រាជធានីភ្នំពេញ ៖ ថ្ងៃអាទិត្យ ទី២១ កក្កដាខាងមុខនេះ ការប្រកួតកីឡាប្រដាល់ដណ្តើមខ្សែក្រវាត់ K-cement ក្នុងប្រភេទទម្ងន់៥៤គីឡូក្រាមនៅលើសង្វៀនស្ថានីយទូរទស្សន៍ CTN សម្រាប់ពូលA អ៊ុង ស៊ីណា មកពីក្លិបផ្សារបឹងទំពុន ត្រូវប្រកួតជាមួយ ឆាំ រ៉ែម មកពីក្លិបសិង្ហកីឡា ។ រវាងគូនេះទើបតែប្រកួតបាន១លើកម្នាក់ប៉ុណ្ណោះ
រាជធានីភ្នំពេញ ៖ ថ្ងៃអាទិត្យ ទី២១ កក្កដាខាងមុខនេះ ការប្រកួតកីឡាប្រដាល់ដណ្តើមខ្សែក្រវាត់ K-cement ក្នុងប្រភេទទម្ងន់៥៤គីឡូក្រាមនៅលើសង្វៀនស្ថានីយទូរទស្សន៍ CTN សម្រាប់ពូលA អ៊ុង ស៊ីណា មកពីក្លិបផ្សារបឹងទំពុន ត្រូវប្រកួតជាមួយ ឆាំ រ៉ែម មកពីក្លិបសិង្ហកីឡា ។ រវាងគូនេះទើបតែប្រកួតបាន១លើកម្នាក់ប៉ុណ្ណោះ ក្នុងនោះ អ៊ុង ស៊ីណា ត្រូវ ម៉ន វិរៈ មកពីក្លិបវិស្វកម្មបច្ចេកទេសទ័ពជើងគោកព្រែកឯង វាយឱ្យសន្លប់នៅក្នុងទឹកទី៣ រីឯ ឆាំ រ៉ែម ឈ្នះពិន្ទុ ចាន់ រតនៈ មកពីក្លិបកងពលធំអន្តរាគមន៍លេខ៣ ព្រះវិហារ ទើបលើកនេះ អុ៊ង ស៊ីណា ត្រូវការឈ្នះឱ្យខាងតែបាន ព្រោះបើសិនជាចាញ់ម្តងទៀតនោះ ឱកាសឡើងទៅប្រកួតនៅវគ្គបន្ត គឺមានតិចបំផុត ។
ទោះបីយ៉ាងណា អ៊ុង ស៊ីណា ប៉ះ ឆាំ រ៉ែម លើកនេះមិនមែនជារឿងងាយស្រួលប៉ុន្មានទេ ព្រោះអី ឆាំ រ៉ែម ល្អទាំងព្រមទាំងចលនាវាយចេញ គឺមានភាពរហ័សរហួន និងមានចិត្តសឿងទៀតផង ជាពិសេសស្នៀតជើងរបស់គេពេលទាត់ចេញម្តងៗ មិនត្រឹមតែមានទម្ងន់ធ្ងន់ប៉ុណ្ណោះទេ ថែមទាំងមានប្រសិទ្ធភាព ពោលគឺភាគច្រើនមិនសូវខុសគោលដៅ ។ ចំណែក អ៊ុង ស៊ីណា វិញ មានចិត្តសឿងគួរសម គ្រាន់តែរាល់ការវាយចេញរបស់គេច្រើនតែមានភាពប្រថុយប្រថានបន្តិច រីឯការការពារក៏មិនសូវបានល្អថែមទៀត ។
លើកនេះគេមិនអាចធ្វេសប្រហែសបានឡើយ ព្រោះ ឆាំ រ៉ែម ក៏មិនបណ្តោយឱ្យចាញ់នោះដែរ ព្រោះបើសិនជាគេឈ្នះលើកនេះទៀត នឹងអាចឡើងទៅប្រកួតនៅវគ្គពាក់កណ្តាលផ្តាច់ព្រ័ត្រដោយស្វ័យប្រវត្តិ ។ រីឯគូប្រកួតមិត្តភាពប្រចាំសប្តាហ៍នេះមានកីឡាករ ចាន់ សំអាង មកពីក្លិបកងពលធំអន្តរាគមន៍លេខ៣ ព្រះវិហារ ជួបជាមួយកីឡាករ យ៉ត យ៉ុម មកពីក្លិបនាគរាជគុនខ្មែរ ។ កីឡាករ ខឹម រតនី មកពីក្លិបទីបញ្ជាការកងទ័ពជើងទឹក ជួបជាមួយកីឡាករ ម៉ាន់ សម្បត្តិ មកពីក្លិបបាត់ដំបងពាយ័ព្យ ។
កីឡាករ ហុឹម សេរី មកពីក្លិបតាព្រហ្មមានជ័យបង្ក្រាបគ្រឿងញៀន ជួបជាមួយកីឡាករ ទូច សក្តិ មកពីក្លិបរស្មីកុមារកំព្រា។ កីឡាករ សូ សុផាត មកពីក្លិបតោមាសកីឡា ប្រកួតជាលក្ខណៈប្រដាល់សាកលអាជីពជាមួយកីឡាករ Reymi Aselllano មកពីក្លិបអារុណរះកីឡា ។ កីឡាករ ជ័យ វណ្ណៈ មកពីក្លិបឃ្លាំងមឿងកីឡា ខេត្តពោធិ៍សាត់ ជួបជាមួយកីឡាករ ជិន រ៉ា មកពីសមាគមកីឡាប្រដាល់ក្រសួងការពារជាតិ និងគូចុងក្រោយកីឡាករ វឿត ប៊ុនឌឿន មកពីសមាគមកីឡាប្រដាល់ក្រសួងការពារជាតិ ជួបជាមួយកីឡាករ ផាន់ សារុន មកពីក្លិបព្រះខ័នរាជនៃកងរាជអាវុធហត្ថលើផ្ទៃប្រទេស ៕
ចែករំលែកព័តមាននេះ