ទីក្រុងប៉េកាំង ៖ ក្រុមហ៊ុន Apple មានគម្រោងកែច្នៃម៉ូដទូរស័ព្ទ iPhone របស់ខ្លួន ប៉ុន្តែខណៈដែលតម្លៃលក់បន្តធ្លាក់ចុះជាបន្តបន្ទាប់នេះ ព័ត៌មានថ្មីៗបានព្រមានពីបញ្ហាធ្ងន់ធ្ងរជាច្រើន ។
យោងតាមសេចក្តីរាយការណ៍មួយដែលបានចេញផ្សាយដោយទីភ្នាក់ងារសារព័ត៌មាន Reuter បានឲ្យដឹងថា ក្រុមហ៊ុនផ្តល់សេវាកម្មហិរញ្ញវត្ថុរបស់អាមេរិក Citi Group បានផ្តល់ការព្រមានទៅកាន់ Apple ថា ទូរស័ព្ទ iPhone របស់ពួកគេ និងជាពិសេស iPhone XS Max កំពុងមានបញ្ហា ។
ការព្យាករណ៍របស់Citi លើការលក់iPhone ត្រូវបានកាត់បន្ថយចុះយ៉ាងខ្លាំង ដោយការព្យាករលើការលក់ iPhone XS Max ធ្លាក់ចុះដល់ទៅ ៤៨%។ ជាមួយគ្នានេះផងដែរ Apple កំពុងតែកាត់បន្ថយផលិតកម្មដើម្បីលក់ចេញiPhoneក្នុងស្តុកឲ្យអស់សិន ។
លោក William Yang អ្នកវិភាគម្នាក់នៅក្រុមហ៊ុន Citi បានឲ្យដឹងថា ៖« iPhone ឆ្នាំ ២០១៨ កំពុងតែចូលទៅក្នុងដំណាក់កាលលក់លាងស្តុក ដែលមិនល្អឡើយសម្រាប់ខ្សែសង្វាក់ផលិតកម្ម »។ ជាមួយគ្នានេះទៀតនោះ Citi គិតថា Apple នឹងលក់ iPhone បាន៤៥លានគ្រឿងប៉ុណ្ណោះសម្រាប់ត្រីមាសទី១ ដែលជាកម្រិតទាបជាងគេតាំងពីឆ្នាំ២០១២មក ។
ការឆ្លើយតបរបស់ Apple ក្នុងរយៈពេលខ្លីគឺការបន្តកាត់បន្ថយតម្លៃ iPhone ហើយបច្ចុប្បន្ននេះ ក្រុមហ៊ុនApple កំពុងតែលក់បញ្ចុះតម្លៃ iPhone XR មកត្រឹម ៤៤៩ដុល្លារ និង iPhone XS ត្រឹម៦៦៩ដុល្លារជាដើមលើគេហទំព័រ Apple.com។
លើសពីនេះទៅទៀត Apple ក៏មានគម្រោងជំរុញដល់ចំណាប់អារម្មណ៍សម្រាប់ iPhone ជំនាន់ថ្មីរបស់ខ្លួនដោយយកមកវិញនូវចំណុចដែលអ្នកប្រើប្រាស់ស្រលាញ់ចូលចិត្ត និងបន្ថែមបច្ចេកវិទ្យាកាមេរ៉ាទំនើបៗជាដើម ៕
ចែករំលែកព័តមាននេះ