ខេត្តកំពង់ឆ្នាំង ៖ បុរសវ័យចំណាស់ម្នាក់បានស្លាប់ភ្លាមៗ ជាប់ក្រោមរថយន្ត ជាមួយរ៉ឺម៉កម៉ូតូរបស់គាត់ ខណៈដែលមានរថយន្តដឹកកុងតឺន័រមួយគ្រឿងបានបើកបុកពីក្រោយ ហើយក្រឡាប់សង្កត់ពីលើបុរសរងគ្រោះ ក្នុងទិសដៅស្របគ្នា ។ ហេតុការណ៍គ្រោះថ្នាក់ចរាចរណ៍ដ៏រន្ធត់នេះបានកើតឡើងកាលពីម៉ោង៥និង…
ខេត្តកំពង់ឆ្នាំង ៖ បុរសវ័យចំណាស់ម្នាក់បានស្លាប់ភ្លាមៗ ជាប់ក្រោមរថយន្ត ជាមួយរ៉ឺម៉កម៉ូតូរបស់គាត់ ខណៈដែលមានរថយន្តដឹកកុងតឺន័រមួយគ្រឿងបានបើកបុកពីក្រោយ ហើយក្រឡាប់សង្កត់ពីលើបុរសរងគ្រោះ ក្នុងទិសដៅស្របគ្នា ។ ហេតុការណ៍គ្រោះថ្នាក់ចរាចរណ៍ដ៏រន្ធត់នេះបានកើតឡើងកាលពីម៉ោង៥និង ៣០នាទីទៀបភ្លឺថ្ងៃទី២២ ខែមករា ឆ្នាំ២០១៩ នៅចន្លោះគីឡូម៉ែត្រលេខ៧០ និង៧១ លើកំណាត់ផ្លូវជាតិលេខ៥ នៅចំណុចត្រពាំងត្រីរ៉ស់ ស្ថិតក្នុងភូមិរនាមទទឹង ឃុំទឹកហូត ស្រុករលាប្អៀរ ខេត្តកំពង់ឆ្នាំង ។
សមត្ថកិច្ចនគរបាលចរាចរណ៍ នៅកន្លែងកើតហេតុបានអោយដឹងថា មុនពេលកើតហេតុ មានរថយន្តកុងតឺន័រមួយគ្រឿងម៉ាកហ្វុ៊យសូ ពណ៌ស ពាក់ផ្លាកលេខ ចង្កូតស្តាំ ភ្នំពេញ PP-2307 បើកបរក្នុងទិសដៅជើងទៅត្បូង លុះពេលមកដល់ចំណុចកើតហេតុក៏បានបុកម៉ូតូសង់កូរ៉េមួយគ្រឿងមានសណ្តោងរ៉ឺម៉កដឹកអេតចាយ ក្នុងទិសដៅស្របគ្នា ហើយរថយន្តកុងតឺន័របានក្រឡាប់ និងកិនពីលើរ៉ឺម៉កម៉ូតូ ព្រមទាំងអ្នកបើកបររ៉ឺម៉កម៉ូតូដឹកអេតចាយ បណ្តាលឱ្យស្លាប់កៀបជាប់ក្រោមរថយន្តតែម្តង ។ ក្រោយពេលកើតហេតុអ្នកបើកបររថយន្តកុងតឺន័របាន រត់គេចខ្លួនបាត់ ។
ករណីគ្រោះថ្នាក់ចរាចរណ៍ដ៏រន្ធត់នេះ ក៏បានធ្វើអោយមានការកកស្ទះចរាចរណ៍ផងដែរ ព្រោះតែអ្នកបើកបររថយន្តតាមដងផ្លូវបាននាំគ្នាឈប់មើលនៅចំណុចកើតហេតុ រហូតដល់ម៉ោង៩និង២០នាទីព្រឹកថ្ងៃដដែល ទើបសមត្ថកិច្ចទំនាក់ទំនងបានរថយន្តស្ទូចធុនធំមកស្ទូចរថយន្តកុងតឺន័រចេញ ដើម្បីយកសពបុរសរងគ្រោះ និងរ៉ឺម៉កម៉ូតូចេញមកក្រៅ ។
នៅជាប់ខ្លួនបុរសរងគ្រោះដែលស្លាប់ សមត្ថកិច្ចបានរកឃើញកាបូបមួយដែលមានលុយចំនូន៣០០០រៀល និងអត្តសញ្ញាណប័ណ្ណសំគាល់ខ្លួនមួយសន្លឹករបស់បុរសរងគ្រោះឈ្មោះ រស់ វុត្ថា អាយុ៥២ឆ្នាំ មានទីលំនៅក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប និងមានស្រុកកំណើតនៅក្នុងឃុំបឹងជ្រះ ស្រុកបាភ្នំ ខេត្តព្រៃវែង ។ ប៉ុន្តែគេឃើញបុរសរងគ្រោះដើរទិញអេតចាយរាល់ថ្ងៃ ដោយមកស្នាក់នៅក្នុងស្រុករលាប្អៀរ ។
តាមការពិនិត្យនៅកន្លែងកើតហេតុ សមត្ថកិច្ចបានបញ្ជាក់ឲ្យដឹងថា ករណីគ្រោះថ្នាក់នេះបណ្តាលមកពីអ្នកបើកបររថយន្តកុងតឺន័របើកបរក្នុងស្ថានភាពងងុយដេក ព្រោះគេឃើញរថយន្តនេះបើករេពេញផ្លូវ ហើយបន្ទាប់មកជិតដល់គល់ស្ពានត្រពាំងត្រីរ៉ស់ ក៏បានបុករ៉ឺម៉កម៉ូតូដឹកអេតចាយរបស់ជនរងគ្រោះតែម្តង ។
សមត្ថកិច្ចអោយដឹងថា ចំពោះសពបុរសរងគ្រោះ សមត្ថកិច្ចនឹងជូនដំណឹងអំពីអត្តសញ្ញាណរប ស់គាត់ទៅកាន់សមត្ថកិច្ចនគរបាលនៅក្នុងក្រុងសៀមរាប ខេត្តសៀមរាប ដើម្បីទំនាក់ទំនងរកក្រុមគ្រួសារ អោយ
មកទទួលយកសពទៅធ្វើបុណ្យតាមប្រពៃណី ។ ចំណែករ៉ឺម៉កម៉ូតូរបស់ជនរងគ្រោះ និងរថយន្តកុងតឺន័រ សមត្ថកិច្ចនឹងជួលរថយន្តស្ទួចមកដឹកយកទៅរក្សាទុក នៅក្នុងការិយាល័យនគរបាលចរាចរណ៍ផ្លូវគោកខេត្តកំពង់ឆ្នាំង ដើម្បីកសាងសំណុំរឿងចាត់ការតាមនីតិវិធីច្បាប់ ៕
ចែករំលែកព័តមាននេះ