ទីក្រុងញូយ៉ក៖ អគ្គលេខាធិការអង្គការសហប្រជាជាតិកំពុងខ្វាយខ្វល់ពីការខ្វះខាតថវិកាសម្រាប់ប្រើប្រាស់នៅក្នុងស្ថាប័នមួយនេះ និងដើម្បីឱ្យការបំពេញការងារមានប្រសិទ្ធភាព។ លោកហ្គូតេរ៉េសប្រកាសប្រាប់បណ្ដារដ្ឋនានាដែលជាសមាជិករបស់ UN ថាកំពុងប្រឈមនឹងការដួលរលំផ្នែកហិរញ្ញវត្ថុហើយដោយសារបំណុលដែលនៅជំពាក់គេ និងច្បាប់ថវិកា។
ដូចនេះត្រូវតែបង្ខំចិត្តយកថវិកាបម្រុងមកចាយខ្ទេចខ្ទីអស់។ នេះបើយោងតាមលិខិតមួយច្បាប់ដែលធ្លាក់ដល់ដៃរបស់អ្នកសារព័ត៌មាន។ លោកអង់តូនីញ៉ូ ហ្គូតេរ៉េសថ្លែងថាវិបត្តិហិរញ្ញវត្ថុមានសភាពធ្ងន់ធ្ងរដែលគំរាមកំហែងដល់ការអនុវត្តកម្មវិធីនានា ហើយក៏ប្រឈមនឹងហានិភ័យនៃការដួលរលំផ្នែកហិរញ្ញវត្ថុផងដែរ។ បញ្ហានេះនឹងកាន់តែចុះដុនដាបជាលំដាប់នៅក្នុងអនាគតដ៏ខ្លី។
ខាងលើនេះជាការសរសេររៀបរាប់របស់លោកហ្គូតេរ៉េសនៅក្នុងលិខិតផ្ញើជូនបណ្ដាឯកអគ្គរដ្ឋទូតនៃរដ្ឋជាសមាជិកអង្គការសហប្រជាជាតិ។ អង្គការសហប្រជាជាតិប្រឈមនឹងវិបត្តិសាច់ប្រាក់បន្ទាប់ពីប្រទេសអាមេរិកដែលជាអ្នកផ្ដល់ថវិកាធំជាងគេសម្រាប់អង្គការនេះបានកាត់លុយជំនួយអស់ជាច្រើនសម្រាប់ប្រើប្រាស់នៅក្នុងស្ថាប័ននានាដែលជាមែកធាងរបស់ UN។
រហូតមកដល់ពេលនេះ គេមិនទាន់ដឹងច្បាស់ថាតើលោកហ្គូតេរ៉េសចង់និយាយសំដៅទៅលើរដ្ឋណាទេ។ ចំណែកអ្នកនាំពាក្យអង្គការសហប្រជាជាតិក៏មិនអាចស្នើសុំការឆ្លើយបំភ្លឺបានដែរ។ កាលពីមុននេះ រដ្ឋជាសមាជិក UN ទាំងអស់បានបំពេញកាតព្វកិច្ចបង់ថវិកាគ្រប់ចំនួន និងទាន់ពេលវេលា។ មានករណីខ្លះ រដ្ឋជាសមាជិកទទួលរ៉ាប់រងអនុវត្តតាមច្បាប់ថវិកាដើម្បីទប់ស្កាត់មិនឱ្យស្ថាប័នមួយនេះដួលរលំផ្នែកថវិកា។ អគ្គលេខាធិការរូបនេះព្រមានថា UN នឹងអស់ថវិកាប្រើប្រាស់ត្រឹមខែកក្កដាខាងមុខនេះ៕ ប្រភព៖ រ៉យទ័ និងប្រភពដទៃទៀត
ចែករំលែកព័តមាននេះ