ប្រទេសហ្គាបុង ៖ កងទាហានហ្គាបុងមួយក្រុម កាលពីថ្ងៃទី៧មករាវេលាម៉ោង៦និង៣០នាទីម៉ោងក្នុងស្រុក បានអានសារមួយតាមវិទ្យុរដ្ឋដោយអំពាវនាវដល់ប្រជាជនហ្គាបុងឲ្យក្រោកបះបោរនិងដោយប្រកាសពីការបង្កើត នាពេលខាងមុខនូវក្រុមប្រឹក្សាជាតិស្ដារប្រទេសឡើងវិញមួយ ពេលអវត្តមានរបស់ប្រធានាធិបតី លោកALI BONGO ONDIMBA ដែលកំពុងសម្រាកព្យាបាលខ្លួននៅប្រទេសម៉ារ៉ុក។
ស្នូរកាំភ្លើងលាន់ឮនៅជុំវិញទីតាំងវិទ្យុនិងទូរទស្សន៍រដ្ឋ RTG នាកណ្ដាលរដ្ឋធានីលីប្រឺវីល។រថពាសដែករបស់កងកម្លាំងសន្តិសុខហ្គាបុង នាវេលាម៉ោង៧ព្រឹកបានរាំងខ្ទប់មហាវិថីTRIOMPHAL ដែលមានទីតាំងវិទ្យុនិងទូរទស្សន៍រដ្ឋនោះ។
សារមួយអានដោយនាយទាហានម្នាក់ អនុសេនីយទោ KELLY ONDO OBIANGដែលប្រកាសថា រូបគេជាមេបញ្ជាការរងកងឆ្មាំសាធារណរដ្ឋ ហើយជាប្រធាននៃចលនាស្នេហាជាតិយុវកងកម្លាំងការពារនិងសន្តិសុខហ្គាបុង។ ទាហាន៣នាក់ពាក់បេរេពណ៌ខៀវនៃកងឆ្មាំសាធារណរដ្ឋ ត្រូវបានគេឃើញ ក្នុងវីដេអូមួយផ្សាយតាមបណ្ដាញសង្គម។ ចលនាយោធានេះស្នើដល់យុវកងកម្លាំងការពារនិងសន្តិសុខ ព្រមទាំងដល់យុវជនហ្គាបុងទាំងអស់ឲ្យចូលរួមជាមួយចលនាពួកគេ។ ប្រមុខចលនាបះបោរគូសបញ្ជាក់ថា ថ្ងៃដែលយើងរង់ចាំមកដល់ហើយដើម្បីជួយសង្គ្រោះហ្គាបុងឲ្យចេញផុតពីភាពចលាចល៕
ចែករំលែកព័តមាននេះ