ខេត្តព្រះសីហនុ ៖ វាពិតជាមហាសំណាងមែន ដែលបុរសម្នាក់និងកូនស្រីវ័យប្រមាណ១០ឆ្នាំរួចផុតពីគ្រោះថ្នាក់ដល់ជីវិត បើទោះបីជារងរបួសបន្តិចបន្តួចយ៉ាងណាក្តី បន្ទាប់ពីត្រូវជនសង្ស័យ២នាក់សំរុកចូលក្នុងផ្ទះជនរងគ្រោះ ហើយយកកាំភ្លើងភ្ជង់ និងកាំបិតមកចាក់បុរសរងគ្រោះក្នុងគោលបំណងប្លន់ តែត្រូវបុរសរងគ្រោះតដៃប្រវាយប្រតប់រហូតក្រុមចោរភ័យស្លន់ស្លោរត់ចែកជើងគ្នា បង្កឱ្យមានការផ្អើលឆោឡោកាលម៉ោងប្រមាណ៦និង៤៥នាទីល្ងាច ថ្ងៃទីថ្ងៃទី១៦ ខែមករា ឆ្នាំ២០១៩ ត្រង់ចំណុចក្បែរឱសថស្ថានកំពង់សោមថ្មីឈុត ស្ថិតក្នុងភូមិ២ សង្កាត់លេខ០៤ ក្រុងនិងខេត្តព្រះសីហនុ ។
ជុំវិញករណីប្លន់នេះ បើយោងតាមជនរងគ្រោះឈ្មោះ លី កៅ ភេទប្រុស អាយុ៥២ឆ្នាំ មានមុខរបរជាអាជីវករក្នុងផ្សារលើ ក្រុងព្រះសីហនុ បានឱ្យដឹងថា នៅវេលាកើតហេតុ រូបគាត់កំពុងចូលក្នុងបន្ទប់ទឹក ស្រាប់តែមានជនសង្ស័យ២នាក់ស្ទុះចូលមកក្នុងបន្ទប់ទឹករបស់គាត់ ហើយបម្រុងយកកាំបិតចាក់ ឯម្នាក់ទៀតទាញកាំភ្លើងមកភ្ជង់កូនស្រីរបស់គាត់ ប៉ុន្តែគាត់ធ្វើការប្រវាយប្រតប់ បណ្តាលឲ្យជនរងគ្រោះត្រូវរងរបួស ដោយសារក្រុមជនសង្ស័យចាក់ចំក្បាលពោះ។
ជនរងគ្រោះបន្តថា ស្របពេលមានការប្រវាយប្រតប់ជាមួយក្រុមជនសង្ស័យ រូបគាត់ស្រែកឱ្យអ្នកជិតខាងជួយហើយក៏មានប្រជាពលរដ្ឋមួយចំនួនរត់សំដៅមកផ្ទះគាត់ ទើបក្រុមជនសង្ស័យមានការភ័យស្លន់ស្លោរត់គេចខ្លួន ដោយពុំអាចយកអ្វីពីរូបគាត់បាននៅឡើយ។
ជុំវិញហេតុការណ៍នេះ តាមប្រភពសមត្ថកិច្ចបញ្ជាក់ជំហានដំបូងថា ក្រុមជនសង្ស័យនេះអាចមានគ្នាចំនួន២ទៅ៣នាក់ ប៉ុន្តែពួកគេអាចធ្វើសកម្មភាព២នាក់ ឯម្នាក់អាចនៅចាំមើលផ្លូវ ហើយក្រុមជនសង្ស័យ គឺពុំអាចមានកាំភ្លើងពិតប្រាកដនោះទេ អាចជាកាំភ្លើងជ័រ ព្រោះបើយោងតាមសកម្មភាពប្រវាយប្រតប់ ប្រសិនបើជាមានកាំភ្លើងពិតប្រាកដ ម្ល៉េះសមជនរងគ្រោះពុំអាចមានជីវិតរស់បានទេ គឺជនសង្ស័យមិនអាចទុកឱកាសឱ្យជនរងគ្រោះតដៃបានទេ។ ប៉ុន្តែបើទោះបីជាយ៉ាងក្តី ក្នុងសំណុំរឿងនេះសមត្ថកិច្ចកំពុងឆែកឆេរកាមេរ៉ាសុវត្ថិភាពផ្ទះប្រជាពលរដ្ឋនៅក្បែរនោះ ដើម្បីកំណត់អត្តសញ្ញាណស្វែងរកចាប់ខ្លួនយកមកផ្តន្ទាទោសតាមច្បាប់៕
ចែករំលែកព័តមាននេះ