រាជធានីភ្នំពេញ៖ ពលរដ្ឋរស់នៅផ្ទះជួលជាប់ជញ្ជាំងគ្នាជាមួយយានដ្ឋាន១កន្លែង បានស្នើរសុំអាជ្ញាធរ និងមន្ត្រីក្នុងមូលដ្ឋាន ជួយអន្តរាគមន៍ ព្រោះម្ចាស់ទីតាំងយានដ្ឋាន១កន្លែង បានផ្តាច់ភ្លើងផ្ទះពួកគាត់ ដោយលើកយកហេតុផលមិនសាកសម ។ ហេតុការណ៍នេះបានភ្ញាក់ផ្អើលកាលពីវេលាម៉ោង…
រាជធានីភ្នំពេញ៖ ពលរដ្ឋរស់នៅផ្ទះជួលជាប់ជញ្ជាំងគ្នាជាមួយយានដ្ឋាន១កន្លែង បានស្នើរសុំអាជ្ញាធរ និងមន្ត្រីក្នុងមូលដ្ឋាន ជួយអន្តរាគមន៍ ព្រោះម្ចាស់ទីតាំងយានដ្ឋាន១កន្លែង បានផ្តាច់ភ្លើងផ្ទះពួកគាត់ ដោយលើកយកហេតុផលមិនសាកសម ។
ហេតុការណ៍នេះបានភ្ញាក់ផ្អើលកាលពីវេលាម៉ោង ៩និង៣០នាទីយប់ ថ្ងៃទី២៧ ខែមិថុនា ឆ្នាំ២០២៥
ទីតាំងស្ថិតនៅផ្លូវ១៣៨ ទល់មុខបុរីកីឡា មូលដ្ឋានសង្កាត់វាលវង់ ខណ្ឌ៧មករា រាជធានីភ្នំពេញ ។
យោងតាមប្រភពព័ត៌មានពីក្រុមអ្នកជួលផ្ទះ ដែលត្រូវបានគេផ្តាច់ភ្លើងមិនអោយប្រើប្រាស់ បានរៀបរាប់ឲ្យដឹងថារហូតមកដល់ពេលនេះ មានរយ:ពេល៣ថ្ងៃមកហើយ ដែលពួកគាត់ត្រូវបានគេផ្តាច់ភ្លើងមិនអោយប្រើប្រាស់ ដោយប្រអប់ភ្លើងផ្ទះរបស់ពួកគាត់ ស្ថិតនៅក្នុងទីតាំងយានដ្ឋាន១កន្លែង ដែលនៅជាប់ជញ្ជាំងផ្ទះគ្នាជាមួយពួកគាត់ ។
ស្ត្រីម្នាក់ដែលរស់នៅផ្ទះជួលខាងលើបានបន្តថាដើមឡើយពួកគាត់បានជួលផ្ទះ១ល្វែង ដែលស្ថិតនៅជាប់យានដ្ឋាន១កន្លែង នៅចំណុចផ្លូវ១៣៨ កែងផ្លូវលេខ ២១១ ហើយផ្ទះដែលគាត់ជួលនេះ ត្រូវប្រើប្រអប់ភ្លើង នៅខាងក្នុងយានដ្ឋាន១កន្លែង ដែលម្ចាស់យានដ្ឋាននោះក៏បានជួលទីតាំងខាងលើប្រកបអាជីវកម្មដូចគ្នា ។ គាត់បានបន្តថា ម្ចាស់យានដ្ឋានខាងលើ បានផ្តាច់ភ្លើងពួកគាត់ ដោយលើកយកមូលហេតុថា ពួកគាត់រស់នៅគ្នាច្រើននាក់ ប៉ុន្តែថ្លៃភ្លើងអស់តិចជាងយានដ្ឋានរបស់ខ្លួន ហើយស្នើរអោយពួកគាត់ជួយបង់ភ្លើង ដោយក្នុង១ខែ ត្រូវបង់លុយចំនួន១លានរៀល រយ:ពេល២៤ខែ បន្ថែមពីលើទៀតទើបគាត់ព្រមបើកភ្លើងអោយប្រើ។
ដោយសារមូលហេតុនេះ ពលរដ្ឋដែលរស់នៅផ្ទះជួលខាងលើ ក៏បានបដិសេធមិនបង់នោះទេ ព្រោះពួកគាត់បានបង់ថ្លៃភ្លើងរាល់ខែ តាមការកំណត់ និងត្រឹមត្រូវតាមវិក្កយប័ត្រភ្លើងដែលចេញក្នុងលិខិត ។ ទើបត្រូវបានម្ចាស់ទីតាំងយានដ្ឋានខាងលើ ផ្តាច់ចរន្តភ្លើងមិនអោយប្រើប្រាស់រយ:ពេល៣ថ្ងៃ គិតត្រឹមថ្ងៃទី២៧ ខែមិថុនា ឆ្នាំ២០២៥នេះ ។
រឿងហេតុនេះបានធ្វើអោយពលរដ្ឋរស់នៅផ្ទះជួលខាងលើមិនសុខចិត្តនោះទេ ក៏បានទាក់ទងទៅកាន់ម្ចាស់ផ្ទះជួល ប៉ុន្តែម្ចាស់ផ្ទះជួលមិនបានជួយអ្វីនោះទេ បែជាយល់ស្របអោយភាគីខាងជួលផ្ទះ បង់លុយអោយភាគីខាងយានដ្ឋានទៅវិញ ។
បច្ចុប្បន្នពលរដ្ឋដែលរស់នៅផ្ទះជាប់ជញ្ជាំងគ្នាជាមួយយានដ្ឋានខាងលើ មិនទាន់មានអគ្គិសនីប្រើប្រាស់វិញនោះទេ និងបានទៅជួបមន្ត្រីក្នុងសង្កាត់ ព្រមទាំងដាក់ពាក្យបណ្តឹង ក៏ប៉ុន្តែនៅតែមិនអាចដោះស្រាយចេញ ទើបពលរដ្ឋស្នើរសុំមន្ត្រីក្នុងមូលដ្ឋានជួយអន្តរាគមន៍ ហើយពួកគាត់នឹងបន្តទៅអធិការខណ្ឌដើម្បីបន្តស្វែងរកដំណោះស្រាយនេះ ។
ជុំវិញករណីខាងលើ មិនទាន់មានការបំភ្លឺណាមួយពីភាគីខាងម្ចាស់យានដ្ឋាននៅឡើយទេ ៕
ចែករំលែកព័តមាននេះ