រាជធានីភ្នំពេញ ៖ ពុយ វណ្ណៈ មកពីក្លិបឃ្លាំមឿងកីឡា នៅតែបន្តរបូតបាត់អស់៣ពិន្ទុ បន្ទាប់ពីប្រកួតចាញ់កីឡាករថៃ Phit Sayfar ដោយពិន្ទុសម្រាប់ការប្រកួតក្នុងជុំទី២ វគ្គសន្សំពិន្ទុឈានទៅដណ្ដើមជើងឯកខ្សែក្រវាត់អន្តរជាតិនៅលើសង្វៀស៊ីធីអិុន កាលពីព្រឹកថ្ងៃអាទិត្យ ទី២០ មករា ខណៈ ផាន់ គ្រាន់ មកពីក្លិបពុទ្ធស៊េរីវង្សពោធិ៍សែនជ័យ ទទួលបាន៣ពិន្ទុដោយស្វ័យប្រវត្តិ ដោយសាតែកីឡាករថៃCheck Nuon រក្សាទម្ងន់មិនបាន។
ពុយ វណ្ណៈ សម្រាប់ការប្រកួត២លើកជាប់គ្នាមកនេះ ចាញ់ទាំង២លើកតែម្ដង រហូតមកទល់ពេលនេះ ទើបតែមាន២ពិន្ទុនៅក្នុងដៃប៉ុណ្ណោះ។ ម្យ៉ាងវិញទៀតបើទោះជាគេនៅសល់២ប្រកួតនៅក្នុងដៃទៀតក៏ដោយ សម្រាប់ឱកាសឡើងទៅកាន់កៅអីប្រកួតវគ្គបន្តសង្ឃឹមតិចបំផុត។ មិនតែប៉ុណ្ណោះ ពុយ វណ្ណៈ បានក្លាយជាបេក្ខភាពតែម្នាក់គត់ក្នុងចំណោមកីឡាករកម្ពុជា ទាំង៤រូបដែលគេមើលឃើញថា នឹងអាចជ្រុះចេញពីការប្រកួតវគ្គសន្សំពិន្ទុនេះ ចំណែកកីឡាករថៃ Phit Sayfer ការប្រកួតទាំង២លើកមកនេះ ឈ្នះទាំង២លើកជាប់គ្នាមាន៦ពិន្ទុនៅក្នុងដៃ។
រីឯកីឡាករ ផាន់ គ្រាន់វិញនោះ ដែលត្រូវជួបប្រកួតជាមួយ Check Nuon លើកនេះធ្វើឡើងជាលក្ខណៈមិត្តភាពប៉ុណ្ណោះ ហើយត្រូវបានគណៈកម្មការរៀបចំការប្រកួតសម្រេចឱ្យ៣ពិន្ទុដោយស្វ័យប្រវត្តិ ដោយសាតែកីឡាករថៃម្នាក់នេះ រក្សាទម្ងន់មិនបាន។
ផាន់ គ្រាន់កាលពីប្រកួតនៅសប្ដាហ៍ទី១ ក៏គេត្រូវបានគណៈកម្មការរៀបចំការប្រកួតប្រកាសឱ្យចាញ់កីឡាករថៃ ដោយស្វ័យប្រវត្តិរួចម្ដងមកហើយដែរ ព្រោះតែគេរក្សាទម្ងន់មិនបាន។ ដូច្នេះ ផាន់ គ្រាន់ ការប្រកួតទាំង២លើកមកនេះ ចាញ់១ប្រកួតឈ្នះ១ប្រកួត មាន៤ពិន្ទុនៅក្នុងដៃរួចទៅហើយ ៗគេនៅមានសង្ឃឹមច្រើនក្នុងការឡើងទៅកាន់កៅអីប្រកួតវគ្គបន្ត។
ដោយឡែកចំពោះគូប្រកួតមិត្តភាពវិញនោះ ឡុង រ៉ាមី មកពីក្លិបខ្លារខិនមានរឹទ្ធប្រកួតឈ្នះកីឡាករថៃឈ្មោះ Ak Kharadeth ដោយពិន្ទុ ខណៈផុន សុខវិបុល ក្លិបតាព្រហ្មមានជ័យ ប្រកួតឈ្នះ ធន់ វិណ្ណុ ក្លិបមជ្ឈមណ្ឌល ខ.ភ.ម ដោយពិន្ទុ៕
ចែករំលែកព័តមាននេះ