ចិន ៖ តាមប្រភពព័ត៌មាន Oddity Central បានឱ្យដឹងថា បុរសជនជាតិចិនម្នាក់ត្រូវបានចាប់ខ្លួន ពីបទក្លែងបន្លំអត្តសញ្ញាណជាប៉ូលិស។ នេះមិនមែនជាមនុស្សដំបូងគេដែលហ៊ានធ្វើបែបនេះឡើយ តែគាត់ខុសគេត្រង់ថា អាចបន្លំបានយូរជាងគេដល់ទៅ១២ឆ្នាំ។
Wang Feng អាយុ៤១ឆ្នាំ មានបំណងចង់ក្លាយទៅជាប៉ូលិសតាំងពីយូរណាស់មកហើយ តែមិនដែលចូលទៅរៀន ឬហាត់ធ្វើនោះទេ? ដោយចង់លេងផ្លូវកាត់ Wang បានបន្លំខ្លួនធ្វើជាប៉ូលីស ដោយទិញឯកសណ្ឋានក្លែងក្លាយ ខ្នោះដៃ និងកាតក្លែងក្លាយ ដើម្បីធ្វើពុតជាខ្នងសម្រាប់ជួយប្អូនប្រុសរកមេធាវីការពារក្តី។ Wang ប្រាប់គេឯងថា គឺជាប៉ូលីសនៅប៉ុស្តិ៍ Haiyan Baibu ក្នុងក្រុង Baibu ខេត្ត Zhejiang ប្រទេសចិន។
នៅឆ្នាំ២០១១ Wang Feng បានជួបស្នេហ៍ប្រចាំជីវិតឈ្មោះ Xiao Lu ហើយណែនាំខ្លួនដំបូងថា គឺជាប៉ូលិសនៅក្នុងស្ថាប័នស៊ើបអង្កេតក្តី ហើយមានមុខតំណែងជាអនុប្រធានស្ថាប័នទាំងមូល។ ដល់ពេលពួកគេរៀបការខាងស្រីមានចម្ងល់យ៉ាងខ្លាំង ដោយសារតែមិនឃើញមានសាច់ញាតិខាងប្រុស និងមន្ត្រីប៉ូលិសផ្សេងទៀតចូលរួមសោះ។ Wang បានដោះសារថា នេះមកពីម្តាយឪពុករបស់គេស្លាប់អស់ ហើយប៉ូលិសរួមការងាររវល់ទៅចូលរួមពិធីមង្គលការរបស់មេម្នាក់ទៀត។
ខាងស្រីក៏នៅតែឆ្ងល់ ក៏ទាមទារមើលកំណត់ត្រារៀនសូត្រនៅសាលាប៉ូលិស។ Wang ដោះសារថា គេមិនមាននោះទេ ដោយសារតែកាលនោះ គេបានប្រើប្រាស់អត្តលេខផ្សេង។ រាល់ពេលថ្ងៃ រូបគេបានប្រាប់ប្រពន្ធថា ទៅធ្វើការស៊ើបអង្កេត ដែលតម្រូវឱ្យនាងជាប្រពន្ធលាក់ការសម្ងាត់ កុំឲ្យគេដឹងថាជាប៉ូលិស។
រាល់ពេល Wang ចេញក្រៅផ្ទះ គេតែងតែទៅសណ្ឋាគារដេក ឬទៅធ្វើការបោះពុម្ពបន្តិចបន្តួច ដែលគ្មានមានប្រាក់ចំណេញអ្វីបន្តិចសោះ។ ដល់ពេលប៉ូលិសមែនទែនចាប់បានកាលពីខែកញ្ញាកន្លងមកនេះ គេដឹងថា Wang មានជាប់ជំពាក់ប្រាក់គេដល់ទៅ២៩ម៉ឺនដុល្លារអាមេរិក។
Wang បានសារភាពថា មូលហេតុដែលបន្លំខ្លួនបានយូរយ៉ាងនេះ គឺដោយសារតែចង់ទទួលការគោរពពីមហាជន និងជួយដល់សាច់ញាតិនៅពេលពួកគេមានទុក្ខ ហើយត្រូវការខ្សែ៕
ចែករំលែកព័តមាននេះ