ខេត្តបាត់ដំបង ៖ អ្នកនាំពាក្យ នៃស្នងការដ្ឋាននគរបាលខេត្តបាត់ដំបង ចេញសេចក្តីប្រកាសព័ត៌មាន នៅថ្ងៃទី៣១ មីនានេះថា កាលពីយប់ថ្ងៃទី២៧ ខែមីនា ឆ្នាំ២០២៦…
ខេត្តបាត់ដំបង ៖ អ្នកនាំពាក្យ នៃស្នងការដ្ឋាននគរបាលខេត្តបាត់ដំបង ចេញសេចក្តីប្រកាសព័ត៌មាន នៅថ្ងៃទី៣១ មីនានេះថា កាលពីយប់ថ្ងៃទី២៧ ខែមីនា ឆ្នាំ២០២៦ វេលាម៉ោង២២និង៤០នាទី លើផ្លូវជាតិលេខ៥ ចន្លោះបង្គោលគីឡូម៉ែត លេខ 246-247 ស្ថិតក្នុងក្រុមទី១២ ភូមិកកោះ ឃុំកកោះ ស្រុកមោងឫស្សី ខេត្តបាត់ដំបង មានករណីគ្រោះថ្នាក់ចរាចរណ៍មួយកើតឡើងរវាងរថយន្ត០១គ្រឿងម៉ាកមកស៊ីដេស MERCEDESBENZ AMG GT53 ពណ៌ខ្មៅ ស៊េរីឆ្នាំ២០២០ ពាក់ផ្លាកលេខកម្ពុជា C.S.6168 (អ្នកបើកបររត់គេចខ្លួនពីកន្លែងកើតហេតុ) ជាមួយនឹងម៉ូតូចំនួន០២គ្រឿង ដែលម៉ូតូទី១ ម៉ាកហុងឌីម HONDADREAM ពណ៌ខ្មៅ ពាក់ផ្លាកលេខបាត់ដំបង1H-2105 ជិះគ្នាចំនួន ០៣នាក់ បណ្តាលឱ្យស្លាប់ចំនួន ០២នាក់ស្រី និងរងរបួសធ្ងន់ចំនួន ០១នាក់ប្រុស រីឯម៉ូតូទី២ ម៉ាកហុងដាឌ្រីម HONDA DREAM ពណ៌ខ្មៅពាក់ផ្លាកលេខ បាត់ដំបង 1S-1965 ជិះគ្នាចំនួន ០៣នាក់បណ្តាលឱ្យស្លាប់ចំនួន ០៣នាក់ប្រុស ចំនួន ០២នាក់ស្រីចំនួន ០១នាក់ ។
អ្នកនាំពាក្យ បានអោយដឹងថា សរុបជនរងគ្រោះស្លាប់ ចំនួន០៥នាក់ ប្រុសចំនួន០២នាក់ ស្រីចំនួន០៣នាក់ ដែលក្នុងនោះស្រីម្នាក់មាន គភ៌ចំនួន០៣ខែផង (តាមប្រភពពីក្រុមគ្រួសារសព) និងរងរបួសធ្ងន់ចំនួន ០១នាក់ប្រុស ជនរងគ្រោះទាំងអស់ រស់នៅភូមិកកោះឃុំកកោះ ស្រុកមោងឫស្សីខេត្តបាត់ដំបង ខណៈដែលជនរងគ្រោះជិះម៉ូតូវិលត្រឡប់មកពីមើល ការប្រគុំតន្ត្រីមួយកន្លែងស្ថិតនៅទីរួមស្រុកមោងឫស្សី នារាត្រីនោះ ។
អ្នកនាំពាក្យ បានអោយដឹងបន្តទៀតថា បន្ទាប់ពីកើតហេតុរួចមក សមត្ថកិច្ចនគរបាលស្រុកមោងឫស្សី រួមសហការជាមួយសមត្ថកិច្ចនគរបាលការិយាល័យនគរបាលចរាចរណ៍ផ្លូវគោក នៃស្នងការដ្ឋានបានចុះទៅដល់ទីតាំងកើតហេតុ អ្នកបើករថយន្ត បង្កគ្រោះថ្នាក់បានគេចខ្លួនពីកន្លែងកើតហេតុបាត់ ដោយបន្សល់ទុករថយន្តបង្កនៅទីនោះ ហើយសមត្ថកិច្ច និងអ្នកបានជួយសង្គ្រោះនាំអ្នករងរបួសទៅកាន់មន្ទីរពេទ្យ និងអ្នកស្លាប់ប្រគល់ជូនក្រុមគ្រួសារសព វាស់វែងពិនិត្យកន្លែងកើតហេតុ និងប្រមូលភស្តុតាងនានា នៅកន្លែងកើតហេតុ ។
អ្នកនាំពាក្យ បញ្ជាក់ថា តាមរយៈផ្លាកលេខរថយន្ត កម្ពុជា C.S.6168 សមត្ថកិច្ចបានធ្វើការស្រាវជ្រាវស្វែងរកឃើញអត្តសញ្ញាណ ម្ចាស់រថយន្តមានឈ្មោះ ស៊ីវ ជ័យសិដ្ឋ ភេទប្រុសឆ្នាំ កំណើត ០២.១២.២០០៦ មានទីលំនៅផ្ទះលេខ ១៧ ផ្លូវ លេខ ១២ ភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។
សមត្ថកិច្ចនគរបាល បានចាត់វិធានការស្រាវជ្រាវស្របតាមជំនាញស្របតាមនីតិវិធីជាបន្តបន្ទាប់ លុះដល់ ថ្ងៃទី៣០ ខែមីនា ឆ្នាំ២០២៦ សមត្ថកិច្ចនគរបាលបានទំនាក់ទំនងទៅឈ្មោះ ស៊ីវ សុជាតិ ជាឳពុករបស់ឈ្មោះស៊ីវ ជ័យសិដ្ឋ ដើម្បីឱ្យគាត់សហការបញ្ជាក់ពីករណីនេះក្នុងនោះគាត់បានបញ្ជាក់ថា រថយន្តម៉ាកមកស៊ីដេស MERCEDESBENZ AMG GT53 ពណ៌ខ្មៅស៊េរីឆ្នាំ២០២០ពាក់ផ្លាកលេខ កម្ពុជា C.S.6168 គឺជាកម្មសិទ្ធរបស់កូន គាត់ឈ្មោះ ស៊ីវ ជ័យសិដ្ឋ ប្រាកដមែន នៅថ្ងៃទី២៧ ខែមីនា ឆ្នាំ២០២៦ គាត់បានដឹងថា កូនគាត់នេះបើករថយន្តខាងលើ ចេញពីភ្នំពេញ មកផ្លូវបាត់ដំបង មិនទៅតាមផ្លូវសៀមរាបទេ ហើយថ្ងៃដដែលគាត់បានទទួលទូរសព្ទពីប្រពន្ធគាត់ប្រាប់ថា កូនឈ្មោះ ស៊ីវ ជ័យសិដ្ឋ ជួបគ្រោះថ្នាក់ចរាចរណ៍នៅខេត្តបាត់ដំបង ប៉ុន្តែមកដល់ថ្ងៃនេះ គាត់មិនបានទទួលដំណឹងថា កូនរបស់គាត់ស្ថិតនៅទីណានោះទេ ប៉ុន្តែសមត្ថកិច្ចបានស្នើឱ្យឈ្មោះ ស៊ីវ សុជាតិ មន្ត សហការជាមួយសមត្ថកិច្ច ក្នុងការស្វែងរកកូនរបស់គាត់មកទទួលខុសត្រូវលើករណីនេះ ។
ក្រៅពីការកសាងសំណុំរឿងស្របតាមជំនាញ ស្របតាមនីតិវិធី មកដល់ពេលនេះសមត្ថកិច្ចនគរបាលបន្ត ៖ ប្រមូលភស្តុតាងបន្ថែមទៀតតាមរយៈកាមេរ៉ាសុវត្ថិភាព នៅតាមដងផ្លូវក្នុងទិសដៅពីភ្នំពេញ មកខេត្តបាត់ដំបង និងប្រភពផ្សេងៗទៀត ដែលអាចវាយតម្លៃ និងសន្និដ្ឋានបានថា ឈ្មោះ ស៊ីវ ជ័យសិដ្ឋ ពិតជាបានបើកបររថយន្តខាងលើ បង្កគ្រោះថ្នាក់បណ្តាលឱ្យស្លាប់ និងរបួសជនរងគ្រោះដូចខាងលើ ហើយខណៈពេលនេះ សមត្ថកិច្ចកំពុងសហការ ស្វែងរកឈ្មោះ ស៊ីវ ជ័យសិដ្ឋ យកមកទទួលខុសត្រូវតាមផ្លូវច្បាប់ជាធរមាន ៕
ចែករំលែកព័តមាននេះ