ប្រធាន FIFA គាំទ្រការដកបម្រាមដែលបានហាមឃាត់រុស្ស៊ីពីការប្រកួតអន្តរជាតិ
ប្រទេសស្វីស ៖ លោក Gianni Infantino ប្រធានសហព័ន្ធកីឡាបាល់ទាត់ពិភពលោក (FIFA) កាលពីថ្ងៃទី២ ខែកុម្ភៈ ឆ្នាំ២០២៦…
ប្រទេសស្វីស ៖ លោក Gianni Infantino ប្រធានសហព័ន្ធកីឡាបាល់ទាត់ពិភពលោក (FIFA) កាលពីថ្ងៃទី២ ខែកុម្ភៈ ឆ្នាំ២០២៦ បានបញ្ជាក់ជាថ្មីម្តងទៀតថា លោកចង់ឱ្យការហាមឃាត់រុស្ស៊ីពីការប្រកួតអន្តរជាតិត្រូវលុបចោល ពីព្រោះវាមិនបានសម្រេចលទ្ធផលអ្វីទាំងអស់។
គួររំលឹកថា ក្លិបបាល់ទាត់អាជីព រួមទាំងក្រុមជម្រើសជាតិរុស្ស៊ី ត្រូវបានហាមឃាត់ពីការប្រកួតអន្តរជាតិដោយ FIFA និងសហព័ន្ធបាល់ទាត់អឺរ៉ុប (UEFA) ចាប់តាំងពីប្រទេសនេះបានឈ្លានពានអ៊ុយក្រែនក្នុងខែកុម្ភៈ ឆ្នាំ២០២២។
យ៉ាងណាមិញ លោក Infantino បានប្រាប់សារព័ត៌មាន Sky Sports ថា ការហាមឃាត់នេះ មិនបានសម្រេចអ្វីទាំងអស់ វាគ្រាន់តែបង្កើតការខកចិត្ត និងស្អប់ខ្ពើមបន្ថែមទៀតតែប៉ុណ្ណោះ។ ការដែលមានក្មេងស្រី ក្មេងប្រុសមកពីរុស្ស៊ីអាចប្រកួតបាល់ទាត់នៅក្នុងតំបន់ផ្សេងទៀតនៃទ្វីបអឺរ៉ុបទំនងនឹងអាចជួយបាន។ លោកបានបន្ថែមថា FIFA មិនគួរហាមឃាត់ប្រទេសណាមួយមិនឱ្យលេងបាល់ទាត់ ដោយសារទង្វើរបស់មេដឹកនាំនយោបាយរបស់ពួកគេឡើយ។
ទោះយ៉ាងណាក៏ដោយ រដ្ឋមន្ត្រីកីឡាអ៊ុយក្រែន លោក Matvii Bidnyi បានលើកឡើងថា មតិយោបល់របស់លោក Infantino បង្ហាញពីការមិនទទួលខុសត្រូវ និងជាគំនិតក្មេងខ្ចី។ ដោយលោកបានប្រាប់ Sky Sports ថា ពួកគេ (រុស្ស៊ី) បានបំបែកបាល់ទាត់ចេញពីការពិតដែលកុមារកំពុងត្រូវបានសម្លាប់។
នៅឆ្នាំ ២០២៣ ដំបូងឡើយ UEFA បានបន្ធូរបន្ថយគោលនយោបាយរឹតបន្តឹងរបស់ខ្លួន ដើម្បីអនុញ្ញាតឱ្យក្រុមយុវជនអាយុក្រោម ១៧ឆ្នាំ (U 17) រុស្ស៊ីប្រកួតប្រជែង ប៉ុន្តែបានដកការអនុញ្ញាតនោះវិញ បន្ទាប់ពីមានការជំទាស់យ៉ាងខ្លាំងពីសហព័ន្ធជាសមាជិក។
លោក Infantino ធ្លាប់បានសម្តែងការគាំទ្រចំពោះប្រទេសរុស្ស៊ី ដោយបាននិយាយនៅក្នុងសមាជ UEFA កាលពីខែមេសា ឆ្នាំមុនថា លោកចង់នាំប្រទេសរុស្ស៊ីត្រឡប់មកក្នុងសកម្មភាពបាល់ទាត់អន្តរជាតិវិញ ពីព្រោះនេះនឹងមានន័យថាអ្វីៗគ្រប់យ៉ាងត្រូវបានដោះស្រាយ។ បន្ទរពីការលើកឡើងនោះ លោក Aleksander Ceferin ប្រធាន UEFA បានថ្លែងថា នៅពេលដែលសង្គ្រាមឈប់ រុស្ស៊ីនឹងត្រូវបានអនុញ្ញាតឱ្យចូលរួមប្រកួតវិញ។
UEFA នឹងមានកិច្ចប្រជុំគណៈកម្មាធិការប្រតិបត្តិនៅចុងខែនេះ ហើយមានសិទ្ធិអំណាចនៅក្នុងការត្រួតពិនិត្យការត្រឡប់របស់រុស្ស៊ីមកកាន់ការប្រកួតពានរង្វាន់អន្តរជាតិ។ ដ្បិតបច្ចុប្បន្នរុស្ស៊ីបានត្រឹមបន្តប្រកួតក្នុងការប្រកួតមិត្តភាពអន្តរជាតិតែប៉ុណ្ណោះ៕ ប្រភព ៖ Reuters និង ESPN
ចែករំលែកព័តមាននេះ