រាជធានីភ្នំពេញ ៖ លោកអ្នកប្រហែលជាបានស្គាល់ហើយ លោក Ben Davis អ្នកអភិរក្សនិយមជនជាតិអាមេរិក ដែលសុខចិត្តបោះបង់វណ្ណៈ ទ្រព្យសម្បត្តិ និងសាច់ញាតិបងប្អូននៅប្រទេសកំណើតរបស់ខ្លួន…
រាជធានីភ្នំពេញ ៖ លោកអ្នកប្រហែលជាបានស្គាល់ហើយ លោក Ben Davis អ្នកអភិរក្សនិយមជនជាតិអាមេរិក ដែលសុខចិត្តបោះបង់វណ្ណៈ ទ្រព្យសម្បត្តិ និងសាច់ញាតិបងប្អូននៅប្រទេសកំណើតរបស់ខ្លួន មកធ្វើការនៅអង្គការអភិរក្សព្រៃឈើនៅកម្ពុជា ចាប់តាំងពីឆ្នាំ១៩៩២ មកម្ល៉េះ។
បន្ទាប់មកលោកក៏ស្ម័គ្រចិត្តរស់នៅក្នុងដែនជម្រកសត្វព្រៃភ្នំត្នោត-ភ្នំពក ខេត្តព្រះវិហារ ដើម្បីថែរក្សាព្រៃឈើ និងសត្វព្រៃដែលបាននិងកំពុងយារយីពីសំណាក់ជនខិលខូចមួយចំនួនដែលជាអ្នកស្រុករស់នៅក្នុងតំបន់នោះពីឆ្នាំ២០១២ រហូតបច្ចុប្បន្ន។
អស់រយៈពេល ៧ឆ្នាំមកនេះ លោក Ben Davis បានប្រើប្រាស់ថវិការផ្ទាល់ខ្លួន និងជំនួយពីអង្គការមួយចំនួន ដើម្បីមើលថែរក្សាធនធានធម្មជាតិកម្ពុជាទាំងនោះ ព្រមទាំងការពារជីវិតសត្វជាច្រើនប្រភេទដូចជា ក្ងោក ទោច ស្វាព្រាម សំពោច ឈ្លូស ទន្សោង និងខ្ទីងជាដើមពីការតាមប្រមាញ់។ ក្នុងនោះលោកថែមទាំងបានលក់ទ្រព្យសម្បត្តិផ្ទាល់ខ្លួនជាច្រើន ដើម្បីទប់ទល់នឹងការចំណាយផ្សេងៗក្នុងការអភិរក្សតំបន់អេកូឡូស៊ីទេសចរណ៍របស់កម្ពុជាមួយនេះ។
ទោះបីមិនធ្លាប់បានទទួលការគាំទ្រពីសំណាក់ជនខិលខូចមួយចំនួនតូចដែលជាប្រជាពលរដ្ឋរស់នៅទីនោះក្តី លោក Ben Davis នៅតែបន្តឆន្ទៈចង់ការពារតំបន់ធម្មជាតិដ៏ល្អឥតខ្ចោះមួយនេះឲ្យទៅជាទីកន្លែងទាក់ទាញភ្ញៀវទេសចរណ៍ជាតិ និងអន្តរជាតិ ឲ្យទៅសម្រាកលំហែកាយ ចងអង្រឹងនៅក្នុងព្រៃ ស្នាក់នៅលើផ្ទះដើមឈើ លេងទឹកជ្រោះ ឬជិះខ្សែរ៉តឆ្លងកាត់ពីភ្នំមួយទៅភ្នំមួយ មើលទៅស្រស់ស្អាត និងព្រឺព្រួចមែនទែន ហើយកត្តាទាំងនេះនឹងជំរុញបង្កើនឱកាសការងារយ៉ាងច្រើនដល់អ្នកស្រុកសង្គមថ្មីថែមទៀតផង។
រឿងដែលគួរឲ្យសោកស្តាយនោះ គឺជនបរទេសមួយរូបដែលស្ម័គ្រចិត្តការពារព្រៃឈើ Ben Davis បានសារភាពថា ខ្លួនស្ទើរតែលែងមានសមត្ថភាពបន្តការការពារព្រៃឈើក្នុងតំបន់ដែនជម្រកសត្វព្រៃភ្នំត្នោត-ភ្នំពកនេះទៀតហើយ ដោយលោកលែងមានលទ្ធភាពទប់ទល់នឹងការចំណាយទៅលើការអភិវឌ្ឍន៍ និងទប់ស្កាត់រាល់ការបំផ្លាញផ្សេងៗដែលចេះតែកើតមានជារៀងរាល់ថ្ងៃ។
ក្នុងន័យជួយលើកទឹកចិត្ត ក៏ដូចជាថ្លែងអំណរគុណទៅដល់លោក Ben Davis ដែលចំណាយពេលយ៉ាងច្រើនរស់នៅក្នុងតំបន់ភ្នំត្នោត-ភ្នំពកនេះ ការពារព្រៃឈើ និងដើម្បីបញ្ជ្រៀបព័ត៌មានឲ្យបងប្អូនក្នុងតំបន់ ក៏ដូចជាទូទាំងប្រទេសបានដឹងពីសារប្រយោជន៍ ព្រៃឈើ លោក តាន់ គឹមសួរ សិល្បករ សិល្បការិនីជាច្រើននៃសមាគមសិល្បរខ្មែរ ក្រុមការងារ និងក្រុមយុវជនស្ម័គ្រចិត្តបានផ្តួចផ្តើមកម្មវិធីប្រគុំ «តន្ត្រីបៃតង» កាលពីថ្ងៃទី០៦ ខែមករា ឆ្នាំ២០១៨ នៅខាងក្នុងបរិវេណសាលារៀនមួយក្នុងស្រុកសង្គមថ្មី ខេត្តព្រះវិហារ។ ក្រោមជួយជ្រោមជ្រែងពីសំណាក់ ក្រសួងបរិស្ថាន និងក្រសួងពាក់ព័ន្ធនានា ព្រមទាំងបណ្តាក្រុមហ៊ុន សប្បុរសជនក្នុង និងក្រៅប្រទេស។
ជាលទ្ធផល ការប្រគំតន្ត្រីមួយនេះ ទទួលបានការគាំទ្រយ៉ាងឱឡារិកពីសំណាក់ប្រជាពលរដ្ឋក្នុងស្រុកសង្គមថ្មី។ ក្នុងនោះលោក សាយ សំអាល់ រដ្ឋមន្ត្រីនៃក្រសួងបរិស្ថាន បានគាំទ្រយ៉ាងពេញទំហឹងទៅលើការលះបង់យ៉ាងធំធេញរបស់អ្នកអភិរក្សនិយមជនជាតិអាមេរិករូបនេះមកលើទឹកដឹមាតុភូមិកម្ពុជា។ លោក ខៀវ បូរិន អគ្គនាយកមូលដ្ឋានសហគមន៍មូលដ្ឋាន នៃក្រសួងបរិស្ថាន និងជាអ្នកតំណាងឲ្យរដ្ឋមន្ត្រីក្រសួងបរិស្ថាន បានពាំនាំទឹកប្រាក់ចំនួន ២០,០០០ ដុល្លារសហរដ្ឋអាមេរិក មកឲ្យលោក Ben ចាត់ចែងក្នុងសហគមន៍ ដើម្បីអភិរក្សធនធានធម្មជាតិ និងសហគមន៍។ ព្រមទាំងផ្តល់ជាដំណឹងថាក្រសួងនឹងបន្តផ្តល់ទឹកប្រាក់២០០០០ដុល្លារសហរដ្ឋអាមេរិកនេះជារៀងរាល់ឆ្នាំ ក្នុងរយៈពេល០៥ឆ្នាំ។
ក្នុងនោះផងដែរ លោក សឹម ទ្រី ដែលជាសកម្មជនការពារព្រៃឈើមួយរូប ធ្វើការងារ បម្រើឲ្យផលប្រយោជន៍សហគមន៍ជាមួយលោក Ben បានចែករំលែករឿងរ៉ាវរបស់ខ្លួន ក្នុងកម្មវិធីប្រគំតន្ត្រីបៃតងនេះផងដែរថា៖ «ពីមុនខ្ញុំ គឺជាអ្នកកាប់ព្រៃឈើ។ មូលហេតុដែលខ្ញុំមកអភិរក្សព្រៃឈើវិញ ព្រោះតែការកាប់នេះ គឺអត់ចំណេញ។ កាប់… ទី១ប៉ូលិសចាប់។ ទី២ អ្នកទិញភាគច្រើនជំពាក់។ មួយវិញទៀត កាប់ៗអត់លុយទិញប្រេងពីគេ ទិញដែកឆាប ទិញច្រវ៉ាក់ ទិញអីអស់ហ្នឹង! ដ៏អីចឹង ពេលយើងលក់បាន បានលុយមួយលានអីចឹង គ្នាបីបួននាក់ ចែកគ្នាអស់ សល់ម្នាក់១០ម៉ឺន។
ជួនកាលទៅ ដាក់តែ១កំប៉ុង យូរៗទៅអា១០ម៉ឺនហ្នឹងអស់ទៀត។ ម្តងនោះគេចាប់ម៉ាស៊ីនខ្ញុំអស់១ គេថាគេយក៤០ម៉ឺនបានឲ្យវិញ។ ពេលហ្នឹងអត់លុយឲ្យគេ ក៏ចាំទាល់មានលុយទិញម៉ាស៊ីនថ្មីហ្មងទៅ។ ក៏ទិញមួយទៀត ទើបកាប់បាន ២ដង Ben ចាប់។ Ben ចាប់(ខ្ញុំ)អត់ហ៊ានចេញមុខទេ។ ដ៏យូរៗទៅ កាប់ក៏មិនបាន អីក៏មិនបាន បែកគំនិតសុំ Ben ធ្វើការជាមួយហ្មងទៅ។ ហើយស្រាប់ធ្វើការជាមួយ Ben បានលុយច្រើនជាងកាប់ព្រៃ ក៏ធ្វើរហូតហ្មងទៅ»។
សម្តីពិតរបស់សកម្មជនការពារព្រៃឈើរូបនេះ បានធ្វើឲ្យថ្នាក់ដឹកនាំ អ្នករៀបចំកម្មវិធី ក៏ដូចជាប្រជាពលរដ្ឋទាំងអស់មានការស្ញប់ស្ញែងយ៉ាងខ្លាំង។ ពិតណាស់ព្រៃឈើពិតជាមានសារប្រយោជន៍ចំពោះជីវិត គ្មានព្រៃឈើ គ្មានជីវិត។ ការចេះថែរក្សាព្រៃឈើឲ្យបានគង់វង្សនឹងនាំយើងឲ្យរកប្រាក់ចំណូលបានច្រើនជាងរាប់ពាន់ រាប់លានដងពីការកាប់បំផ្លាញរួចយកទៅលក់បានតែមួយឆាវ។ ហេតុនេះហើយ ក្រសួងពាក់ព័ន្ធ ក៏ដូចជាក្រុមការងារសិល្បករ សិល្បការិនីទាំងអស់របស់កម្មវិធីតន្ត្រីសប្បុរសបៃតងសង្ឃឹមថា បងប្អូនប្រជាពលរដ្ឋខ្មែរ ជាពិសេសគឺប្រជាពលរដ្ឋក្នុងស្រុកសង្គមថ្មីទាំងអស់ នឹងបន្តរួមគ្មាថែរក្សាតំបន់ដែនជម្រកសត្វព្រៃភ្នំត្នោត-ភ្នំពកនេះឲ្យបានគង់វង្ស៕
ចែករំលែកព័តមាននេះ