រាជធានីភ្នំពេញ ៖ ជនសង្ស័យ២នាក់ ធ្វើសកម្មភាពឆក់ទូរសព្ទពីនារីម្នាក់ ដែលកំពុងដើរតាមផ្លូវ បានសម្រេច រួចជិះរត់គេចខ្លួនទៅពួនសំងំនៅក្នុងខុនដូ បានប្រមាណ២០នាទី ត្រូវបានសមត្ថកិច្ចឃាត់ខ្លួនបានភ្លាមៗ តាមរយៈប្រព័ន្ធ iCloud ក្នុងទូរសព្ទរបស់ជនរងគ្រោះ ។
ហេតុការណ៍កើតឡើងកាលពីវេលាម៉ោង១១ព្រឹកថ្ងៃទី៩ ខែឧសភា ឆ្នាំ២០២៤ ស្ថិតបណ្តោយផ្លូវលេខ៣៦០ ក្នុងសង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ ។
សមត្ថកិច្ចបានឲ្យដឹងថា ជនសង្ស័យទី១ មានឈ្មោះ ចាន់ សុភារម្យ ភេទប្រុស មិនបញ្ជាក់អាយុ ( ជាអ្នកបិទគូទ) ។ ចំណែកទី២ មានឈ្មោះ សាត សុវឌ្ឍនា ហៅអាឆ្មា ភេទប្រុស ជាអ្នកធ្វើសកម្មភាពឆក់ទូរសព្ទពីជនរងគ្រោះ ជាមុខសញ្ញាចាស់ឆក់យ៉ាងសកម្ម ធ្លាប់ជាប់ពន្ធធានាគារជាច្រើនដង ។
តាមប្រភពព័ត៌មានពីជនរងគ្រោះ បានបញ្ជាក់ថា មុនពេលកើតហេតុ រូបនាងបានដើរ ថ្មើជើង ចុះទូរសព្ទបណ្តើរតាមបណ្ដោយផ្លូវលេខ៣៦០ ខណៈកំពុងដើរសុខៗស្រាប់តែលេចមុខជនសង្ស័យម្នាក់ ជិះម៉ូតូម៉ាកស្គុបពីរពណ៌ស ពាក់ស្លាកលេខ ភ្នំពេញ 1JZ-6122 ពីក្រោយខ្នង រួចធ្វើសកម្មភាពឆក់ទូរសព្ទពីដៃនាងបានសម្រេច បន្ទាប់មកជនសង្ស័យ ក៏បានដួលម៉ូតូនៅមុខរូបនាងបានបន្តិចក៏លើកម៉ូតូជិះទៅមុខបន្តទៀត បាត់ស្រមោល បន្ទាប់មក នាងក៏បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលទួលថ្វាយព្រៃទី១ ភ្លាមៗ នោះសមត្ថកិច្ចក៏បានទំនាក់ទំនងជាមួយជនរងគ្រោះ ឆែកតាមប្រព័ន្ធ iCloud ទូរសព្ទរបស់ជនរងគ្រោះ រហូតឈានដល់ការឃាត់ខ្លួនជនសង្ស័យ២នាក់ ម្នាក់ជាអ្នកឆក់ និងម្នាក់ទៀតជាអ្នកបិទគូទ បាននៅក្នុងខុនដូ មួយកន្លែង ដែលជនសង្ស័យស្នាកនៅបច្ចុប្បន្ន ។
ក្រោយពេលកើតហេតុ កម្លាំងសមត្ថកិច្ចបាននាំខ្លួនជនសង្ស័យទាំង២នាក់ ទៅកាន់អគ្គស្នងការដ្ឋាននគរបាលជាតិ ក្រសួងមហាផ្ទៃដើម្បីសួនាំ រួចបញ្ជួនបន្តទៅកាន់អធិការដ្ឋាននគរបាលខណ្ឌ បឹងកេងកង ដើម្បីសួរនាំ និងចាត់ការតាមនីតិច្បាប់ ៕
ដោយ ៖ រដ្ឋា
ចែករំលែកព័តមាននេះ