លោក ត្រាំ ថា ឥណ្ឌាដែលជាមិត្តដ៏ល្អ អាចប្រឈមមុខនឹងពន្ធរហូតដល់២៥%
សហរដ្ឋអាមេរិក ៖ ប្រភពពីសារព័ត៌មាន BBC នៅថ្ងៃទី៣០ ខែកក្កដា ឆ្នាំ២០២៥ បានឱ្យដឹងថា ប្រធានាធិបតីអាមេរិក លោក…
សហរដ្ឋអាមេរិក ៖ ប្រភពពីសារព័ត៌មាន BBC នៅថ្ងៃទី៣០ ខែកក្កដា ឆ្នាំ២០២៥ បានឱ្យដឹងថា ប្រធានាធិបតីអាមេរិក លោក ដូណាល់ ត្រាំ (Donald Trump) បានអះអាងថា ប្រទេសឥណ្ឌាអាចប្រឈមនឹងពន្ធខ្ពស់រហូតដល់ ២៥% បើបរាជ័យក្នុងការបញ្ចប់កិច្ចព្រមព្រៀងពាណិជ្ជកម្មជាមួយសហរដ្ឋអាមេរិកក្នុងសប្តាហ៍នេះ។
ប្រធានាធិបតីអាមេរិកទី៤៧រូបនេះ បានឆ្លើយទៅកាន់បណ្តាអ្នកយកព័ត៌មានកាលពីថ្ងៃទី២៩ ខែកក្កដា ឆ្នាំ២០២៥ ដូច្នេះថា «បាទ! ខ្ញុំគិតដូច្នេះ» នៅពេលដែលត្រូវបានសួរថា តើឥណ្ឌានឹងប្រឈមមុខការយកពន្ធខ្ពស់ដែរឬទេ ប្រសិនបើគ្មានកិច្ចព្រមព្រៀង?
រដ្ឋាភិបាលលោក ត្រាំ បានយកថ្ងៃទី១ ខែសីហា ឆ្នាំ២០២៥ ដើម្បីអនុវត្តពន្ធគយថ្មីលើប្រទេសឥណ្ឌា ក៏ដូចជាប្រទេសមួយចំនួនផ្សេងទៀត ដែលមិនអាចសម្រេចបានកិច្ចព្រមព្រៀមពាណិជ្ជកម្មជាមួយអាមេរិក។ មន្ត្រីពីឥណ្ឌា និងអាមេរិកបាននឹងកំពុងចរចាលើកិច្ចព្រមព្រៀងពាណិជ្ជកម្មមួយ កាលពីប៉ុន្មានខែមុន ប៉ុន្តែមិនទាន់សម្រេចលទ្ធផលជាផ្លូវការនៅឡើយទេ។ នៅពេលសួរអំពីអ្វីដែលលោក ត្រាំ រំពឹងទុកពីកិច្ចព្រមព្រៀងដ៏មានសក្តានុពលជាមួយឥណ្ឌានោះ លោកបាននិយាយថា «យើងនឹងឃើញ។ ឥណ្ឌាគឺជាមិត្តដ៏ល្អ ប៉ុន្តែឥណ្ឌាបានគិតពន្ធជាមូលដ្ឋានច្រើនជាងលើប្រទេសស្ទើរតែទាំងអស់។ ប៉ុន្តែឥឡូវនេះ ខ្ញុំជាអ្នកទទួលខុសត្រូវហើយអ្នកមិនអាចធ្វើដូច្នេះបានទេ»។
ពន្ធគយ គឺជាពន្ធដែលគិតលើទំនិញដែលនាំចូលពីប្រទេសផ្សេងៗ លោក ត្រាំ បានលើកឡើងម្តងហើយម្តងទៀត ចំពោះការយកពន្ធខ្ពស់របស់ឥណ្ឌា ដោយហៅឥណ្ឌាថា «ស្តេចពន្ធ» និងជាអ្នកបំពានដ៏ធំនៃទំនាក់ទំនងពាណិជ្ជកម្ម។ ទោះយ៉ាងណាក៏ដោយ លោកមិនទាន់បានផ្ញើលិខិតកំណត់ពន្ធថ្មីផ្លូវការទៅកាន់ប្រទេសឥណ្ឌានៅឡើយទេ។
គួររំលឹកថា កាលខែមេសា ឆ្នាំ២០២៥ លោក ត្រាំ បានប្រកាសពន្ធរហូតដល់ ២៧% លើទំនិញឥណ្ឌា ដែលក្រោយមកត្រូវបានផ្អាក។ ចាប់តាំងពីពេលនោះមក ភាគីទាំងសងខាងបានចាប់ផ្តើមការចរចារកិច្ចព្រមព្រៀង។ ដ្បិតអស់ជាច្រើនឆ្នាំមកនេះ អាមេរិកបានជំរុញឱ្យមានការជ្រៀតផលិតផលរបស់ខ្លួនទៅក្នុងវិស័យកសិកម្មឥណ្ឌា ដោយមើលឃើញថា ឥណ្ឌាជាទីផ្សារដ៏សំខាន់។ ប៉ុន្តែឥណ្ឌាបានការពារយ៉ាងខ្លាំងក្លា ដោយលើកឡើងពីសន្តិសុខស្បៀង ជីវភាពរស់នៅ និងផលប្រយោជន៍របស់កសិករខ្នាតតូចរាប់លាននាក់របស់ខ្លួន។
កាលពីសប្តាហ៍មុន រដ្ឋមន្ត្រីក្រសួងពាណិជ្ជកម្មឥណ្ឌា លោក Piyush Goyal បានប្រាប់ទូរទស្សន៍អាមេរិក CNBC ថា វិស័យកសិកម្មមានភាពរសើបខ្លាំងសម្រាប់ប្រទេសឥណ្ឌា ហើយវានឹងធ្វើឱ្យប្រាកដថាផលប្រយោជន៍របស់កសិករត្រូវបានការពារយ៉ាងល្អ។ លោកក៏បានបន្ថែមថា ឥណ្ឌានៅតែមានសុទិដ្ឋិនិយមអំពីកិច្ចព្រមព្រៀងជាមួយអាមេរិកនៅក្នុងពេលឆាប់ៗនេះ។
សហរដ្ឋអាមេរិក គឺជាដៃគូពាណិជ្ជកម្មដ៏ធំបំផុតរបស់ឥណ្ឌា ជាមួយពាណិជ្ជកម្មទ្វេភាគីឈានដល់ ១៩០ពាន់លានដុល្លារក្នុងឆ្នាំ២០២៤។ លោក ត្រាំ និងនាយករដ្ឋមន្ត្រីឥណ្ឌា លោក ណារិនដ្រា ម៉ូឌី (Narendra Modi) បានកំណត់គោលដៅពាណិជ្ជកម្មឱ្យលើសពីទ្វេដងនៃតួលេខនេះ ពោលរហូតដល់ ៥០០ពាន់លានដុល្លារ។ ជាក់ស្តែង ប្រទេសឥណ្ឌាបានបន្ថយអត្រាពន្ធលើទំនិញជាច្រើនមុខរួចមកហើយ រួមទាំងស្រាវីស្គី Bourbon និងទោចក្រយានយន្តម៉ូតូផងដែរ ប៉ុន្តែសហរដ្ឋអាមេរិកនៅតែមានឱនភាពពាណិជ្ជកម្មចំនួន ៤៥ពាន់លានដុល្លារជាមួយប្រទេសឥណ្ឌា ដែលលោក ត្រាំ ចង់កាត់បន្ថយ៕ ប្រភព ៖ BBC
ចែករំលែកព័តមាននេះ