សម្តីមាសរបស់អ្នកជោគជ័យក្នុងជីវិតបានចង្អុលទិសថា បើចង់មានប្រាក់ច្រើន ត្រូវប្រឹងប្រែងរក ប្រឹងសន្សំ លុះបានប្រាក់ច្រើនហើយ កុំចាយវាយតាមចិត្តចង់ កុំភ្លើតភ្លើនភ្លេចខ្លួន ហើយត្រូវប្រឹងរកបន្ថែមទៀត ។ ចំណុចនេះត្រូវនឹងពុទ្ធឱវាទត្រាស់ថា…
សម្តីមាសរបស់អ្នកជោគជ័យក្នុងជីវិតបានចង្អុលទិសថា បើចង់មានប្រាក់ច្រើន ត្រូវប្រឹងប្រែងរក ប្រឹងសន្សំ លុះបានប្រាក់ច្រើនហើយ កុំចាយវាយតាមចិត្តចង់ កុំភ្លើតភ្លើនភ្លេចខ្លួន ហើយត្រូវប្រឹងរកបន្ថែមទៀត ។
ចំណុចនេះត្រូវនឹងពុទ្ធឱវាទត្រាស់ថា បុគ្គលដែលប្រឹងប្រែងរកទ្រព្យសម្បត្តិ ចេះទុកដាក់ថែរក្សាទ្រព្យដែលរកបានមក និងចេះចាយវាយទ្រព្យសម្បត្តិឱ្យសមទៅនឹងឋានៈតួនាទីរបស់ខ្លួន ឈ្មោះថាជាអ្នកឈ្លាសក្នុងប្រយោជន៍បច្ចុប្បន្ន ។ ខាងក្រោមនេះជាទ្រឹស្តីពុទ្ធសាសនាដ៏មានប្រយោជន៍ បើបុគ្គលណាធ្វើតាម បុគ្គលនោះនឹងជោគជ័យជាក់ជាមិនខានៈ
១-ការចេះចាយវាយឲ្យសមនឹងឋានៈរបស់ខ្លួន បានសេចក្ដីថា ជាការចាយវាយមិនឲ្យ លើសចំនួនទ្រព្យដែលមាន បើរកបានតិចចាយតាមតិច បើរកបានច្រើនកុំភ្លើតភ្លើនចាយទាល់តែអស់ប្រាក់ ត្រូវវៀរចាកការចំណាយណាដែលគ្មានការចាំបាច់ឬគ្មានប្រយោជន៍ និងត្រូវចេះសំចៃទុកខ្លះសម្រាប់ពេល ណាដែលរកទ្រព្យមិនបាន ឬមានគ្រោះថ្នាក់ផ្សេងៗមានជំងឺតម្កាត់ជាដើម យកប្រាក់នោះមកប្រើប្រាស់ជារឿងល្អបំផុត ។
២-ការថែរក្សាទ្រព្យដែលរកបានមកឲ្យគង់វង្សល្អ បានដល់ការចេះសន្សំសំចៃទ្រព្យទុក ឱ្យផុតពីសេចក្ដីអន្តរាយផ្សេងៗ ហើយចេះកែខៃរកផលកម្រៃអំពីទ្រព្យនោះទៀតផង។ តាមធម្មតាក្នុងប្រទេសនីមួយៗ គេតែងមានកន្លែងផ្ញើប្រាក់ ដែលហៅថាធនាគារ ដើម្បីឱ្យប្រជាជនចេះសន្សំទ្រព្យសម្បត្តិ ហើយបានថ្លៃការអំពីប្រាក់ទាំងនោះបន្ថែមទៀត។
៣-បុគ្គលឆ្លាតជាមនុស្សឈ្លាសវៃក្នុងការរកទ្រព្យសម្បត្តិ គឺជាកាតព្វកិច្ចដ៏សំខាន់សម្រាប់បុគ្គលម្នាក់ៗ ទ្រព្យសម្បត្តិមិនអាចកើតមានដល់មនុស្សខ្ជិលច្រអូសបានឡើយ ដូចពាក្យបុរាណបានពោលថា ចេះមកពីរៀន មានមកពីរក ។
៤-ការជ្រើសរើសមិត្ត គឺជាការជ្រើសរើសផ្លូវដើរសម្រាប់ជីវិត បើសេពគប់មិត្តអាក្រក់រមែងនាំមកនូវសេចក្ដីវិនាស តែបើសេពគប់មិត្តល្អ នឹងមានសេចក្ដីសុខចម្រើនកើនប្រយោជន៍ ព្រោះមិត្តល្អគេអាចជួយពន្យល់ពីវិធីស្វែងរកសេចក្ដីសុខចម្រើន ទាំងផ្នែកទ្រព្យសម្បត្តិ ទាំងផ្នែកគំនិតប្រាជ្ញាស្មារតី គេស្ទាត់ជំនាញក្នុងកិច្ចការណា គេនឹងជួយពន្យល់មិត្តក្នុងកិច្ចការនោះមិនខាន ។
បើបុគ្គលណាដើរតាមពុទ្ធឱវាទទាំងបួននេះឱ្យប្រាកដ បុគ្គលនោះនឹងបានជាអ្នករស់នៅបរិបូណ៌ដោយទ្រព្យសម្បត្តិ និងសុខចម្រើនពេញមួយជីវិត។
ចែករំលែកព័តមាននេះ