រាជធានីភ្នំពេញ ៖ កម្មករសំណង់ម្នាក់ត្រូវបានជនសង្ស័យមួយក្រុមមានគ្នា៤នាក់ជិះម៉ូតូពីរគ្រឿងចូលទៅកាប់ បណ្តាលឲ្យស្លាប់ភ្លាមៗនៅក្នុងថ្លុកឈាមយ៉ាងអាណោចអាធ័មក្នុងបរិវេនក្រុមហ៊ុនក្រឡុកស៊ីម៉ង់ត៍ មួយកន្លែង ហើយជនសង្ស័យបានរត់គេចខ្លួនបាត់អស់។
ហេតុការណ៍ដ៏រន្ធត់នេះបង្កឲ្យមានកាភ្ញាក់ផ្អើលកាលពីវេលាម៉ោង៦និង៣០នាទីយប់ថ្ងៃទី៥ ខែមករា ឆ្នាំ២០១៩ ស្ថិតនៅក្នុងបរិវេនក្រុមហ៊ុនក្រឡុកស៊ីម៉ង់ត៍មួយកន្លែង តាមបណ្តោយផ្លូវ៣ស្ថាបន័ ភូមិទួលសំពៅ សង្កាត់ទួលសង្កែ១ ខណ្ឌឫស្សីកែវ។
ជនរងគ្រោះដែលស្លាប់ឈ្មោះរ៉ាន វៃ ភេទប្រុស អាយុ៣០ឆ្នាំ មុខរបរកម្មករសំណង់ ស្នាក់នៅនៅកន្លែងកើតហេតុ មានស្រុកកំណើតក្នុងភូមិសេរីអា ឃុំក្រស់ ស្រុករមាហែក ខេត្តស្វាយវៀង។
តាមប្រភពពីសន្តិសុខយាមនៅក្នុងក្រុមហ៊ុនក្រឡុកស៊ីម៉ង់ត៍ខាងលើបានឲ្យដឹងថា មុនកើតហេតុ នៅវេលាម៉ោង៦យប់ គាត់បានមកដល់ក្រុមហ៊ុនក្រឡុកស៊ីម៉ង់ត៍ រួចហើយគាត់បានប្តូរវេនជាមួយសន្តិសុខម្នាក់ដែលយាមពេលព្រឹកឈ្មោះកែវ ភារិន ភេទប្រុស អាយុ៣៨ឆ្នាំ ពេលប្តូរវេនរួចហើយ គាត់ក៏បានចេញទៅផ្ទះ មួយសន្ទុះក្រោយមក នៅវេលាម៉ោង៦និង៣០នាទីថ្ងៃដដែល ក៏មានបុរសម្នាក់បើករ៉ឺម៉កកង់បីមួយគ្រឿងមានដឹកស្រាបៀរចូលមកដើម្បីឲ្យប្រពន្ធរបស់គេដែលលក់នៅក្នុងបរិវេណក្រុមហ៊ុនក្រឡុកស៊ីម៉ង់ត៍ ក្បែរកន្លែងកើតហេតុ ហើយក៏បានប្រើគាត់ឲ្យជួយលើកស្រាបៀរនោះយកទៅឲ្យប្រពន្ធរបស់គេដែលនៅខាងក្នុង ស្រាប់តែឮសំឡេងឆោឡោ លុះពេលគាត់រត់ចេញមកវិញ ក៏ឃើញជនរងគ្រោះត្រូវបានជនសង្ស័យកាប់បណ្តាលឱ្យស្លាប់ក្នុងថ្លុកឈាមទៅហើយ។
បើតាមប្រភពពីប្រជាពលរដ្ឋរស់នៅក្បែរកន្លែងកើតហេតុបានឲ្យដឹងថា មុនកើតហេតុ គេឃើញជនសង្ស័យចំនួន៤នាក់ជិះម៉ូតូពីរគ្រឿងមិនចាំម៉ាក បានជិះម៉ូតូមកឈប់មុខក្រុមហ៊ុនក្រឡុកស៊ីម៉ង់ត៍ចំណុចកើតហេតុខាងលើ រួចហើយមានជនសង្ស័យម្នាក់ក្នុងចំណោម៤នាក់បានចុះពីលើម៉ូតូ រួចបានដើរកាន់កាំបិតចូលទៅ ក៏ធ្វើសកម្មភាពកាប់ទៅលើជនរងគ្រោះដែលកំពុងឈរក្បែរប៉ុស្តិ៍យាមសន្តិសុខ ត្រូវចំនួន២កាំបិត ដោយ១កាំបិតត្រូវចំក និង១កាំបិតទៀតត្រូវចំដើមទ្រូងមើលឃើញគ្រឿងក្នុងស្លាប់នៅក្នុងថ្លុក
ឈាមយ៉ាងអាណោចអាធ័ម។
បន្ទាប់ពីធ្វើកម្មភាពកាប់ទៅលើជនរងគ្រោះរួចហើយ ជនសង្ស័យបានរត់ចេញមកក្រៅឡើជិះម៉ូតូដែលបក្ខពួកនៅចាំខាងក្រៅគេចខ្លួនបាត់ស្រមោល។
ក្រោយកើតហេតុសមត្ថកិច្ចមូលដ្ឋាន និងជំនាញបានចុះមកដល់រួចបានធ្វើកាកោសល្យវិច្ឆ័យរួចប្រគល់ជូនសាច់ញាតិយកទៅស្រុកកំណើតបានប្រពៃណី ។ ចំណែកជនសង្ស័យសមត្ថកិច្ចនឹងធ្វើការស្រាវជ្រាវដើម្បីស្វែងរកចាប់ខ្លួនយកមកផ្តន្ទាទោសទៅតាមផ្លូវច្បាប់៕
ចែករំលែកព័តមាននេះ