ខេត្តកំពង់ធំ ៖ មានករណីបុរសម្នាក់សង្ស័យបែកថ្នាំ បានឡើងលើបង្គោលភ្លើង បង្កឱ្យមានការភ្ញាក់ផ្អើលកើតឡើងកាលពីវេលាម៉ោង១០និង៣០នាទីព្រឹកថ្ងៃទី៣០ ខែមីនា ឆ្នាំ២០២៦ ស្ថិតនៅតាមបណ្ដោយផ្លូវវិថីប្រជាធិបតេយ្យ មុខសាលារៀនគ្រាប់ពូជ ភូមិទី៧…
ខេត្តកំពង់ធំ ៖ មានករណីបុរសម្នាក់សង្ស័យបែកថ្នាំ បានឡើងលើបង្គោលភ្លើង បង្កឱ្យមានការភ្ញាក់ផ្អើលកើតឡើងកាលពីវេលាម៉ោង១០និង៣០នាទីព្រឹកថ្ងៃទី៣០ ខែមីនា ឆ្នាំ២០២៦ ស្ថិតនៅតាមបណ្ដោយផ្លូវវិថីប្រជាធិបតេយ្យ មុខសាលារៀនគ្រាប់ពូជ ភូមិទី៧ សង្កាត់កំពង់ធំ ក្រុងស្ទឹងសែន ខេត្តកំពង់ធំ ។
បុរសម្នាក់ខាងលើឈ្មោះ រឿន វាស្នា អាយុ២៧ ឆ្នាំ មុខរបរមិនពិតប្រាកដ មានទីលំនៅភូមិព្នៅ ឃុំរំលេច ស្រុកបាកាន ខេត្តពោធិ៍សាត់ មិនដឹងជារសាត់អណ្តែតយ៉ាងណានោះទេ ទើបបានជាមកដល់ខេត្តកំពង់ធំ ។
លោកវរសេនីយ៍ឯក គឹម សុខមករា អធិការនគរបាលក្រុងស្ទឹងសែនប្រាប់ថា កាលពីព្រឹកថ្ងៃកើតហេតុ ជននេះបានធ្វើសកម្មភាពដោយឡើងលើបង្គោលភ្លើង(កន្លែងកើតហេតុខាងលើ) ដែលមានកម្ពស់ជាង១០ ម៉ែត្រពីដី ឃើញដូច្នោះ ផ្អើលអស់មនុស្សម្នា មានទាំងសមត្ថកិច្ចផង បាននាំគ្នាធ្វើអន្តរាគមន៍ ស្រែកហៅឱ្យចុះមកដីវិញ តែមិនព្រមចុះ ។ ទោះបីយករថយន្តស្ទូចទៅជួយ ក៏មិនព្រមចុះមកដែរ ។
កម្លាំងសម្ត្ថកិច្ចនិងពលរដ្ឋឡើងជួយចាប់ឱ្យចុះមក ក៏មិនព្រមចុះ ហើយក៏បានលែងដៃលោតចុះមកដី បណ្ដាលឱ្យមានរបួសផ្នែកក្បាលនិងបាក់ជើងឆ្វេង។
សមត្ថកិច្ចក៏ហៅរថយន្តសង្គ្រោះដឹកជនរងគ្រោះខាងលើត្រូវបាននាំមកសង្គ្រោះនៅមន្ទីរពេទ្យបង្អែកខេត្តកំពង់ធំ។
តាមចម្លើយបំភ្លឺរបស់សាម៉ីខ្លួនផ្ទាល់គឺរូបគេធ្លាប់ប្រើប្រាស់គ្រឿងញៀន ៕
ចែករំលែកព័តមាននេះ