រាជធានីភ្នំពេញ ៖ នៅក្នុងពិធីបិទការប្រកួតជើងឯកថ្នាក់ជាតិកីឡាហាប់គីដូនៅសាកលវិទ្យាល័យភូមិន្ទភ្នំពេញ កាលពីថ្ងៃទី១ ខែកុម្ភះ ឆ្នាំ២០២៦ លោកគួច ហុងជៀក ប្រធានសហព័ន្ធខ្មែរកីឡាហាប់គីដូមានប្រសាសន៍ថា ការប្រកួតជើងឯកថ្នាក់ជាតិកីឡាហាប់គីដូនៅពេលនេះ…
រាជធានីភ្នំពេញ ៖ នៅក្នុងពិធីបិទការប្រកួតជើងឯកថ្នាក់ជាតិកីឡាហាប់គីដូនៅសាកលវិទ្យា
ល័យភូមិន្ទភ្នំពេញ កាលពីថ្ងៃទី១ ខែកុម្ភះ ឆ្នាំ២០២៦ លោកគួច ហុងជៀក ប្រធានសហព័ន្ធខ្មែរកីឡាហាប់គីដូមានប្រសាសន៍ថា ការប្រកួតជើងឯកថ្នាក់ជាតិកីឡាហាប់គីដូនៅពេលនេះ ធ្វើឡើង
ដើម្បីដុសខាត់និងវាស់ស្ទង់កម្រិតបច្ចេកទេស អត្តពលិកបន្ថែមទៀត។
លោកបន្តថា សហព័ន្ធទទួលបានថវិការ គាំទ្រពីសមាជិកប្រតិបត្តិ សប្បុរសជន និងដៃគូឧបត្ថម្ភនានា ទើបសហព័ន្ធអាចរៀបចំការប្រកួតជើងឯកថ្នាក់ជាតិនេះឡើងស្របទៅតាមផែនការប្រចាំឆ្នាំរបស់ខ្លួន ក្នុងគោលបំណងវាស់ស្ទង់សមត្ថភាពរបស់កីឡាករ កីឡាការិនីដែលបានខិតខំហ្វឹកហាត់កន្លងមក ក៏ដូចជាពង្រឹងសមត្ថភាពជំនាញវិជ្ជាជីវៈ បន្ថែមចំណេះដឹងបទពិសោធន៍ដល់មន្ត្រីបច្ចេកទេស និងអាជ្ញាកណ្ដាលឱ្យកាន់តែមានប្រសិទ្ធភាព ក្នុងការសម្រេចចិត្តកាត់សេចក្ដីនៅលើទីលានប្រកួត។
លោកថា ការប្រកួតនាពេលនេះពិតជាមានសារសំខាន់ខ្លាំងណាស់ ព្រោះវាអាចជួយដុសខាត់ និងវាស់ស្ទង់កម្រិតបច្ចេកទេសដែលទទួលបានពីការប្រកួតប្រជែង និងអភិវឌ្ឍនូវចំណេះដឹងថ្មីៗបន្ថែមទៀត។ ជាការពិតណាស់ កីឡាករ កីឡាការិនី មន្ត្រីបច្ចេកទេសទាំងអស់ ត្រូវមានបទពិសោធន៍ខ្ពស់តាមកម្រិតស្តង់ដាទើបអាចឈានទៅការប្រកួតថ្នាក់អន្តរជាតិ និងចូលរួមកាត់ក្ដីក្នុងព្រឹត្តិការណ៍ប្រកួតប្រកបដោយភាពជឿជាក់ ។
ហេតុនេះទើបសហព័ន្ធខ្មែរកីឡាហាប់គីដូ បានដាក់ចេញនូវផែនការសកម្មភាពរបស់ខ្លួនក្នុងការអភិវឌ្ឍសមត្ថភាពរបស់កីឡាករ កីឡាការិនី និងមន្ត្រីបច្ចេកទេស ដើម្បីឱ្យពួកគាត់ទទួលបាននូវចំណេះជំនាញបច្ចេកទេស ឆ្លើយតបបានទៅនឹងកម្រិតនៃការប្រកួតប្រកបដោយប្រសិទ្ធភាព។
លោកប្រធានសហព័ន្ធក៏បានរំលេចផងដែរថា សមិទ្ធផលដែលសហព័ន្ធខ្មែរកីឡាហាប់គីដូទទួលបានកាលពីឆ្នាំ២០២៥ពីព្រឹត្តិការណ៍ជើងឯកពិភពលោក(World Hapkido Championship 2025)ជាសមិទ្ធផលដែលនឹកស្មានមិនដល់ ដោយក្រុមប្រតិភូហាប់គីដូកម្ពុជាដណ្ដើមបានមេដាយសរុបចំនួន៤០គ្រឿង ក្នុងនោះមេដាយមាស១២គ្រឿង មេដាយប្រាក់១៣គ្រឿង និងមេដាយសំរឹទ្ធ១៥គ្រឿង។
ទាំងអស់នេះសបញ្ជាក់ពីការចូលរួមរបស់ថ្នាក់ដឹកនាំ គ្រូបង្វឹកគ្រូជំនួយ អត្តពលិកផ្ទាល់ខ្លួន តាមរយៈការអនុវត្តខ្ជាប់ខ្ជួននូវផែនការសកម្មភាព និងកាលវិភាគហ្វឹកហាត់ប្រចាំថ្ងៃ។ អ្វីដែលសំខាន់ សហព័ន្ធខ្មែរកីឡាហាប់គីដូតែងតែផ្សារភ្ជាប់ទំនាក់ទំនងជាមួយក្រសួងអប់រំ យុវជន និងកីឡា គណៈកម្មាធិការជាតិអូឡាំពិកកម្ពុជា និងស្ថាប័នពាក់ព័ន្ធនានាបានល្អទៀតផង ៕
ចែករំលែកព័តមាននេះ