រាជធានីភ្នំពេញ៖ ដោយមើលឃើញពីបញ្ហាកកស្ទះចរាចរណ៍ចំពោះអ្នកដំណើរលើមហាវិថីទេពផន ឆ្ពោះឡើងទៅមហាវិថីព្រះមុន្នីរ៉េត មានភាពចង្អៀត រដ្ឋបាលរាជធានីភ្នំពេញបានធ្វើការសិក្សាឡើងវិញ ដោយសម្រេចរំកិលប្តូរទីតាំងរូបសំណាកនាងគង្ហីងទៅទីតាំងថ្មី ដើម្បីពង្រីកផ្លូវបន្ថែម សម្រួលដល់ការធ្វើដំណើររបស់ប្រជាពលរដ្ឋ ។
លោក ឃួង ស្រេង អភិបាលរាជធានីភ្នំពេញ នៅព្រឹកថ្ងៃទី១០ ខែមករា ឆ្នាំ២០១៩នេះ បានអញ្ជើញចុះត្រួតពិនិត្យទីតាំង និងសិក្សាពីលទ្ធភាពលើការងាររំកិលរូបសំណាក់នាងគង្ហីង និងស្តុបនាងគង្ហីង ដែលនៅក្បែរស្ពានឆ្លងថ្មើរជើង Olympia City ដើម្បីកែលម្អប្រព័ន្ធចរាចរណ៍ឡើងវិញឲ្យដំណើរការរលូន និងអាចបញ្ជៀសការកកស្ទះចរាចណ៍សម្រាប់អ្នកដំណើរផងដែរ ។
ពាក់ព័ន្ធនឹងការរំកិលរូបសំណាក់នាងគង្ហីង និងស្តុបនាងគង្ហីងឲ្យបានល្អប្រសើរជាងមុននេះ លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញបានឲ្យដឹងថា ចំពោះទំហំរង្វង់អាងទឹករក្សាទំហំដដែល ដោយឡែកសម្រាប់រូបសំណាក់នាងគង្ហីងនឹងមានការលើកកម្ពស់ពី៥,៥ម៉ែត្រឡើងដល់៧,៥ម៉ែត្រ ។
លោក សាំ ពិសិដ្ឋ បន្តថា បន្ទាប់ពីអភិបាលរាជធានីភ្នំពេញបានចុះពិនិត្យទីតាំងថ្មីដែលត្រូវរំកិលរូបសំណាកនាងគង្ហីងហើយនោះ លោក ឃួង ស្រេង បានពិនិត្យទៅលើស្ពានឆ្លងថ្មើរជើង Olympia City ដែលជិតបញ្ចប់ការសាងសង និងពិនិត្យចំពោះប្រព័ន្ធចរាចរណ៍ ផ្លូវឆ្លងកាត់ និងចេញចូលទៅកាន់ផ្សារទំនើប Olympia City ផងដែរ ។
លោក សាំ ពិសិដ្ឋ បានបញ្ជាក់ថា នឹងមានការដំឡើងបង្គោលស្តុបនាងគង្ហីងមួយទៀត ឲ្យមានលក្ខណៈសមស្រប ព្រមជាមួយការបំពាក់ប្រព័ន្ធភ្លើង តាមស្ពានថ្មើរជើង ដើម្បីសម្រួលចរាចរណ៍ ក៏ដូចជាបំភ្លឺភ្លើងឲ្យភ្លឺជាងមុន ដោយសារទីតាំងធំមានភាពងងឹត ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ