រាជធានីភ្នំពេញ ៖ តាមប្រភពព័ត៌មានបឋមបានឱ្យដឹងថា នៅមុននេះបន្តិចប្រហែលម៉ោង១២និង៣០នាទីថ្ងៃត្រង់ ថ្ងៃទី១០ ខែមករា ឆ្នាំ២០១៩ នេះមន្ត្រីនគរបាលដែលនៅគណៈកម្មការប្រយុទ្ធប្រឆាំងផលិតផលក្លែងក្លាយនៃក្រសួងមហាផ្ទៃត្រូវបានកម្លាំងតម្រួតបទបញ្ជាសហការជាមួយនគបាលខណ្ឌសែនសុខឃាត់ខ្លួននាំយកទៅសាកសួរ ។
បន្ទាប់ពីកម្លាំងសមត្ថកិច្ចរួមទាំងក្រឡាបញ្ជីចុះត្រួតពិនិត្យឃ្លាំងមួយកន្លែងដែលមានការសង្ស័យថាដឹកបារីក្លែងក្លាយ ។ ហេតុការណ៍នេះបណ្តាលឱ្យមានការភ្ញាក់ផ្អើលនៅចំណុចមុខឃ្លាំងនៅតាមផ្លូវភ្នំពេញហាណូយ ភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ ។
មន្ត្រីនគរបាលដែលសមត្ថកិច្ចឃាត់ខ្លួននោះមានឧត្តមសេនីយ៍ត្រី ផូ សុផល រួមទាំងមន្ត្រីនគរបាលចំនួន៥នាក់ទៀតដែលសរុបទាំងអស់៦នាក់ ។
ទាក់ទិននឹងការឃាត់ខ្លួនមន្ត្រីនគរបាលនេះលោកឧត្តមសេនីយ៍ទោ ទូច យុទ្ធា អនុប្រធានលេខាធិការដ្ឋាននៃគណៈកម្មការប្រយុទ្ធប្រឆាំងផលិតផលក្លែងក្លាយនៃក្រសួងមហាផ្ទៃលោកបានឱ្យភ្នាក់ងារ កោះសន្តិភាព ដឹងតាមរយៈទូរស័ព្ទថា ករណីនេះជាការយល់ច្រឡំគ្នា ដោយនៅមុនពេលកើតហេតុលោកបានអះអាងថា កម្លាំងរបស់លោកទទួលបានព័ត៌មានថា មានរថយន្តដឹកបារីក្លែងក្លាយ១គ្រឿងចូលក្នុងឃ្លាំងខាងលើ ហើយសមត្ថកិច្ចក៏មានការស្ទាក់ត្រួតពិនិត្យ ។
ស្រាប់តែខាងម្ចាស់បារីនោះមិនសហការជាមួយកម្លាំងសមត្ថកិច្ចដោយមិនឱ្យមានការត្រួតពិនិត្យនោះទេ ហើយថែមទាំងរាយការណ៍ទៅខាងលើទើបមន្ត្រីនគរបាលទាំង៦រូបដែលមានទាំងលោកផ្កាយ១នោះចុះទៅដោយមិនបានសហការជាមួយស្នងការនគរបាលរាជធានីភ្នំពេញនោះទេ ក៏មានកម្លាំងតម្រួតបទបញ្ជាសហការជាមួយកម្លាំងអាជ្ញាធរខណ្ឌសែនសុខឃាត់ខ្លួនលោកផ្កាយ១ និងកូនចៅគាត់តែម្តង ។ ព័ត៌មានលម្អិតនឹងផ្សាយជូននៅពេលក្រោយ ៕
ចែករំលែកព័តមាននេះ