើងរៀនពីបទពិសោធន៍ពីគ្នាទៅវិញទៅមក ដើម្បីបម្រើប្រជាពលរដ្ឋរបស់យើងឱ្យកាន់តែប្រសើរឡើង និងធានាបាននូវអភិបាលកិច្ចដែលមានតម្លាភាព គណនេយ្យភាព និងប្រសិទ្ធភាពនៃការផ្តល់សេវាកាន់តែប្រសើរឡើង» ។
លោក លឹម ប៊ុន នាយកគម្រោងការចូលរួមរបស់ប្រជាពលរដ្ឋដើម្បីកែលម្អការផ្តល់សេវាតាមរយៈគណនេយ្យសង្គមនៃអង្គការទស្សនៈពិភពលោកអន្តរជាតិ បានមានប្រសាសន៍ថា៖ «យើងខ្ញុំមានសេចក្តីសោមនស្សរីករាយយ៉ាងខ្លាំង និងគាំទ្រអោយមានទស្សនៈកិច្ចសិក្សានេះ ដែលបង្ហាញពីការប្តេជ្ញាចិត្តរួមគ្នារបស់យើងក្នុងការពង្រឹងអភិបាលកិច្ចមូលដ្ឋាន លើកកម្ពស់តម្លាភាព គណនេយ្យភាព ការចូលរួមរបស់ប្រជាពលរដ្ឋ និងធានាថាសំលេងរបស់ប្រជាពលរដ្ឋត្រូវបានឭក្នុងការផ្តល់សេវា» ។
សរុបជារួមការអនុវត្តការងារគណនេយ្យភាពសង្គម ដែលដឹកនាំ និងសម្របសម្រួលដោយលេខាធិការដ្ឋាន គ.ជ.អ.ប. បានរួមចំណែកយ៉ាងសំខាន់ក្នុងការធ្វើឱ្យប្រសើរឡើងការផ្តល់សេវាសាធារណៈមូលដ្ឋាន និងការចូលរួមរបស់ប្រជាពលរដ្ឋ ក្នុងគោលដៅលើកកម្ពស់សេដ្ឋកិច្ចនៅមូលដ្ឋានឆ្លើយតបនឹង ការងារកំណែទម្រង់វិមជ្ឈការ និងវិសហជ្ឈការនៅកម្ពុជា ៕
ចែករំលែកព័តមាននេះ