រាជធានី​ភ្នំពេញ ៖ ចាត់ទុកជា​រឿង​ចម្លែកនិង​អបអរ​ផង​ដែរ​ក្នុង​ពិភព​បាល់ទាត់​ដែលប្រធាន​ក្លិប​បាល់ទាត់​ចូលរួម​ប្រកួត​ក្នុង​នាមកីឡាករ​ប្រចាំ​ក្លិប​អាច​រក​គ្រាប់​បាល់​បាន​ទៀតផង​នោះ​គឺ​លោក កាំ​ង សេន ប្រធាន​ក្លិប ISI ដង្កោ​សែន​ជ័យ ។ ការ​រក​គ្រាប់​បាល់បាន​ដំបូង​នៅ​ក្នុង​ការ​ប្រកួត​ស​ប្ដា​ហ៍​ទី​២៥ នៃលី​គ​កំពូល​កម្ពុជា Cambodian Premier League កាលពី​ថ្ងៃ​ទី​៨ មីនា ឆ្នាំ​២០២៥ នៅ​កីឡដ្ឋាន
អេ​អាយ​អេ ខេ​អឹ​ម​អេ​ច​ផាក ក្នុង​ជំនួប​ជាមួយក្រុម​ក្រសួងមហាផ្ទៃ ធ្វើ​ឱ្យ​ក្ដី​ស្រមៃ​បង្កើត​កំណត់
ត្រា​ពិភពលោក​ក្នុង​នាម​ម្ចាស់​ក្លិប​រក​គ្រាប់​បាល់បញ្ចូល​ទី​របស់​លោក​កាំ​ង សេន ក្លាយជា​ការ​ពិត​។

លោក កាំ​ង សេន បាន​និយាយ​ថា លោក​បាន​ដាក់​គោលដៅ​ចង់​ទាត់​ចូល​ក្នុង​ការ​ប្រកួត នៃ​លី​គ​កំពូល​កម្ពុជា ដើម្បី​សម្រេច​ក្តី​ស្រមៃ​បំបែក​កំណត់​ត្រា Guinness World Record ។ ប្រ​សិន
គ្រាប់​បាល់​របស់​លោក​នឹង​កើត​មាន លោក​នឹង​មាន​អ្វីមួយ​ធំ និង​ភ្ញាក់ផ្អើល ជូន​អ្នកគាំទ្រ គ្រួសារ​បាល់​ទាល់​កម្ពុជា​ហើយ​។

ក្នុង​នាម​កីឡាករ លោក កាំ​ង សេន ធ្លាប់​ទាត់ចូល​ក្នុង​ពានរង្វាន់​លី​គ​លំដាប់​ទី​២​កម្ពុជា​កាលពី
ឆ្នាំ​២០២០ តែ​លោក​នៅ​មាន​ក្ដី​ស្រមៃ​ចង់រក​គ្រាប់​បាល់​ក្នុង​ពានរង្វាន់​លី​គ​កំពូល​ទៀត ឥឡូវ
ក្ដី​ស្រមៃ​មួយ​នេះ​បាន​ក្លាយជា​ការ​ពិត​ហើយ​។ ប្រកប​អាជីព​ជា​កីឡាករ និង​ប្រធាន​ក្លិប​ជិត​១​រដូវ​កាល លោក កាំ​ង សេន ចង់​ក្លាយជា​ប្រធាន​ក្លិប​បាល់ទាត់​ដំបូង​គេ​ដែល​អាច​រក​គ្រាប់​បាល់​បាន​ក្នុង​លី​គ​បាល់ទាត់ ដើម្បី​បង្កើត​កំណត់​ត្រា​ពិភពលោក (Guinness World Record)​។

ក្នុងអំឡុងពេល​ធ្វើ​សន្និសីទ​សារព័ត៌មាន​កាល​ព្រឹក​ថ្ងៃ​ទី​២៥ ខែធ្នូ ឆ្នាំ​២០២៤ នៅ​កីឡដ្ឋាន AIA KMH Park លោក កាំ​ង សេន បាន​បង្ហាញពី​ការ​ប្ដេជ្ញា​ចិត្ត​របស់​ខ្លួន​ក្នុង​ការ​រក​គ្រាប់​បាល់បង្កើត​កំណត់​ត្រា​ពិភពលោក​ក្នុង​នាម​ជា​ប្រធាន​ក្លិប និង​ជា​កីឡាករ​បាល់ទាត់​នៃ​លី​គ​កំពូល​កម្ពុជា ។ ចំពោះ​ការ​តាំងចិត្ត​នេះ លោក កាំ​ង សេន មិន​សុំ​ឲ្យ​គូប្រកួត​ក្នុង​លី​គ​បន្ធូរបន្ថយ​កម្រិត​នៃ​ការ​លេង​ពេល​ប៉ះ​ជាមួយ​ក្រុម ISI ដង្កោសែន​ជ័យ ឬ​ក៏​បន្ធូរបន្ថយ​ដើម្បី​ឲ្យ​រូប​លោក រក​គ្រាប់​បាល់​បាន​ឡើយ ។ ផ្ទុយ​ទៅ​វិញ ប្រធាន​ក្លិប​រូប​នេះ សំណូមពរ​ឲ្យ​ក្លិប​ទាំងនោះ ប្រឹង​អស់ពី​សមត្ថភាព ធ្វើ​ឲ្យ​ការ​ប្រកួត​កាន់តែ​តានតឹង ដើម្បី​ឲ្យ​គ្រាប់​បាល់​របស់​លោក​កាន់តែ​មាន​ន័យ​។

ក្នុង​វិស័យ​បាល់ទាត់ កំណត់​ត្រា​ដែល​មាន​ប្រធាន​ក្លិប​ជា​កីឡាករ​អាជីព និង​រក​គ្រាប់​បាល់​សម្រាប់​ក្រុម​ផ្ទាល់ខ្លួន មិន​ទាន់​មាននៅ​ឡើយ​ទេ នៅ​ក្នុង​ក្រប​ខណ្ឌ​នៃ​ប្រទេស ដែល​មាន​វិស័យ​បាល់ទាត់ ។ ដូច្នេះ ប្រធាន​ក្លិប​រូប​នេះ​ដាក់​គោលដៅ​រក​គ្រាប់​បាល់​នេះ​ឲ្យ​បាន និង​បាន​ស្នើ​ទៅ Guinness World Record ចំពោះ​កំណត់​ត្រា​មួយ​នេះ ។ ស្ថាប័ន Guinness World Record ក៏​បាន​បញ្ជាក់​ថា មិន​ទាន់​មាន​អ្នក​ធ្វើ​នូវ​កំណត់​ត្រា​ជា​ប្រធាន​ក្លិប​ស៊ុត​បញ្ចូល​ទី​ក្នុង​លី​គ​កំពូល​បាល់ទាត់ នៃ​ប្រទេស​ណាមួយ​នៅឡើយ​។

ដូច្នេះ លោក កាំ​ង សេន ពិតជា​អាច​បំបែកកំណត់​ត្រា Guinness World Record ក្នុង​នាមប្រធាន​ក្លិប​ជា​កីឡាករ​អាជីព​ដែល​អាច​រក​គ្រាប់​បាល់​សម្រាប់​ក្រុម​ផ្ទាល់ខ្លួន​ក្នុង​ថ្ងៃ​ទិវា​អន្តរជាតិ​នារី ៨ មីនា ឆ្នាំ​២០២៥ ៕