រាជធានីភ្នំពេញ ៖ ក្រោមគំនិតផ្តួចផ្តើមដោយព្រះតេជគុណជោតិសុវណ្ណ យ៉ែម សុទ្ធ ទីប្រឹក្សាផ្ទាល់សម្តេចព្រះមហាសុមេធាធិបតី នន្ទ ង៉ែត ជាព្រះធម្មធរ ខណ្ឌសែនសុខ និងជាព្រះគ្រូចៅអធិការវត្តសុវណ្ណមុនីវង្ស ហៅវត្តអន្លង់ក្ងាន ព្រះសង្ឃ និងគណៈកម្មការវត្ត បាននិងកំពុងស្ថាបនាប្រាសាទចំនួន៣ ដែលមានចារឹកគម្ពីរព្រះត្រៃបិដកលើផ្ទាំងសិលា ចំនួន ៨៤០០០ធម្មក្ខន្ធ ស្មើនឹង ១១០ក្បាលសៀវភៅ បិទនៅលើជញ្ជាំងប្រាសាទក្នុងវត្តនេះ ក្នុងបំណង ដើម្បីទុកជាកេរ្តិ៍មរតកប្រវត្តិសាស្ត្រព្រះពុទ្ធសាសនា និងលើកស្ទួយវិស័យព្រះពុទ្ធសាសនា ឲ្យបានស្ថិតស្ថេរគង់វង្សយូរអង្វែងតរៀងទៅ ខណៈដែលព្រះគ្រូចៅអធិការ និងគណៈកម្មការវត្ត បានដង្ហើយរកសប្បុរសជន ក៏ដូចជាពុទ្ធបរិស័ទទាំងក្នុង និងក្រៅប្រទេសឱ្យជួយចូលរួមកសាង ។
វត្តសុវណ្ណមុនីវង្ស ហៅវត្តអន្លង់ក្ងាន មានទីតាំងស្ថិតនៅក្នុងសង្កាត់ឃ្មួញ ខណ្ឌសែនសុខ រាជធានីភ្នំពេញ ។ វត្តនេះ កសាងឡើងក្នុងឆ្នាំ១៩៩៥ អាចចាត់ទុកជាវត្តថ្មី តែសមិទ្ធិផលនានា បានកើតឡើងយ៉ាងសន្ធឹកសន្ធាប់ ដូចជា ព្រះវិហារ ដងទង់ធំមួយគូ ឧបដ្ឋានសាលា កុដិតូចធំ ស្រះទឹក ព្រមទាំងបានកសាងប្រាសាទជាប្រវត្តិសាស្ត្រចំនួន៣ ទៀតគួរឲ្យកោតសសើរ ហើយសមិទ្ធិផលទាំងនេះ គឺកើតឡើងក្រោមការដឹកនាំកសាងប្រកបដោយភាពប៉ិនប្រសព្វរបស់ព្រះតេជគុណជោតិសុវណ្ណ យ៉ែម សុទ្ធ ជាព្រះគ្រូចៅអធិការវត្ត និងមានការជួយជ្រោមជ្រែងចូលរួមពីគណៈកម្មការវត្ត ក៏ដូចជាពុទ្ធបរិស័ទ និងសប្បុរសជននានាផងដែរ ។
ព្រះតេជគុណជោតិសុវណ្ណ យ៉ែម សុទ្ធ ព្រះគ្រូចៅអធិការវត្តសុវណ្ណមុនីវង្ស ហៅវត្តអន្លង់ក្ងាន បានមានសង្ឃដីកាថា ទាំងព្រះសង្ឃ និងគណៈកម្មការអាចារ្យវត្ត ក៏ដូចជាពុទ្ធបរិស័ទចំណុះជើងវត្ត កាលពីឆ្នាំ២០១១ បានមូលមតិគ្នាជាឯកច្ឆន្ទកសាងប្រាសាទចំនួន៣ គឺប្រាសាទព្រះវិន័យបិដក ប្រាសាទព្រះសុតន្តបិដក និងប្រាសាទព្រះអភិធម្មបិដក ដោយការកសាងប្រាសាទនេះ ដើម្បីតម្កល់នូវផ្ទាំងសិលាចារឹកគម្ពីរព្រះត្រៃបិដកទាំង៣ គឺព្រះវិន័យបិដក ព្រះសុតន្តបិដក និងព្រះអភិធម្មបិដក សរុបទាំងអស់គឺ ៨៤០០០ព្រះធម្មក្ខន្ធ ស្មើនឹង ១១០ក្បាលសៀវភៅ ។
សព្វថ្ងៃសាងសង់បានប្រាសាទចំនួន២ និងចារជិតចប់ព្រះវិន័យបិដកហើយ ក្នុងរយៈពេលជាងមួយឆ្នាំកន្លងមក ដោយកំណត់ឲ្យចប់រយៈពេល ៧ឆ្នាំ ។ ព្រះតេជគុណជោតិសុវណ្ណ យ៉ែម សុទ្ធ មានសង្ឃដីកាទៀតថា តាំងពីសម័យពុទ្ធកាលមកមិនដែលមានចារឹកគម្ពីរព្រះត្រៃបិដកលើផ្ទាំងសិលាទេ ដែលគេចារគម្ពីរព្រះត្រៃបិដកតែនៅលើស្លឹករឹត ឬបោះពុម្ពជាសៀវភៅប៉ុណ្ណោះ ទើបតែសម័យបច្ចុប្បន្ននេះ បានយកព្រះត្រៃបិដកទាំង ១១០ក្បាល ចារឹកលើផ្ទាំងសិលា ហើយការចារនេះ គោរពទៅតាមលំអានច្បាប់ដើមទាំងស្រុង ក្នុងគោលបំណង ដើម្បីទុកជាកេរ្តិ៍មរតកប្រវត្តិសាស្ត្រព្រះពុទ្ធសាសនាឲ្យបានស្ថិតស្ថេរគង់វង្សយូរអង្វែងតរៀងទៅ ហើយផ្ទាំងសិលាចារគម្ពីព្រះត្រៃបិដកនេះ មួយសន្លឹកតម្លៃ ៥០០ដុល្លារ ។ សូមពុទ្ធបរិស័ទទាំងអស់មេត្តាចូលចាប់មគ្គផលតាមកម្លាំងសទ្ធាជ្រះថ្លារៀងៗខ្លួន ប្រសិនបើពុទ្ធបរិស័ទមានសទ្ធាជ្រះថ្លាមួយសន្លឹក ឬពីរសន្លឹកក្តី នឹងមានចារឈ្មោះពុទ្ធបរិស័ទជាប់ផ្ទាំងសិលានោះ ។
គួរបញ្ជាក់ថា ទាំងព្រះសង្ឃ និងគណៈកម្មការវត្តសុវណ្ណមុនីវង្ស ហៅវត្តអន្លង់ក្ងាន បានអំពាវនាវដល់សប្បុរសជនទាំងឡាយទាំងក្នុង និងក្រៅប្រទេស សុំឲ្យជួយចូលរួមចូលចាប់មគ្គផលតាមសទ្ធាជ្រះថ្លា និងសូមប្រសិទ្ធិពរជ័យជូនចំពោះពុទ្ធបរិស័ទទាំងអស់ សូមបានសម្រេចនូវសេចក្តីសុខ សេចក្តីចម្រើន សមដូចសេចក្តីប្រាថ្នាកុំបីអាក់ខានឡើយ ។ ចំពោះពុទ្ធបរិស័ទដែលមានសទ្ធាជ្រះថ្លា និងចូលចាប់មគ្គផល សូមធ្វើការទំនាក់ទំនងមកកាន់លេខទូរស័ព្ទ ០១២ ២០១ ៨៩១ ឬ ០៩២ ១៨៤ ១១៦ សូមអរព្រះគុណ និងអគុណ ៕
ចែករំលែកព័តមាននេះ