ខេត្តប៉ៃលិន ៖ បើតាមសេចក្តីរាយការណ៍ពីលោក សែត វិចិត្រ នាយករដ្ឋបាលសាលាខេត្តប៉ៃលិន បានឱ្យដឹងថា ក្រោយទទួលដំណឹងថា មានបុរសជាពលករខ្មែរម្នាក់ជួបនឹងគ្រោះថ្នាក់ចរាចរណ៍ ត្រូវរថយន្តថៃ…
ខេត្តប៉ៃលិន ៖ បើតាមសេចក្តីរាយការណ៍ពីលោក សែត វិចិត្រ នាយករដ្ឋបាលសាលាខេត្តប៉ៃលិន បានឱ្យដឹងថា ក្រោយទទួលដំណឹងថា មានបុរសជាពលករខ្មែរម្នាក់ជួបនឹងគ្រោះថ្នាក់ចរាចរណ៍ ត្រូវរថយន្តថៃ បុកកាលពីប៉ុន្មានថ្ងៃមុន នៅប្រទេសថៃ ដោយមិនមានការព្យាបាល ពីក្រុមគ្រូពេទ្យថៃ ព្រមទាំងទុកចោលនោះ។ ក្រោយមកលោកជំទាវ បាន ស្រីមុំ អភិបាលខេត្តប៉ៃលិន បានធ្វើការទំនាក់ទំនងភ្លាមៗ ទៅកាន់ភាគីប្រទេសថៃ ដើម្បីឱ្យប្រញាប់បញ្ជូនយកមកព្យាបាលនៅក្នុងទឹកដីខ្មែរឱ្យទាន់ពេលវេលា កាលពីថ្ងៃទី២៧ ខែមិថុនា ឆ្នាំ២០២៥ ។
បើតាមប្រភពព័ត៌មានពីលោក សែត វិចិត្រ បានឱ្យដឹងថា ថ្លៃព្យាបាល និងការធ្វើដំណើរ ព្រមទាំងអាហារសម្រាប់ពលកររងគ្រោះ គឺមានការឧបត្ថម្ភទាំងស្រុង ពីលោកជំទាវ បាន ស្រីមុំ អភិបាលខេត្តប៉ៃលិន ដែលនេះបញ្ជាក់ពីការយកចិត្តទុកដាក់ខ្ពស់ ចំពោះសុខទុក្ខរបស់ពលករចំណាកស្រុក ដែលវិលត្រឡប់មកពីប្រទេសថៃ ។
លោកបន្តទៀតថា ពលករដែលជួបគ្រោះថ្នាក់ចរាចរណ៍ មានឈ្មោះ ង៉ែត សុភ័ស្ស ភេទប្រុស អាយុ៣៨ឆ្នាំ ជាកម្មករធ្វើការនៅប្រទេសថៃ មានអាការៈធ្ងន់ធ្ងរមួយចំហៀងខ្លួន មានទីលំនៅក្នុងភូមិគោកឃ្មុំ ឃុំគោកឃ្មុំ ស្រុកថ្មគោល ខេត្តបាត់ដំបង និងមានប្រពន្ធឈ្មោះ រឿន មករា អាយុ៣៥ឆ្នាំ ។
បើតាមការរៀបរាប់ពីស្ត្រីឈ្មោះ រឿន មករា ដែលជាភរិយារបស់ជនរងគ្រោះ បានឲ្យដឹងថា ប្តីរបស់គាត់ជួបគ្រោះថ្នាក់ចរាចរណ៍កាលពីថ្ងៃទី២៥ ខែមិថុនា ឆ្នាំ២០២៥នេះ វេលាម៉ោង៩និង០០នាទីយប់ ខណៈពេល ដែលកំពុងដើរទៅទិញម្ហូប យកមកហូបជួបជុំគ្រួសារ លុះដើរលើចិញ្ចើមផ្លូវសុខៗ ស្រាប់តែត្រូវបានរថយន្តថៃមួយគ្រឿង បើកមកបុកពីក្រោយក្នុងទិសដៅស្របគ្នា បណ្តាលឲ្យប្តីរបស់គាត់ខ្ទាតទៅប៉ះបង្គោលក្បែរផ្លូវរងរបួសសន្លប់ ហើយត្រូវបានម្ចាស់បង្គោលទាមទារឲ្យសងថ្លៃខូចខាតចំនួន ៣ម៉ឺនបាត ស្មើនឹងលុយខ្មែរជាង ៣លានរៀល ។
ប្រពន្ធជនរងគ្រោះ បានបញ្ជាក់ដែរថា ប្តីរបស់គាត់គ្រោះថ្នាក់សន្លប់នៅហ្នឹងកន្លែង យកទៅព្យាបាលនៅមន្ទីរពេទ្យថៃ គេមិនមើលនោះឡើយ ដោយទុកប្តីរបស់គាត់ចោល ព្រោះតែគាត់មិនមានលុយគ្រប់ក្នុងការព្យាបាល ទើបតែកាលពីថ្ងៃទី២៧ ខែមិថុនា ឆ្នាំ២០២៥ ដំណឹងឮដល់លោកជំទាវអភិបាលខេត្ត ទើបទាក់ទងទៅខាងភាគីថៃ ឱ្យបញ្ជូនប្តីគាត់មកប្រទេសខ្មែរវិញ ទាំងឈឺមិនដឹងខ្លូន ហើយត្រូវបានក្រុមគ្រូពេទ្យ និងមន្ត្រីច្រកទាំងអស់ជួយសង្គ្រោះទាន់ពេល ។
ក្រោយពេលឃើញបែបនេះ រូបគាត់ និងក្រុមគ្រសារ សូមថ្លែងអំណរគុណដល់អភិបាលខេត្តប៉ៃលិន ដែលតែងតែគិតគូរ និងយកចិត្តទុកដាក់ ចំពោះសុខទុក្ខរបស់ប្រជាពលរដ្ឋ និងពលករចំណាកស្រុក ជាពិសេសបានចាត់ក្រុមគ្រូពេទ្យជំនាញ ជួយព្យាបាលជំងឺ និងឧបត្ថម្ភថវិកា ទាំងថ្លៃព្យាបាល និងថ្លៃធ្វើដំណើរ ព្រមទាំងអាហារ ដល់គ្រួសាររបស់គាត់ ។
អ្វីដែលកាន់តែធ្វើឱ្យគាត់រំភើងចិត្តនោះ គឺលោកជំទាវអភិបាលខេត្ត បានផ្តល់សេវារថយន្តជូនទៅដល់ស្រុកកំណើតដោយឥតគិតថ្លៃ សម្រាប់ពលករ ដែលវិលត្រឡប់មកពីប្រទេសថៃ ដែលជាការជួយសម្រួល ដល់ការធ្វើដំណើររបស់ពួកគាត់ បានយ៉ាងច្រើន និងកាត់បន្ថយការចំណាយមួយផ្នែកធំផងដែរ ៕
ចែករំលែកព័តមាននេះ