រាជធានីភ្នំពេញ៖ កម្មករអូសរទេះបន្លែនៅផ្សារនាគមាសម្នាក់ បានក្អួតធ្លាក់ឈាមដួលស្លាប់ នៅលើចិញ្ចើមផ្លូវដោយគេសង្ស័យថាមានជំងឺក្រពះធ្ងន់ធ្ងរ។
ហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង ១១និងព្រឹក ថ្ងៃទី០៩ ខែឧសភា ឆ្នាំ២០២៤ នៅចំណុចចិញ្ចើមផ្លូវលេខ៣៣៦ ភូមិ៤ សង្កាត់ផ្សារដើមគរ ខណ្ឌទួលគោក រាជធានីភ្នំពេញ ។
សមត្ថកិច្ច បានឲ្យដឹងថា សពជនរងគ្រោះមិនស្គាល់អត្តសញ្ញាណនោះទេ មុខរបរជាកម្មករអូសរទេះបន្លែនៅផ្សារនាគមាស មានលំនៅមិនពិតប្រាកដ។
តាមប្រភពព័ត៏មានបានឲ្យដឹងថា ជនរងគ្រោះជាកម្មករអូសរទេះនៅផ្សារនាគមាស ហើយតែងតែផឹកស្រាស្រវឹងជារៀងរាល់ថ្ងៃ ។ លុះនៅវេលាព្រឹក ថ្ងៃទី០៩ ខែឧសភា ឆ្នាំ២០២៤ គេឃើញជនរងគ្រោះអង្គុយនៅចិញ្ចើមផ្លូវមានអាការៈមិនស្រួលហើយអ្នកក្បែរខាងជាកម្មករដូចគ្នាបានទិញទឹកឲ្យផឹក ។លុះក្រោយមកគេឃើញជនរងគ្រោះដេកស្លាប់នៅលើចិញ្ចើមផ្លូវដោយក្អួតធ្លាក់ឈាម ហើយក៍រាយការណ៍ជូនសមត្ថកិច្ចអោយមកជួយចុះមកត្រួតពិនិត្យ ។
ក្រោយពេលកើតហេតុ សមត្ថកិច្ចមូលដ្ឋាន សហការជាមួយនគរបាលជំនាញផ្នែកកោសល្យវិច័យ ចុះមកធ្វើការពិនិត្យសាកសព ។ បន្ទាប់ពីត្រួតពិនិត្យសាកសពរួច សមត្ថកិច្ចបានសន្និដ្ឋានថា គឺស្លាប់ដោយសារក្អួតធ្លាក់ឈាមធ្ងន់ធ្ងរ មកពីជម្ងឺរលាកក្រពះ ៕
ចែករំលែកព័តមាននេះ