ទីក្រុងម៉ានីឡា៖ ប្រទេសទាំង១១នៃសមាគមអាស៊ានមិនអាចរកឃើញសហមតិ (កុងសង់ស៊ីស) ដើម្បីទទួលស្គាល់ការបោះឆ្នោតនៅមីយ៉ាន់ម៉ាដែលរៀបចំដោយក្រុមយោធា និងដែលលទ្ធផលបឋមបង្ហាញថាពួកគេទទួលជ័យជម្នះភាគច្រើនលើសលប់។ រដ្ឋមន្ត្រីការបរទេសហ្វ៊ីលីពីន លោកស្រីឡាហ្សារ៉ូ (Lazaro) ក្នុងនាមជាម្ចាស់ផ្ទះប្ដូរវេនអាស៊ាននៅក្នុងឆ្នាំនេះថ្លែងថាអាស៊ានមិនទាន់ប្រកាសទទួលស្គាល់ការបោះឆ្នោតទាំងបីដំណាក់កាលដែលបិទបញ្ចប់កាលថ្ងៃអាទិត្យសប្ដាហ៍មុននោះទេ។
ប្រមុខការទូតហ្វ៊ីលីពីនរូបនេះថ្លែងដូច្នេះបន្ទាប់ពីរៀបចំកិច្ចប្រជុំរដ្ឋមន្ត្រីការបរទេសអាស៊ានជាលើកដំបូងនៅក្នុងឆ្នាំនេះនៅទីក្រុងសេប៊ូ (Cebu)។ ក្នុងនោះ បញ្ហានៅមីយ៉ាន់ម៉ាជារបៀបវារៈសំខាន់នៃកិច្ចប្រជុំ។ ចំពោះសំណួរថាតើអាស៊ានមិនបានទទួលស្គាល់ការបោះឆ្នោតនេះទេ? លោកស្រីឡាហ្សារ៉ូឆ្លើយពិតមែនហើយរហូតមកដល់ពេលនេះ យើងមិនទាន់ទទួលស្គាល់ទេ។ លោកស្រីឆ្លើយតែត្រឹមនេះដោយមិនបានបញ្ជាក់លម្អិតថាតើអាស៊ានប្រកាន់ជំហរបែបណាចំពោះការបោះឆ្នោត។
សារព័ត៌មានអនឡាញរបស់ហ្វ៊ីលីពីនឈ្មោះរ៉េបផ្លឺ (Rappler) ដកស្រង់ពាក្យសម្ដីរបស់លោកស្រីឡាហ្សារ៉ូមកចុះផ្សាយថាអាស៊ានមិនអាចរកបានសហមតិ (កុងសង់ស៊ីស) ដើម្បីទទួលស្គាល់ការបោះឆ្នោតនៅមីយ៉ាន់ម៉ាទេ។ លោកស្រីឡាហ្សារ៉ូកត់សម្គាល់ថាថ្វីដ្បិតការបោះឆ្នោតទាំងបីដំណាក់កាលនោះបានបិទបញ្ចប់មែន ប៉ុន្តែដំណើរការបោះឆ្នោតមិនទាន់បិទបញ្ចប់ត្រឹមនេះទេ។
គេគិតថាការដែលអាស៊ានមិនទទួលស្គាល់ការបោះឆ្នោតនេះប្រៀបបាននឹងការទះមួយកំភ្លៀងយ៉ាងដំណំទៅលើរបបសឹកនៅមីយ៉ាន់ម៉ាដែលខិតខំរៀបចំការបោះឆ្នោតដោយសេចក្ដីសង្ឃឹមថានឹងធ្វើឱ្យប្រទេសជាតិវិលមករកភាពធម្មតាឡើងវិញ។ របបសឹកសង្ឃឹមថាការបោះឆ្នោតនេះអាចឱ្យខ្លួនឡើងកាន់អំណាចដោយស្របច្បាប់។ ប្រមុខដឹកនាំយោធា លោកមីនអុងឡាំង ថ្លែងកាលពីពេលថ្មីៗនេះថាអ្នកណាមិនទទួលស្គាល់ការបោះឆ្នោតនេះក៏ហីទៅចុះ, សំខាន់ឱ្យតែរដ្ឋាភិបាលកើតចេញពីការបោះឆ្នោតគឺចាត់ទុកថាស្របច្បាប់៕ ប្រភព៖ អាល់ចាស៊ីរ៉ា (Al Jazeera) និងប្រភពដទៃទៀត
ចែករំលែកព័តមាននេះ