រាជធានីភ្នំពេញ ៖ ព្រឹត្តិការណ៍បាល់ទាត់មិត្តភាពកម្ពុជា-ថៃ ដើម្បីអបអរសាទរខួបអនុស្សាវរីយ៍ លើកទី៧៥ នៃការបង្កើតទំនាក់ទំនងការទូតរវាងព្រះរាជាណាចក្រកម្ពុជា និងព្រះរាជាណាចក្រថៃ បានចាប់ផ្តើមហើយនារសៀលថ្ងៃទី០៨ ខែមីនា ឆ្នាំ២០២៥…
រាជធានីភ្នំពេញ ៖ ព្រឹត្តិការណ៍បាល់ទាត់មិត្តភាពកម្ពុជា-ថៃ ដើម្បីអបអរសាទរខួបអនុស្សាវរីយ៍ លើកទី៧៥ នៃការបង្កើតទំនាក់ទំនងការទូតរវាងព្រះរាជាណាចក្រកម្ពុជា និងព្រះរាជាណាចក្រថៃ បានចាប់ផ្តើមហើយនារសៀលថ្ងៃទី០៨ ខែមីនា ឆ្នាំ២០២៥ ដោយការប្រកួតលើកទី១ ក្រុមបាល់ទាត់គុនខ្មែរ ឈ្នះក្រុមបាល់ទាត់ MUAYTHAI ១គ្រាប់ ហើយការប្រកួតលើកទី២វិញ ក្រុមបាល់ទាត់តារាថៃ ឈ្នះក្រុមបាល់ទាត់តារាកម្ពុជា១គ្រាប់វិញ។
ព្រឹត្តិការណ៍បាល់ទាត់មិត្តភាពកម្ពុជា-ថៃនេះបានធ្វើឡើងក្រោមអធិបតីភាពឯកឧត្តម ម៉ារីត សារៀមផុង្ស រដ្ឋមន្ត្រីការបរទេសនៃព្រះរាជាណាចក្រថៃ និងជាតំណាងដ៏ខ្ពង់ខ្ពស់លោកជំទាវនាយករដ្ឋមន្ត្រីនៃព្រះរាជាណាចក្រថៃ និងឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា ជាតំណាងដ៏ខ្ពង់ខ្ពស់សម្តេចមហាបវរធិបតី ហ៊ុនម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជានៅពហុកីឡាដ្ឋានជាតិអូឡាំពិក។
ឯកឧត្តម ឃួង ស្រេង អភិបាលរាជធានីភ្នំពេញ បានមានប្រសាសន៍ថា ព្រឹត្តិការណ៍ក្នុងថ្ងៃនេះ ពិតជាបានរួមចំណែកបន្ថែមទៀត ក្នុងការស្វែងរកកាលានុវត្តភាពថ្មីៗ សម្រាប់ពង្រឹង ពង្រីកកិច្ចសហប្រតិបត្តិការរវាងដៃគូយុទ្ធសាស្ត្រកម្ពុជា-ថៃ ឱ្យកាន់តែមានប្រសិទ្ធភាព និងប្រកបដោយផ្លែផ្កា ។
ឯកឧត្តម ឃួង ស្រេង មានប្រសាសន៍បន្តថា ព្រះរាជាណាចក្រកម្ពុជា និងព្រះរាជាណាចក្រថៃ បានភ្ជាប់ទំនាក់ទំនងការទូតទ្វេភាគីជាមួយគ្នាជាយូរមកហើយ គឺចាប់តាំងពីថ្ងៃទី១៩ ខែធ្នូ ឆ្នាំ១៩៥០ ហើយទំនាក់ទំនងនេះ ត្រូវបានប្រទេសយើងទាំងពីរ ពង្រឹងពង្រីកកាន់តែរឹងមាំ តាមរយៈការផ្លាស់ប្តូរទស្សនកិច្ចរបស់ថ្នាក់ដឹកនាំជាន់ខ្ពស់រវាងប្រទេសទាំងពីរ ក្នុងកិច្ចសហប្រតិបត្តិការផ្នែកនយោបាយ សេដ្ឋកិច្ច វប្បធម៌ សុខាភិបាល អប់រំ យោធា និងសន្តិសុខ ព្រមទាំងការចងភ្ជាប់មេត្រីភាព រាជធានីភ្នំពេញ រាជធានីបាងកកថែមទៀតផង ។
ផ្តើមចេញពីទំនាក់ទំនងការទូតរយៈពេល៧៥ឆ្នាំកន្លងទៅនេះ កិច្ចសហប្រតិបត្តិការរវាងប្រទេសទាំងពីរ និងទីក្រុងសម្ព័ន្ធមេត្រីភាពកាន់តែមានភាពស៊ីជម្រៅស្អិតរមួតលើគ្រប់វិស័យ ជាពិសេសក្រោមអាណត្តិដឹកនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងឯកឧត្តម ថាក់ស៊ីនស៊ីណាវ៉ាត្រា អតីតនាយករដ្ឋមន្ត្រីនៃព្រះរាជាណាចក្រថៃ ។
ឯកឧត្តមបន្តថា ជាមួយគ្នានេះ កិច្ចសហប្រតិបត្តិការទ្វេភាគី ត្រូវបានដំឡើងពីកម្រិតកិច្ចសហប្រតិបត្តិការទ្វេភាគី រហូតដល់កម្រិតទំនាក់ទំនងជាដៃគូយុទ្ធសាស្ត្រ ឆ្នាំ២០២៤ នាឱកាសនៃដំណើរអញ្ជើញទស្សនកិច្ចជាផ្លូវការរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី៧ ខែកុម្ភៈ ឆ្នាំ២០២៤ នៅប្រទេសថៃ កន្លងទៅថ្មីៗនេះ ។
ឯកឧត្តម ឃួង ស្រេង បញ្ជាក់ថា នាពេលបច្ចុប្បន្នក្រោមការពូនជ្រុំថែទាំយ៉ាងដិតដល់ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវនាយករដ្ឋមន្ត្រីនៃព្រះរាជាណាចក្រថៃ ទំនាក់ទំនងជាប្រពៃណី រវាងប្រទេសយើងទាំងពីរ កាន់តែត្រូវបានពង្រឹង និងពង្រីកព្រមទាំងបាននាំមកនូវគុណប្រយោជន៍ សម្រាប់ប្រទេសជាតិ រាជរដ្ឋាភិបាល និងប្រជាជននៃប្រទេសយើងទាំពីរ ក្នុងន័យស្មើសិទ្ធិ ស្មើភាព និងឧបត្ថម្ភគាំទ្រជួយគ្នាទៅវិញទៅមកលើគ្រប់វិស័យ ទាំងក្នុងក្របខណ្ឌប្រទេស និងក្នុងក្របខណ្ឌរដ្ឋបាលថ្នាក់ក្រោមជាតិ សម្រាប់ការពង្រឹងពង្រីកទំនាក់ទំនងការទូតទ្វេភាគី និងកិច្ចប្រតិបត្តិការ រដ្ឋបាល ឈានឆ្ពោះទៅរកការអភិវឌ្ឍប្រកបដោយនិរន្តរភាព ។
ឯកឧត្តម ឃួង ស្រេង បញ្ជាក់បន្ថែមថា ការប្រកួតបាល់ទាត់មិត្តភាពកម្ពុជា-ថៃ នេះ មិនត្រឹមតែធ្វើឡើងដើម្បីអបអរសាទរខួបអនុស្សាវរីយ៍ លើកទី៧៥ នៃការបង្កើតទំនាក់ទំនងការទូតរវាងព្រះរាជាណាចក្រកម្ពុជា និងព្រះរាជាណាចក្រថៃប៉ុណ្ណោះទេ ប៉ុន្តែថែមទាំងជាកាលានុវត្តភាពថ្មីមួយទៀត សម្រាប់ការស្វែងយល់ឱ្យកាន់តែស៊ីជម្រៅ និងជាការតភ្ជាប់រវាងកីឡាករ កីឡាការិនី សិល្បករ សិល្បការិនី កម្ពុជា-ថៃ ដើម្បីឈានទៅពង្រឹងកិច្ចសហប្រតិបត្តិការមិត្តភាព សាមគ្គីភាព សម្រាប់
ជាគុណប្រយោជន៍ នៃប្រទេសយើងទាំងពីរ ក្នុងស្មារតី ក្រោមការឧបត្ថម្ភគាំទ្រនិងជួយគ្នាទៅវិញទៅមកលើគ្រប់វិស័យយ៉ាងពិតប្រាកដ ។
ឯកឧត្តម ម៉ារីត សាងៀមផុង្ស រដ្ឋមន្ត្រីការបរទេសនៃព្រះរាជាណាចក្រថៃ មានប្រសាសន៍ក្នុងឱកាសនោះថា ព្រឹត្តិការណ៍ប្រកួតបាល់ទាល់ក្នុងឱកាសនេះ រៀបចំឡើងដើម្បីអបអរខួបអនុស្សាវរីយ៍លើកទី៧៥នៃការបង្កើតទំនាក់ទំនងការទូតរវាងព្រះរាជាណាចក្រកម្ពុជា និងព្រះរាជាណាចក្រថៃនិងដើម្បី
ឆ្លុះបញ្ចាំងពីការប្តេជ្ញានៃប្រទេសទាំងពីរក្នុងការពង្រឹងមិត្តភាពអោយកាន់តែស្អិតរមួតបន្ថែមទៀត៕
ចែករំលែកព័តមាននេះ